អានតួអត្ថបទ
តួកគី-ស៊ីរី

តួកគី​ប្រកាសថា​បាន​បើក​ប្រតិបត្តិការ​វាយ​​ក្រុម​កួដ នៅ​ខាងជើង​ស៊ីរី

លោកអ៊ែរដូហ្កាន់ ប្រធានាធិបតីតួកគី បានប្រកាស កាលពីថ្ងៃសៅរ៍ ទី២០មករានេះថា កងទ័ពតួកគី បានចាប់ផ្តើម បើកប្រតិបត្តិការយោធា វាយប្រហារទៅលើក្រុមកួដស៊ីរី នៅតាមតំបន់ Afrin ស្ថិតនៅភាគខាងជើងស៊ីរី ក្បែរព្រំដែនជាមួយតួកគី។ ការសម្រេចវាយប្រហារក្រុមកួដ ក្នុងទឹកដីស៊ីរី ពីសំណាក់តួកគីនេះ កំពុងធ្វើឲ្យកងទ័ពអាមេរិក មានការព្រួយបារម្ភ ដោយសារក្រុមកួដស៊ីរី គឺជាសម្ព័ន្ធមិត្តនឹងកងទ័ពអាមេរិក ក្នុងយុទ្ធនាការបោសសំអាត ក្រុមជីហាតអង្គការរដ្ឋអ៊ីស្លាម។

រថក្រោះរបស់​តួកគី កំពុង​បើក​​ប្រតិបត្តិការ​​នៅ​តំបន់Afrin ភាគ​ខាងជើង​ស៊ីរី
រថក្រោះរបស់​តួកគី កំពុង​បើក​​ប្រតិបត្តិការ​​នៅ​តំបន់Afrin ភាគ​ខាងជើង​ស៊ីរី Reuters
ផ្សាយពាណិជ្ជកម្ម

បន្ទាប់ពីសមរភូមិ នៅតំបន់ Afrin ដែលបានចាប់ផ្តើម នៅថ្ងៃសៅរ៍ទី ២០ មករា កងទ័ពតួកគី នឹងបន្តទៅសមរភូមិ Minbej បន្តទៀត ដែលទីក្រុងទាំង២នេះ សុទ្ធស្ថិតនៅភាគខាងជើងស៊ីរី តាមបណ្តោយជាប់ព្រំដែន ជាមួយតួកគី។ នេះគឺជាសម្តីប្រកាសរបស់លោកអ៊ែរដូហ្កាន់ ប្រធានាធិបតីតួកគី។ លោកប្រធានាធិបតីតួកគី បានបន្ថែមថា បន្តិចម្តងៗ លោកសូមសន្យាថា តួកគី នឹងសំអាតមេរោគ រាតត្បាតរបស់ពួកកួដ ឲ្យ​អស់ មិនឲ្យឆ្លងចូលមកបង្ករបញ្ហានៅតួកគី។

គួររំលឹកថា តំបន់ភាគខាងជើងស៊ីរី មួយផ្នែកធំ ស្ថិតក្រោមការកាន់កាប់ របស់កងកម្លាំងកួដស៊ីរី (YPG) បន្ទាប់ពីក្រុមនេះ បានយកឈ្នះទៅលើក្រុមជីហាតអង្គការរដ្ឋអ៊ីស្លាម។ ក្រុមកួដស៊ីរីនេះ គឺជាសម្ព័ន្ធមិត្តរបស់អាមេរិក និងបានដើរតួនាទីយ៉ាងសំខាន់ ក្នុងការជួយប្រយុទ្ធបោសសំអាត ក្រុមជីហាតអង្គការរដ្ឋអ៊ីស្លាមនៅស៊ីរី។ ក៏ប៉ុន្តែក្រុមកួដស៊ីរី ត្រូវតួកគីចាត់ទុកថា ជាក្រុមភេរវកម្ម ព្រោះក្រុមនេះ មានទំនាក់ទំនងយ៉ាងស្និត ជាមួយនឹងក្រុមកួដនៅតួកគី(PKK)។ តួកគីខ្លាចក្រែងក្រុមទាំងពីរនេះ ព្រួតដៃគ្នា វាយបំបែក​ទឹកដីនៅ ចន្លោះខាងជើងស៊ីរី និងខាងត្បូងតួកគី។

ថ្មីៗនេះ កងទ័ពសម្ព័ន្ធមិត្ត ដឹកនាំដោយអាមេរិក បានប្រកាសពីគំរោង បង្កើតកម្លាំងចំនួន៣ម៉ឺននាក់ ដែលភាគច្រើនជាពួកកួដស៊ីរី ដើម្បីការពាររក្សាស្ថិរិភាព នៅភាគខាងជើងស៊ីរី។ គឺដំណឹងនេះហើយ ដែលបានធ្វើឲ្យប្រធានាធិបតីតួកគីឆេះដុំ។ កាលពីថ្ងៃព្រហស្បតិ៍កន្លងទៅ មេបញ្ជាការកងទ័ពតួកគី បានទៅដល់ក្រុមម៉ូស្គូ ដែលតាមការស្មាន គឺដើម្បីនិយាយពីបញ្ហាកងកម្លាំងកួដស៊ីរីនេះ។

យោងតាមអ្នកវិភាគ កងទ័ពតួកគី មិនអាចចេះតែបើកប្រតិបត្តិការទ្រង់ទ្រាយធំ នៅខាងជើងស៊ីរីបានទេ ព្រោះតំបន់នេះ ក៏ជាមូលដ្ឋានតាំងទី របស់កងទ័ពរុស្ស៊ីដែរ។​ ដូច្នេះ បើគ្មានរុស្ស៊ីបើកភ្លើងខៀវ គឺតួកគីមិនអាចធ្វើទៅបានទេ។ ជាងនេះទៅទៀត រុស្ស៊ី ក៏មានទំនាក់ទំនងល្អជាមួយកងកម្លាំងកួដស៊ីរីដែរ។

ទាក់ទិនទៅនឹងការប្រកាស ពីការបើកសមរភូមិប្រយុទ្ធនៅក្នុងទឹកដីស៊ីរីនេះ  មន្ត្រីក្រសួងការបរទេសស៊ីរី បានគំរាមថា បើសិនជាមានយន្តហោះទាហានតួកគី ហោះមកធ្វើសកម្មភាពលើដែនអាកាសស៊ីរី គឺគេនឹងបាញ់កម្ទេចចោល។ ដោយឡែក អ្នកយកព័ត៌មាន  AFP ប្រចាំនៅខេត្តHatay ខាងត្បូងតួកគី បានសង្កេតឃើញថា មានមានក្បួនរថក្រោះ និងរថយន្តដឹកកងទាហានតួកគីជាច្រើនគ្រឿង បានបើកសំដៅទៅតំបន់ព្រំដែនជាមួយនឹងស៊ីរី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

ចែករំលែក :
រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ