លោកស្រីមែរគែលជួបលោកហូឡង់នៅប៉ារីសមុនជំនួបអឺរ៉ុបថ្ងៃសុក្រ
នៅក្រុងប៉ារីស ថ្ងៃព្រហស្បតិ៍នេះ ប្រធានាធិបតីបារាំង ហូឡង់ បានទទួលជួបប្រមុខដឹកនាំអាល្លឺម៉ង់ លោកស្រីមែរគែល ដើម្បីពិភាក្សាសម្រេចសម្រួល លើសំណើរបស់បារាំងនិងអាល្លឺម៉ង់ ដែលត្រូវលើកយកទៅជំនួបកំពូលមិនផ្លូវការរបស់សហភាពអឺរ៉ុប នៅស្លូវ៉ាគី ថ្ងៃសុក្រស្អែក។ ជាលើកទី១ ក្រោយពេលអង់គ្លេសបោះឆ្នោតដើរចេញពីអឺរ៉ុប ជំនួបអឺរ៉ុបស្អែកនេះ គ្មានវត្តមានចូលរួមរបស់អង់គ្លេសទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
ទិសដៅនៃជំនួបរវាងប្រមុខដឹកនាំអាល្លឺម៉ង់ អាន់ហ្កឺឡា មែរគែល និងប្រធានាធិបតីបារាំង ហ្វ្រង់ស៊័រ ហូឡង់ ថ្ងៃព្រហស្បតិ៍នេះ គឺសម្រេចសម្រួលអោយចប់សព្វគ្រប់ នូវសំណើរបស់បារាំងនិងអាល្លឺម៉ង់ ទាក់ទងនឹងប្រធានបទការពារជាតិ និងសុវត្ថិភាពសន្តិសុខ ពិសេសចំពេលបច្ចុប្បន្ន ដែលអឺរ៉ុបកំពុងប្រឈមនឹងការគំរាមភេរវកម្ម។
មុនជួបលោកហូឡង់ថ្ងៃនេះ លោកស្រីមែរគែលបានជួបមេដឹកនាំអឺរ៉ុបច្រើននាក់មកហើយ។ អាល្លឺម៉ង់កំពុងព្យាយាមបន្ធូរភាពតានតឹងក្នុងទំនាក់ទំនងជាមួយបណ្តាប្រទេសអឺរ៉ុប ក្នុងនោះមានទាំងបារាំងផងដែរ។ ភាពតានតឹងរវាងអាល្លឺម៉ង់ និងបណ្តាប្រទេសអឺរ៉ុប ទាក់ទងនឹងបញ្ហាថវិកា និងវិបត្តិជនភៀសខ្លួន។ ការដែលអាល្លឺម៉ង់ចង់អោយអឺរ៉ុបត្បិតត្បៀតការចាយវាយហួសហេតុ បានធ្វើអោយប្រទេសអឺរ៉ុបជាច្រើនមិនសប្បាយចិត្ត។
ទាក់ទងនយោបាយ ជនភៀសខ្លួន លោកស្រីមែរគែលធ្លាប់អួតសម្បើមទីពីនយោបាយអាល្លឺម៉ង់ក្នុងការបណ្តុះបណ្តាលទទួលជនភៀសខ្លួន ខណៈប្រទេសអឺរ៉ុបខាងកើត បដិសេធមិនទទួលយកជនភៀសខ្លួនច្រើនដូចអាល្លឺម៉ង់។
គេរំពឹងថា ថ្ងៃព្រហស្បតិ៍នេះ លោកស្រីមែរគែលនឹងមិនលើកពីប្រធានបទតានតឹងទាំងនេះ មកនិយាយជាមួយប្រធានាធិបតីបារាំងទេ។ សំណើបារាំងនិងអាល្លឺម៉ង់ ទាក់ទងផ្នែកសន្តិសុខនិងការពារជាតិ ដែលលោកស្រីមែរគែល និងលោកហូឡង់ ជជែកគ្នាទឹកចុងក្រោយនេះ នឹងលើកយកទៅបង្ហាញនៅជំនួបមិនផ្លូវការអឺរ៉ុប ថ្ងៃសុក្រស្អែក នៅស្លូវ៉ាគី។ សំណើនេះមានទិសដៅរកអោយបានដំណោះស្រាយមុនជំនួបកំពូលផ្លូវការ ខែធ្នូចុងឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ