កិច្ចប្រជុំប្រទេសតំបន់បាល់កង់ នៅក្រុងវីយ៉ែន មានវត្តមានលោកស្រីមែរកិល
ថ្ងៃសៅរ៍នេះ ក្រុងវីយែន ប្រទេសអូទ្រីសរៀបចំជំនួបប្រទេសតំបន់បាល់កង់ ក្នុងទិសដៅពិភាក្សាពីវិបត្តិជនភៀសខ្លួន។ ក្នុងកិច្ចប្រជុំនេះ គេឃើញមានវត្តមានចូលរួមរបស់ប្រមុខ ដឹកនាំអាល្លឺម៉ង់ មែរកិល ផងដែរ។ បក្សកាន់អំណាចរបស់លោកស្រីមែរកិល ទើបតែបរាជ័យក្នុងការបោះឆ្នោតតំបន់ ដោយសារតែនយោបាយជនអន្តោប្រវេសន៍។
ចុះផ្សាយនៅថ្ងៃ៖
បក្សកាន់អំណាចអាល្លឺម៉ង់ទទួលបរាជ័យ ក្នុងការបោះឆ្នោតតំបន់ ដោយសារតែនយោបាយទទួលជួយជនអន្តោប្រវេសន៍របស់លោកស្រីមែរកិល។ ប៉ុន្តែ ក៏មិនបានហាមឃាត់ប្រមុខដឹកនាំមែរកិល មិនអោយចូលរួមកិច្ចប្រជុំតំបន់បាល់កង់ ដែលផ្តោតការពិភាក្សាលើការជួយដោះស្រាយបញ្ហាជនភៀសខ្លួនដែរ។
ជំនួបប្រទេសតំបន់បាល់កង់ថ្ងៃសៅរ៍នេះ មានទិសដៅពិភាក្សា ជំរុញអោយមានការសម្រេចចិត្តរួម ក្នុងការដោះស្រាយវិបត្តិជនភៀសខ្លួន។ ជាជំនួបដែលមានការចូលរួមពីប្រទេសបាល់កង់ ដូចជាអាល់បានី ស៊ែរប៊ី រូម៉ានី ក្រូអាស៊ី រឺក៏ស្លូវេនីជាដើម។ ថ្នាក់ដឹកនាំប្រទេសសហភាពអឺរ៉ុបក៏មានវត្តមាននៅក្រុងវីយ៉ែនដែរ។
ប្រទេសជាច្រើននៅតាមតំបន់បាល់កង់ កំពុងចោទសួរពីបញ្ហាជនភៀសខ្លួន។ គេកត់សម្គាល់ថា នាយករដ្ឋមន្ត្រីហុងគ្រី វិចទ័រ អូបាន ជាអ្នកដែលមិនពេញចិត្តនយោបាយទទួលជនភៀសខ្លួនរបស់រដ្ឋាភិបាលអាល្លឺម៉ង់។ រហូតដល់ខែមិនាឆ្នាំ២០១៦ ជនភៀសខ្លួនជាង១សែននាក់បានឆ្លងចូលអឺរ៉ុប តាមច្រកតំបន់បាល់កង់។ ប៉ុន្តែ តាំងពីមានការបិទព្រំដែនតំបន់បាល់កង់ និងមានកិច្ចព្រមព្រៀងរវាងអឺរ៉ុបជាមួយតួកគីខែមិនាមក ជនភៀសខ្លួនតាមសមុទ្រមេឌីទែររ៉ាណេបានថយចុះជាងមុន។
មុននឹងចូលរួមកិច្ចប្រជុំក្រុងវិយ៉ែន ថ្ងៃសៅរ៍នេះ នាយករដ្ឋមន្ត្រីក្រិក អាឡិចស៊ីស ស៊ីប្រាស បានសុំអោយមានសាមគ្គិភាពគ្នា ជាមួយក្រិក ក្នុងការដោះស្រាយបញ្ហាជនភៀសខ្លួន។ អ្នកសុំសិទ្ធិជ្រកកោន ៦ម៉ឺននាក់កំពុងជាប់ខ្លួននៅក្រិក។ នៅប៊ុលហ្ការី និងស៊ែរប៊ីវិញក៏មានមនុស្សរាប់ពាន់នាក់ដែរ។
សម្រាប់ប្រមុខដឹកនាំអូទ្រីស លោក គ្រីស្យង់ គើន ដែលរៀបចំជំនួបនៅទីក្រុងវីយ៉ែន ថ្ងៃសៅរ៍នេះ ជំនួបក្រុងវីយ៉ែន ក៏ដូចជាជំនួបអឺរ៉ុបផ្សេងទៀតដែរ គឺមានទិសដៅទុកផលប្រយោជន៍ជាតិនិមួយៗមួយឡែក ដោយត្រូវជំរុញអោយមានការសម្រេចចិត្តរួមគ្នាមួយឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ