អារ៉ាប៊ីសាអូឌីត៖ ជំហានថ្មីនៃកំណែទំរង់ តែបង្កប់ដោយទំនោរផ្តាច់ការ
ចុះផ្សាយនៅថ្ងៃ៖
ស្តាប់ - ០៧:៥៦
កាលពីថ្ងៃទី ២៦ កញ្ញា ព្រះចៅសាល់ម៉ាន់ របស់អារ៉ាប៊ីសាអូឌីត បានចុះព្រះហស្ថលេខា លើព្រះរាជក្រិត្យមួយ ដើម្បីអនុញ្ញាតិឲ្យស្ត្រីអារ៉ាប៊ូសាអូឌីត មានសិទ្ធិបើកបររថយន្តដូចបុរសដែរ។ នេះគឺជាការបោះជំហានថ្មី ទៅកាន់ការធ្វើកំណែទំរង់សង្គមអារ៉ាប៊ីសាអូឌីត។ តែទោះជាយ៉ាងណា ហេតុផលសេដ្ឋកិច្ច និងនយោបាយ ស្ថិតនៅពីក្រោយកំណែទំរង់នេះ ជាជាងចេតនាចង់ផ្តល់សិទ្ធិឲ្យស្ត្រី។ កំណែទម្រង់នេះ វាគ្រាន់តែជាតំណក់ទឹកតូចមួយប៉ុណ្ណោះ ព្រោះថាស្ត្រីអារ៉ាប៊ីសាអូឌីត នៅតែជាប់ក្នុងរនាំងសាសនាអ៊ីស្លាម យ៉ាងតឹងតែងដដែល។ ហើយទន្ទឹមគ្នានេះព្រះអង្គម្ចាស់ ទាយាទនៃព្រះចៅសាល់ម៉ាន់ កំពុងតែពង្រឹងអំណាច កាន់តែរឹងមាំ ក្នុងកណ្តាប់ដៃ។
ឆ្នាំ២០១៨ ស្ត្រីអារ៉ាប៊ីសាអូឌីត អាចមានសិទ្ធិបើកបររថយន្តហើយ
ចាប់ពីខែមិថុនា ឆ្នាំ២០១៨ទៅ ស្ត្រីជនជាតិ អារ៉ាប៊ីសាអូឌីត និងអាចមានសិទ្ធិបើកបរ ដូចបុរសហើយ។ បើយើងមិនមែនជាស្ត្រីអារ៉ាប៊ូសាអូឌីត នោះយើងប្រាកដជាពុំអាចយល់ ពីអារម្មណ៍រំភើបសប្បាយប៉ុណ្ណាទេ បន្ទាប់ពី ពួកគេបានឮដំណឹងនេះ។ នេះគឺជាក្តីរំពឹងរបស់ស្ត្រីអារ៉ាប៊ីសាអូឌីត យូរអង្វែងមកហើយ។
គេនៅចាំថា ថ្ងៃទី ៦ វិច្ឆិកា ឆ្នាំ១៩៩០ ជាថ្ងៃដែលស្ត្រីអារ៉ាប៊ីសាអូឌីត មួយក្រុម ហ៊ានប្តេជ្ញាប្រឆាំងនឹងច្បាប់រដ្ឋ ដោយបានបើករថយន្តធ្វើក្បួនដង្ហែរនៅតាមផ្លូវ ក្នុងទីក្រុងរីយ៉ាត ដើម្បីជាការទាមទារឲ្យរដ្ឋាភិបាល សម្រេចអនុញ្ញាត ឲ្យស្ត្រីមានសិទ្ធិបើកបរ។ ពួកគេត្រូវនគរបាលចាប់ ដាក់ពិន័យ្យ និងជេរប្រទេចផ្តាសារ ជាសាធារណៈ។ តែ២៨ឆ្នាំក្រោយមក ក្តីស្រម៉ៃ របស់ស្ត្រីអារ៉ាប៊ីសាអូឌីត ថាអាចធ្វើដំណើរទៅណាមកណា ដោយខ្លួនឯង ដោយមិនចាំបាច់មានមនុស្សប្រុសជូននោះ បានក្លាយជាការពិតហើយ។
អ្នកដែលនៅពីក្រោយគំនិតធ្វើកំណែទំរង់ ដ៏គួរឲ្យអបអរនេះ គឺ ព្រះអង្គម្ចាស់រាជទាយាទ នៃរាជវង្សសាល់ ម៉ាន់ ដែលមានឈ្មោះថា Mohammed Ben Salman ឬដែលគេនិយមហៅកាត់ថា MSB។ ព្រះអង្គម្ចាស់ Mohammed Ben Salman ក្នុងវ័យ៣២ឆ្នាំ កំពុងដឹកនាំអំណាចរដ្ឋាភិបាលប្រទេសមហាសេដ្ឋីប្រេងនេះ ដោយបានកំណត់ទិសដៅកំណែទម្រង់យ៉ាងសកម្ម។
គេមិនអាចមិនអបអរ នឹងការផ្លាស់ប្តូរថ្មីនេះទេ។ តែគេក៏មិនត្រូវ ត្រេកអរ សរសើរលឿនជ្រុល ដល់បន្ទាត់នយោបាយកំណែទម្រង់ របស់ព្រះអង្គម្ចាស់ Mohammed Ben Salman ដែរ។ នៅពីក្រោយ ការអនុញ្ញាតិ ឲ្យស្ត្រីមានសិទ្ធិបើកបរនេះ គឺបង្កប់ទៅដោយហេតុផលនយោបាយ និងសេដ្ឋកិច្ច ដែលព្រះអង្គម្ចាស់ Mohammed Ben Salman បានសម្លឹងឃើញ។ គ្មាននរណាជឿទេថា ព្រះអង្គម្ចាស់ Mohammed Ben Salman សម្រេចធ្វើកំណែទម្រង់នេះ ក៏ដោយសារព្រះអង្គ បានទតឃើញនូវសេចក្តីលំបាករបស់ស្ត្រីអារ៉ាប៊ូសាអូឌីត។ ផ្ទុយទៅវិញ គឺកំណែទម្រង់សេដ្ឋកិច្ច តម្រូវការឲ្យមានស្ត្រីចូលរួមទេ ដែលព្រះអង្គម្ចាស់បានសម្លឹងមើលឃើញ។
ត្រូវការស្ត្រី ដើម្បីសម្រេចផែនការ ផ្តល់សន្ទុះសេដ្ឋកិច្ច
គោលបំណងធំបំផុតរបស់ព្រះអង្គម្ចាស់ Mohammed Ben Salman គឺផ្តល់សន្ទុះសេដ្ឋកិច្ចថ្មី ដល់អារ៉ាប៊ីសាអូឌីត តាមរយៈការពង្រីកទីផ្សារការងារក្នុងស្រុក ទៅលើវិស័យផ្សេងទៀត ដែលមិនរំពឹងតែទៅលើវិស័យប្រេងកាត។ ជាមួយនឹងការធ្លាក់ចុះនៃតំលៃប្រេងឆៅ ដែលជាប្រភពចំណូលតែមួយគត់ របស់អារ៉ាប៊ីសាអូឌីត រដ្ឋាភិបាល ទើបតែបានភ្លឺភ្នែក ហើយចាប់ផ្តើម រកប្រភពចំណូលផ្សេងទៀត។
ការចូលរួម របស់ស្រ្តីអារ៉ាប៊ីសាអូឌីត មកក្នុងទីផ្សារការងារ គឺជាការចាំបាច់បំផុត។ បើស្ត្រីមិនអាចបើកបរបាន ទៅណាចាំតែមនុស្សប្រុសជូន នោះស្ត្រីគ្មានសិទ្ធិសេរីភាព គ្រប់គ្រាន់នឹងធ្វើដំណើរទៅធ្វើការ ឬទៅបំពេញបេកសសកកម្មនានាទេ។ បច្ចុប្បន្ននេះ ក្នុងចំណោមបុគ្គលិកបំរើការងារនៅអារ៉ាប៊ីសាអូឌីត មានស្ត្រីអារ៉ាប៊ីសាអូឌីត ប្រមាណតែ២២%ប៉ុណ្ណោះ។ តួលេខនេះទាបណាស់ បើប្រៀបធៀបទៅនឹងប្រទេសក្បែរខាង ដែលមានប្រព័ន្ធនយោបាយ និងសង្គមប្រហាក់ប្រហែលគ្នា។ នោះក៏ ដោយសារតែ នៅតាមប្រទេសក្បែរខាងទាំងនោះ គេអនុញ្ញាតិ ឲ្យមនុស្សស្រីអាចបើកបរបាន។
ជាទូទៅ ស្ត្រីអារ៉ាប៊ីសាអូឌីត មានសញ្ញាប័ត្រខ្ពស់ រៀនបានឆ្ងាយជាងបុរស។ តែជាទូទៅ ពួកគេ ត្រូវបង្ខំចិត្តមិនធ្វើការ នៅតែផ្ទះ ដោយសារតែមិនអាចបើកបរបាន។ កុំថាឡើយដល់ទៅធ្វើការ ទោះជូនកូនទៅសាលា ទៅផ្សារទិញទំនិញ ពួកគេត្រូវការអ្នកបើកបរជាបុរស ជូនទៅជានិច្ច។ ជាមួយនឹងការអនុញ្ញាតិឲ្យស្រ្តីមានសិទ្ធិបើកបរនេះ រដ្ឋមន្ត្រីសេដ្ឋកិច្ចអារ៉ាប៊ីសាអូឌីត អះអាងថារដ្ឋាភិបាលលោក ជឿថានៅរវាងឆ្នាំ២០៣០ ចំនួនបុគ្គលិកជាស្ត្រី នឹងឡើងដល់៣០%។
ស្ត្រីអាចបើកបរ ស្រ្តីអាចទៅធ្វើការ និងមានចំណូល
ការចូលរួមរបស់ស្ត្រី នឹងជំរុញសន្ទុះសេដ្ឋកិច្ចអារ៉ាប៊ីសាអូឌីត។ ជាបឋម ទីផ្សារលក់រថយន្ត និងរីកកាន់តែធំ ដោយសារ តែមានតំរូវការបន្ថែ។ ក្រុមហ៊ុនរថយន្ត Toyota ឬ Hyundai ដែលបានតាំងទីយ៉ាងរឹងមាំ ក្នុងប្រទេសនេះរួចទៅហើយនោះ កំពុងតែលេបទឹកមាត់ ដោយសារដំណឹងល្អនេះ។ វិស័យធានារ៉ាប់រងរថយន្ត និងកម្ចីប្រាក់ ក៏នឹងកាន់តែរីកធំទៅតាមនោះ។
ជាមួយនឹងថវិការរដ្ឋថយចុះ ដោយសារតែប្រេងចុះថ្លៃ រដ្ឋាភិបាលកំពុងសម្រេចបន្ថែមពន្ធជាច្រើន លើប្រជាជនអារ៉ាប៊ីសាអូឌីត។ គ្រួសារនីមួយៗ អាចកាត់បន្ថយការចំណាយប្រាក់ លើការជួលអ្នកបើកបរ ដើម្បីសន្សំយកទៅបង់ពន្ធ។ ប៉ុន្តែ នេះគឺជាដំណឹងអាក្រក់ សម្រាប់បុគ្គលិកស៊ីឈ្នួលបើកបរ ដែលភាគច្រើន សុទ្ធតែជាអ្នកធ្វើការចំណាកស្រុក មកពីតំបន់អាស៊ីខាងត្បូង និងអាស៊ីអាគ្នេយ៍ទៅវិញទេ ដែលប្រឈមមុខនឹងការបាត់បង់ការងារ។
ពេលដែលស្ត្រីអាចធ្វើការបាន គឺស្រ្តីនឹងមានចំណូល។ ស្ត្រីមានសិទ្ធិបើកបរ គឺគេអាចទៅផ្សារទិញទំនិញ បានដោយសេរី។ ការនេះនឹងបង្កើនសន្ទុះ ដល់មីក្រូសេដ្ឋកិច្ច ការទិញដូរទំនិញ ក្នុងស្រុក ដែលកាន់តែកើនឡើង។ ទាំងនេះ គឺជាហេតុផលសេដ្ឋកិច្ចត្រួសៗ នៅពីក្រោយការអនុញ្ញាតិ ឲ្យស្រ្តីអារ៉ាប៊ីសាអូឌីត បើកបរ។
កំណែទម្រង់សង្គម លួងចិត្តយុវជនកុំឲ្យតវ៉ា
ទន្ទឹមគ្នានេះ គឺមានហេតុផលនយោបាយដ៏ធំបំផុត គឺការពង្រឹងអំណាច ប្រមូលការគាំទ្រ ដល់រាជវង្សសាល់ម៉ាន់ ដែលព្រះអង្គម្ចាស់ Mohammed Ben Salman បានរំពឹងទុក។ ៦៥% នៃប្រជាជនអារ៉ាប៊ីសាអូឌីត គឺជាមនុស្សក្មេង អាយុក្រោម៣០ឆ្នាំ។ ដូច្នេះការធ្វើកំណែទម្រង់នេះ គឺដើម្បីឆ្លើយតបទៅនឹងគោលនយោបាយរំងាប់ការរិះគន់ ការតវ៉ាពីសំណាក់យុវជន។ យុវជនអារ៉ាប៊ីសាអូឌីត សម័យ២០១៨ មានទំនោរសេរីភាព ធំធេងណាស់ បើប្រៀបធៀបនឹងឪពុកម្តាយរបស់ពួកគេ។ ដរាបណា រាជវង្សសាល់ ម៉ាន់ ត្រូវបានយុវជនសម្លឹងឃើញថាល្អ នោះរាជវង្សនេះ នឹងនៅកាន់អំណាចបានយូរតទៅទៀត។
គំរូនយោបាយ និងសេដ្ឋកិច្ច ដែលព្រះអង្គម្ចាស់ Mohammed Ben Salman ចង់យកតាម គឺគំរូ របស់អេមៀរ៉ាត់អារ៉ាប់រួម ដែលដឹកនាំដោយ ព្រះចៅអេមៀរ Mohammed Ben Zayed។ អេមៀរ៉ាត់អារ៉ាប់រួម បានបោះជំហាន ទៅមុនអារ៉ាប៊ីសាអូឌីត លើគ្រប់វិស័យ មិនថាកំណែទំរង់សេដ្ឋកិច្ច ឬសង្គម។ តែទន្ទឹមគ្នានេះ ព្រះចៅ Mohammed Ben Zayed បានពង្រឹងអំណាចនយោបាយ បានយ៉ាងរឹងមាំ ដោយសារមានសេដ្ឋកិច្ចល្អ ប្រជាជនមិនតវ៉ា។ តែយ៉ាងណា គំរូរបស់អេមៀរ៉ាត់អារ៉ាប់រួមនេះ មិនអាចយកមកអនុវត្ត នៅអារ៉ាប៊ីសាអូឌីតបាន ដោយងាយទេ ព្រោះអារ៉ាប៊ីសាអូឌីត មានប្រជាជនច្រើនជាង មានផ្ទៃដីធំជាង និងមានជំរៀកសង្គមនិងសាសនា ច្រើនជាង អេមៀរ៉ាត់អារ៉ាប់រួម។
បើកខាងមុខ បិទខាងក្រោយ
ក្នុងរយៈពេល ប៉ុន្មានសប្តាហ៍ចុងក្រោយនេះ គឺឃើញភាពស្ទើស្ទាក់ មួយជំហ៊ានទៅមុខ មួយជំហ៊ានទៅក្រោយរបស់ព្រះអង្គម្ចាស់ Mohammed Ben Salman។ ព្រះអង្គម្ចាស់ មានបំណងបើកផ្លូវសេដ្ឋកិច្ច និងសិទ្ធិសេរីភាព ឲ្យប្រជាជនបានដកដង្ហើមបន្តិចមែន តែទន្ទឹមគ្នានេះ ព្រះអង្គក៏ប្រឹងព្យាយាមបិទការតវ៉ារិះគន់ ផ្នែកនយោបាយដែរ។ កាលពីពាក់កណ្តាលខែកញ្ញា សកម្មជននយោបាយ និងប្រមុខសាសនាជាង៤០នាក់ ត្រូវបានចាប់ខ្លួន បន្ទាប់ពីបានរិះគន់ជាចំហរ ដល់កម្មវីធីកំណែទម្រង់របស់ព្រះអង្គ។ ហើយបន្ទាប់ពីបាន អនុញ្ញាត ឲ្យស្រីមានសិទ្ធិបើកបរ ស្រាប់តែព្រះអង្គបានបញ្ជា មិនឲ្យសកម្មជនការពារសិទ្ធិស្ត្រី និយាយជាមួយបណ្តាញព័ត៌មាននានា ស្តីពីបញ្ហានេះទៅវិញ។
ស្ត្រីអារ៉ាប៊ីសាអូឌីត នៅតែជាប់ក្នុងរនាំងអ៊ីស្លាមផ្តាច់ការ
ត្រលប់មកនិយាយពីសិទ្ធិស្ត្រី ការអនុញ្ញាតិ ឲ្យស្ត្រីមានសិទ្ធិបើកបរ គឺជាជំហានកំណែទំរង់ ដ៏តូចមួយប៉ុណ្ណោះ។ ស្ត្រីអារ៉ាប៊ីសាអូឌីត នៅតែជាប់ក្នុងរនាំងប្រពៃណីអ៊ីស្លាម តឹងតែងដដែល។ ទ្រឹស្តីអ៊ីស្លាម វ៉ាហាប៊ីស ដែលអារ៉ាប៊ីសាអូឌីត អនុវត្ត បានកំណត់ឲ្យស្ត្រី ស្ថិតនៅក្រោមអាណាព្យាបាលរបស់មនុស្សប្រុស ម្នាក់ អស់មួយជីវិត។ មនុស្សប្រុសនោះ អាចជាឪពុក ឬជាស្វាមី។ ស្ត្រីគ្មានសិទ្ធិធ្វើដំណើរទៅក្រៅប្រទេស គ្មានសិទ្ធិរៀបអាពាហ៍ពិពាហ៍ គ្មានសិទ្ធិទិញអចលនទ្រព្យទេ បើសិនជាគ្មានការអនុញ្ញាត ពីមនុស្សប្រុស ដែលជាអាណាព្យាបាលរបស់ខ្លួន។ កំណែទម្រង់ ដើម្បីលើកកំពស់សិទ្ធិស្ត្រី នៅអារ៉ាប៊ីសាអូឌីត នៅមានចំងាយឆ្ងាយតទៅទៀត។
តាមពិតទៅ ការអនុញ្ញាតិ ឲ្យមនុស្សស្រីអាចបើកបរបាន គឺជាតម្រូវការសេដ្ឋកិច្ច និងនយោបាយ ដែលព្រះអង្គម្ចាស់ Mohammed Ben Salman ត្រូវតែធ្វើ។ បន្ថែមពីនេះទៀត វាក៏ជាផែនការ កសាងមុខមាត់ អារ៉ាប៊ីសាអូឌីត លើឆាកអន្តរជាតិដែរ ដើម្បីប្រជែងជាមួយប្រទេសកាតា។ អំណេះតទៅ អារ៉ាប៊ីសាអូឌីត លែងមានឈ្មោះអាក្រក់ ដែលហាមមនុស្សស្រី មិនឲ្យបើកបរទៀតហើយ។ គេអាចរីករាយត្រេកអរ នឹងការបោះជំហានកំណែទំរង់ ដ៏សំខាន់សំរាប់ស្ត្រីអារ៉ាប៊ីសាអ៊ូឌីតនេះ តែអ្វីដែលគេសោកស្តាយ គឺឆន្ទៈពិតប្រាកដ របស់ព្រះអង្គម្ចាស់ Mohammed Ben Salman។ ស្តាយត្រង់ថា បុព្វហេតុដើម្បីសិទ្ធិស្ត្រី មិនត្រូវគេយកមកធ្វើជាមូលដ្ឋានគ្រិះ នៃកំណែទំរង់នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ