ពេទ្យកោសល្យវិច្ច័យអេហ្ស៊ីប៖ បំណែកតូចៗរបស់សាកសពធ្វើឲ្យគេជឿថា យន្តហោះផ្ទុះមុនធ្លាក់
តើការស៊ើបអង្កេត ស្វែងរកយន្តហោះអេហ្ស៊ីបរបស់ក្រុមហ៊ុនអេហ្ស៊ីបអ៊ែរ បានឈានដល់កម្រិតណា? ៦ថ្ងៃក្រោយយន្តហោះជើងហោះហើរប៉ារីស គែរធ្លាក់ទៅក្នុងទឹកសមុទ្រ គេនៅបន្តរុករកបំណែកយន្តហោះ និងជនរងគ្រោះ នៅក្នុងបរិវេណរបស់យន្តហោះធ្លាក់។ នៅថ្ងៃអង្គារម្សិលមិញ ពេទ្យកោសល្យវិច្ច័យអេហ្ស៊ីបម្នាក់បានប្រាប់ទីភ្នាក់ងារព័ត៌មាន អាមេរិកាំង AP ពីសមត្មិកម្មដែលថា យន្តហោះបានធ្លាក់ដោយសារកម្លាំងផ្ទុះ ប៉ុន្តែ ការអះអាងនេះត្រូវបានប្រធានផ្នែកកោសល្យវិច្ច័យអេហ្ស៊ីបបដិសេធ មិនទទួលស្គាល់ នៅប៉ុន្មានម៉ោងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
មួយថ្ងៃក្រោយទាត់ចោលការអះអាងរបស់ភាគីក្រិក ដែលថា យន្តហោះរបស់ក្រុមហ៊ុនអេហ្ស៊ីបអ៊ែរបានផ្លាស់ប្តូរខ្សែគោចរ នៅមុនពេលធ្លាក់ពីរ៉ាដា នៅថ្ងៃអង្គារម្សិលមិញ អាជ្ញាធរអេហ្ស៊ីបបានចេញមុខម្តងទៀត បដិសេធព័ត៌មានរបស់គ្រូពេទ្យជំនាញអេហ្ស៊ីប គ្នាឯង ដែលបាននិយាយប្រាប់ទីភ្នាក់ងារព័ត៌មានអាមេរិកាំង APថា យន្តហោះទំនងបានផ្ទុះមុននឹងធ្លាក់ចូលទឹកសមុទ្រ។ ការផ្ទុះ ដែលគេនៅមិនទាន់ដឹងថា តើបានបណ្តាលមកពីគ្រាប់ផ្ទុះ ឬមូលហេតុអ្វីផ្សេង។
រហូតមកដល់ថ្ងៃអង្គារ គេនៅមិនទាន់រកឃើញ នៅឡើយទេ ដាន ជាតិគ្រឿងផ្ទុះ នៅលើបំណែកយន្តហោះ ឬឥវ៉ាន់របស់អ្នកដំណើរ ដែលកងទ័ពអេហ្ស៊ីប ប្រមូល ស្រង់បានពីទឹកសមុទ្រ។ ប៉ុន្តែ អ្នកទទួលខុសត្រូវគ្រូពេទ្យកោសល្យវិច្ច័យអេហ្ស៊ីបម្នាក់ ដែលសុំមិនបញ្ចេញឈ្មោះ បាននិយាយប្រាប់ទីភ្នាក់ងារព័ត៌មានអាមេរិកាំង APថា បើមើលទៅលើទំហំរបស់បំណែកសាកសពដែលដាច់ជាដុំៗតូចៗ គេជឿថា យន្តហោះអេហ្ស៊ីបអាចរងកម្លាំងផ្ទុះមុននឹងធ្លាក់ក្នុងទឹកសមុទ្រ។ តាមអ្នកទទួលខុសត្រូវអេហ្ស៊ីបដដែល បំណែកសាកសព ធំជាងគេ ដែល គេស្រង់ ប្រមូលបានតាំងពីថ្ងៃអាទិត្យមក មានទំហំធំបំផុត ប៉ុនបាតដៃ និងត្រូវគេច្រកចូលក្នុងស្បោង ចំនួន ២៣ស្បោង។
នៅក្នុងសេចក្តីថ្លែងការណ៍ ចុះផ្សាយដោយទីភ្នាក់ងារព័ត៌មានអេហ្ស៊ីប Mena ប្រធានស្ថាប័ន កោសល្យវិច្ច័យអេហ្ស៊ីប បានចាត់ទុក ដំណឹងផ្តល់ទៅដល់អ្នកកាសែតបរទេស គឺជារឿងមិនពិត និងមិនបានស្តែងចេញពីជំហររបស់អាជ្ញាធរអេហ្ស៊ីបទេ។
នៅថ្ងៃអាទិត្យ ការិយាល័យស៊ើបអង្កេត និងវិភាគរបស់បារាំង BEAធ្លាប់បានបញ្ជាក់ព័ត៌មានរបស់កាសែតអាមេរិកាំងពីការណ៍ដែលថា គេទទួលបានសារស្វ័យប្រវត្តិ ដែលបង្ហាញថាយន្តហោះMS804របស់ក្រុមហ៊ុនអេហ្ស៊ីបអ៊ែរមានផ្សែងចេញពីបង្គន់ និងពីបន្ទប់ខ្សែភ្លើង ដែលស្ថិតនៅក្រោមបន្ទប់អ្នកបើកបរ គឺនៅ៣នាទី មុនដែលយន្តហោះបានធ្លាក់បាត់ពីរ៉ាដា។ សម្រាប់អ្នកឯកទេសបារាំង សារខាងលើនៅមិនទាន់អនុញ្ញាតឲ្យគេហ៊ានកំណត់ដើមហេតុដែលធ្វើឲ្យមានផ្សែង។ យ៉ាងណាក៏ដោយ ទាំងអេហ្ស៊ីប និងបារាំង ដែលចូលរួមក្នុងការស៊ើបអង្កេតលើកនេះ មិនបានទាត់ចោលសម្មតិកម្មណាទាំងអស់ មិនថា គ្រោះថ្នាក់បច្ចេកទេស គឺគម្រោងបំផ្ទុះគ្រាប់បែកបំផ្លាញយន្តហោះ។
តាំងពីថ្ងៃចន្ទ បារាំងបានបញ្ជូននាវាល្បាតទៅក្នុងដែនទឹក ដែលគេស្រង់បានបំណែកយន្តហោះអេហ្ស៊ីប។ បើទោះជាមានបេសកកម្មចំបងជួយស្រង់យកបំណែកយន្តហោះ និងសាកសពជនរងគ្រោះ នាវាល្បាតបារាំងសំដៅផងដែរ ស្វែងរកប្រអប់ខ្មៅ នៅក្នុងទឹកសមុទ្រ ដែលនឹងមានសមត្ថភាពផ្តល់សញ្ញាយ៉ាងយូរ មួយខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ