លោកនេតានយ៉ាហ៊ូ៖”អ៊ីរ៉ង់ជាប្រទេសដ៏គ្រោះថ្នាក់បំផុត គឺគ្រោះថ្នាក់ជាងអង្គការរដ្ឋអ៊ីស្លាមទៅទៀត
នៅថ្ងៃចន្ទ២៩កញ្ញាម្សិលមិញ ថ្លែងពីលើវេទិកា អ ស ប នាយករដ្ឋមន្ត្រីអ៊ីស្រាអែលលោក នេតានយ៉ាហ៊ូ បានព្រមានយ៉ាងធ្ងន់ៗប្រឆាំងទល់នឹងប្រទេសអ៊ីរ៉ង់ដែលមានអាវុធនុយក្លេអ៊ែរ។ ចំពោះលោកនេតានយ៉ាហ៊ូ "អ៊ីរ៉ង់គឺជាប្រទេសមួយប្រកបដោយគ្រោះថ្នាក់ខ្លាំងបំផុតសំរាប់ពិភពលោក ហើយក៏មិនខុសគ្នាពីក្រុមហាម៉ាសអ៊ីស្លាមជ្រុលនិយមប៉ាឡេស្ទីនឬមួយក៏ក្រុមជីហាតអង្គការរដ្ឋអ៊ីស្លាមដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ជារៀងរាល់លើក នៅពេលដែលនាយករដ្ឋមន្ត្រីអ៊ីស្រាអែលឡើងថ្លែងនៅលើវេទិកា អ ស ប លោកបេនហ្សាមីន នេតានយ៉ាហ៊ូ បានឧទ្ទិសសន្ទរកថារបស់លោកទៅលើនយោបាយការបរទេសជាអាទិភាពរបស់ប្រទេសអ៊ីស្រាអែល៖ គឺរារាំងដាច់ខាត មិនឲ្យអ៊ីរ៉ង់មានអាវុធនុយក្លេអ៊ែរ។ លោក នាយករដ្ឋមន្ត្រីអ៊ីស្រាអែល លើកនេះ មានឆន្ទៈដ៏មោះមុត គឺប្រាថ្នាចង់ឲ្យ អ ស ប ជឿជាក់តាមខ្លួនថា” អ៊ីរ៉ង់ ពិតជាប្រទេសមួយប្រកបដោយគ្រោះថ្នាក់បំផុត គឺ គ្រោះថ្នាក់ជាង ក្រុមជីហាត រដ្ឋអ៊ីស្លាមទៅទៀត”។
លោកនេតានយ៉ាហ៊ូ បានចោទជាសំណួរថា” តើយើងទាំងអស់គ្នា សុខចិត្តទុកបណ្តោយឲ្យក្រុមរដ្ឋអ៊ីស្លាម ចំរើនធាតុអ៊ុយរ៉ានីញ៉ូម ឬក៏ផលិតម៊ីស៊ីលអន្តរទ្វីបឬទេ? ចម្លើយ គឺទេ ! ដូច្នេះយើងក៏មិនត្រូវបណ្តោយឲ្យអ៊ីរ៉ង់មានអាវុធនុយក្លេអ៊ែរដែរ ពីព្រោះអ៊ីរ៉ង់ជារបបមួយដ៏គ្រោះថ្នាក់បំផុតនៅលើលោក។ ក្នុងន័យនេះ សំរាប់លោកនេតានយ៉ាហ៊ូ “អ៊ីរ៉ង់ ក៏គ្មានខុសគ្នាអ្វីពីក្រុមហាម៉ាសអ៊ីស្លាមជ្រុលនិយមប៉ាឡេស្ទីនឬមួួយក៏ក្រុមជីហាតអង្គការរដ្ឋអ៊ីស្លាមដែរ”។
លោកបេនហ្សាមីន នេតានយ៉ាហ៊ូ នាយករដ្ឋមន្ត្រីអ៊ីស្រាអែល បានថ្លែងឆ្លើយតបផងដែរចំពោះលោក ម៉ាម៊ូត អាបាស ប្រធានរដ្ឋអំណាចប៉ាឡេស្ទីន ដែលបានចោទប្រកាន់លោកថា “បានដឹកនាំសង្រ្គាមប្រល័យលោកមួយ”នៅតំបន់ហ្កាហ្សា ។ នាយករដ្ឋមន្ត្រីអ៊ីស្រាអែល ថែមទាំងបាននិយាយការពារផងដែរ ចំពោះ”ការវាយប្រហាររបស់អ៊ីស្រាអែលប្រឆាំងទៅលើពួកអ៊ីស្លាមជ្រុលនិយមប៉ាឡេស្ទីនហាម៉ាសនៅតំបន់ហ្កាហ្សាដែលលោកនេតានយ៉ាហ៊ូ ចាត់ទុកថា វាជាផ្នែកមួយនៃការវាយប្រយុទ្ធប្រឆាំងទល់នឹងក្រុមអ៊ីស្លាមជ្រុលនិយម ដូចគ្នានឹងការវាយប្រយុទ្ធប្រឆាំងទល់នឹង អង្គការរដ្ឋអ៊ីស្លាមនៅអ៊ីរ៉ាក់និងនៅស៊ីរីដែរ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ