យេម៉ែន៖ស្លាប់ជាង៥០នាក់ ក្នុងបេសកកម្មកំទេចក្រុមភេរវកម្មលើកដំបូង របស់លោកដូណាល់ ត្រាំ
យ៉ាងហោចណាស់ មានមនុស្សស្លាប់៥៧នាក់ ក្នុងប្រតិបត្តិការវាយប្រហារ ដោយឧបករណ៍ដ្រូនរបស់ទាហានអាមេរិក នៅភាគកណ្តាលប្រទេសយេម៉ែន។ ក្នុងចំណោមអ្នកស្លាប់ មាន៤១នាក់ ត្រូវគេជឿថាគឺជាក្រុមអ៊ីស្លាមអាល់កៃដា នៅយេម៉ែន។ នេះគឺបេសកកម្មវាយកំទេចក្រុមភេរវកម្មអ៊ីស្លាម លើកទីមួយហើយ ក្រោមការដឹកនាំនៃរដ្ឋាភិបាលថ្មី របស់លោកដូណាល់ ត្រាំ។ លោកត្រាំ ទើបតែបានប្រកាសថា ត្រូវបង្កើនកម្លាំងកំទេចក្រុមជីហាតអ៊ីស្លាមឲ្យអស់ ដើម្បីកុំឲ្យអតីតកាលថ្ងៃទី១១ កញ្ញា ២០០១ កើតឡើងម្តងទៀត សម្រាប់សហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
មានស្លាប់៥៧នាក់ ក្នុងនោះ៨នាក់ជាស្ត្រី និង៨នាក់ទៀតជាកុមារ។ ចំណែក៤១នាក់ទៀត ត្រូវបានគេជឿថា គឺជាកងកម្លាំងជីហាតអ៊ីស្លាមអាល់កៃដា ប្រចាំនៅតំបន់ឧបទ្វីបអារ៉ាប់ ភាគកណ្តាលប្រទេសយេម៉ែន។ កងទ័ពអាមេរិក បានប្រើប្រាស់ឧបករណ៍ដ្រូនបំពាក់ទៅដោយកាណុងកាំភ្លើង រួមជាមួយនឹងឧត្ថម្ភាគចក្រ បានធ្វើការវាយប្រហារ ទៅលើសាលារៀន វិហារម៉ូស្កេ នៅតំបន់Yakla ខេត្ត Baïda ភាគកណ្តាលយេម៉ែន ដែលទីតាំងទាំងនោះ ត្រូវបានក្រុមស៊ើបការសម្ងាត់អាមេរិក ជឿថា ជាកន្លែងលាក់ខ្លួនរបស់ពួកអាល់កៃដា។ បើតាមប្រភពពីមូលដ្ឋានផ្ទាល់ បានអះអាងទៀតថា មានកងកុម្មង់ដូថ្មើរជើងរបស់អាមេរិក ក៏បានធ្វើប្រតិបត្តិការផ្ទាល់ផងដែរ។
យោងតាមអ្នកទទួលខុសត្រូវបេសកកម្មនេះ ដោយសុំមិនបញ្ចេញឈ្មោះ បានបញ្ជាក់ថា មេក្លោងក្រុមអ៊ីស្លាមអាល់កៃដា ប្រចាំនៅតំបន់នេះ ឈ្មោះAbou Barzane ត្រូវគេជឿថាបានស្លាប់ក្នុងប្រតិបត្តិការនេះ។ ក្នុងចំណោមអ្នកស្លាប់ ក៏មានមេក្លោងសំខាន់នៃបក្សពួកអ៊ីស្លាម ចំណុះឲ្យក្រុមអាល់កៃដាយេម៉ែន ៣នាក់ទៀតដែរ។
សូមបញ្ជាក់ថា នៅតំបន់ដើមបូព៌ា មានតែកងទ័ពអាមេរិកទេ ដែលមានឧបករណ៍ដ្រូនបំពាក់ដោយកាណុងកាំភ្លើង ដែលអាចហោះចំងាយឆ្ងាយទៅដល់យេម៉ែនបាន។ យ៉ាងណាមិញ ក្រុមអាល់កៃដាប្រចាំឧបទ្វីបអារ៉ាប់ ដែលមានមូលដ្ឋានធំនៅយេម៉ែន គឺត្រូវបានកងទ័ពអាមេរិក ចាត់ទុកថាជាក្រុមភេរវកម្មអ៊ីស្លាមដ៏សាហាវ និងគ្រោះថ្នាក់បំផុត។
ថ្លែងក្នុងឱកាសចុះហត្ថលេខាលើក្រឹត្យច្បាប់ ហាមឃាត់មិនឲ្យប្រជាជនមកពីប្រទេសអ៊ីស្លាម៧ប្រទេស ធ្វើដំណើរចូលសហរដ្ឋអាមេរិក ដែលក្នុងនោះមានប្រទេសយេម៉ែនដែរនោះ លោកដូណាល់ ត្រាំ បានលើកឡើងថា លោកសន្យាថានឹងកម្ទេចក្រុមភេរវកម្មអ៊ីស្លាម ឲ្យវិនាសទាំងអស់ ទាំងក្រុមអាល់កៃដា ទាំងក្រុមជីហាដអង្គការរដ្ឋអ៊ីស្លាម។ ជាអំណះអំណាង ដល់វិធានការថ្មីរបស់គាត់ លោកត្រាំនិយាយបន្តថា អាមេរិក មិនចង់បានពួកភេរកម្មនៅលើដីអាមេរិកទេ ហើយអាមេរិក ត្រូវតែធានាធ្វើយ៉ាងណា កុំឲ្យពួកនេះចូលមកអាមេរិក បានឲ្យសោះ។ លោកត្រាំ បានបន្តថា អាមេរិក មិនដែលភ្លេចទេ នូវមេរៀនដ៏ជូរចត់ នៃភេរវកម្មថ្ងៃទី១១ កញ្ញា ២០០១ ដែលពួកភេរវកម្មអ៊ីស្លាម បានធ្វើមកលើប្រជាជនអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ