លោកស្រីមែរគែលត្រៀមធ្វើបេក្ខនារី សម្រាប់អាណត្តិដឹកនាំទី៤ នៅអាល្លឺម៉ង់
ថ្ងៃអាទិត្យនេះ លោកស្រីអាន់ហ្កឺឡា មែរគែល ប្រកាសទៅកាន់បក្សអភិរក្សCDU របស់លោកស្រីថា លោកស្រីនឹងធ្វើជាបេក្ខនារី សម្រាប់អាណត្តិដឹកនាំទី៤ នៅពេលបោះឆ្នោតសភា ឆ្នាំ២០១៧។ អាន់ហ្កឺឡា មែរគែល បានក្លាយជាអ្នកដឹកនាំយូរជាងគេ នៅប្រទេសលោកខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
បក្សកាន់អំណាចអាល្លឺម៉ង់ CDU នឹងរៀបចំសមាជបក្ស នៅខែធ្នូចុងឆ្នាំនេះ។ ប្រមុខដឹកនាំអាន់ហ្កឺឡា មែរគែល ប្រាប់ថា លោកស្រីចង់ជាប់ឆ្នោត ជាប្រធានបក្សម្តងទៀត ក្នុងសមាជនេះ ហើយបន្ទាប់មក លោកស្រីនឹងដាក់បេក្ខភាពសម្រាប់ការបោះឆ្នោតសភា ឆ្នាំ២០១៧ ដើម្បីបន្តដឹកនាំអាល្លឺម៉ង់ សម្រាប់អាណត្តិទី៤ទៀត។
គិតសម្រាប់ប្រទេសលោកខាងលិច លោកស្រីមែរគែល គឺជាមេដឹកនាំកាន់តំណែងយូរជាងគេ។ លោកស្រីមានអាយុ៦២ឆ្នាំ ឡើងកាន់អំណាចនៅអាល្លឺម៉ង់តាំងពីឆ្នាំ២០០៥ មក។ ប្រជាប្រិយភាពលោកស្រីមែរគែលបានធ្លាក់ចុះខ្លាំង ក្នុងឆ្នាំ២០១៦នេះ ដោយសារនយោបាយអន្តោប្រវេសន៍ ទទួលយកជនភៀសខ្លួន របស់លោកស្រី។ ក្នុងការបោះឆ្នោតតំបន់កន្លងមក បក្សកាន់អំណាច CDU បានបរាជ័យ ប្រឈមនឹងបក្ស AfD ជាបក្សស្តាំនិយម ជ្រុលដ៏ក្មេងខ្ចី។
ប៉ុន្តែ មួយរយៈចុងក្រោយនេះ ចំនួនជនភៀសខ្លួនដែលហូរចូលអាល្លឺម៉ង់បានថយចុះជាងមុន ធ្វើអោយ អាន់ហ្កឺឡា មែរគែល ទទួលបានប្រជាប្រិយភាពឡើងវិញ។ ការឡើងកូតឡើងវិញនេះ ក៏ដោយសារតែប្រទេសលោកខាងលិច កំពុងបារម្ភពីបញ្ហាអនាគត ក្រោយពេលដែលលោកដូណាល់ ត្រាំជាប់ឆ្នោតនៅអាមេរិកដែរ។
គួរបញ្ជាក់ដែរថា ក្នុងបក្សកាន់អំណាចCDU លោកស្រីមែរគែលគ្មានគូប្រជែងដែលមាន ប្រៀបជាងខ្លួនគាត់ទេ។ ក្នុងប្រទេសវិញ លោកស្រីក៏មានប្រជាប្រិយភាពជាងគូប្រជែងមកពីបក្សសង្គមនិយមប្រជាធិបតេយ្យដែរ។ សកម្មជនបក្សកាន់អំណាច មើលឃើញថា អាចផ្តល់ទំនុកចិត្តដល់លោកស្រីមែរគែល ក្នុងការបន្តដឹកនាំអាល្លឺម៉ង់ ស្របតាមជំហរលទ្ធិប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ