ក្រុមឧទ្ទាមហ៊ូទី បំប្លោងមីស៊ីល មួយគ្រាប់ថ្មីទៀត ទៅអារ៉ាប៊ីសាអូឌីត
តាមការប្រកាសឲ្យដឹង ពីអ្នកនាំពាក្យកងទ័ពអារ៉ាបប៊ីសាអូឌីត បានបញ្ជាក់ថានៅព្រឹកថ្ងៃសៅរ៍ ទី៣១មីនា ក្រុមឧទ្ទាមហ៊ូទី នៅភាគខាងជើងយេម៉ែន បានបាញ់ប្លោងមីស៊ីល មួយគ្រាប់ថ្មីទៀត ឆ្លងចូលទៅក្នុងទឹកដីអារ៉ាប៊ីសាអូឌីត ភាគខាងត្បូង។ ក្រុមហ៊ូទីយែម៉ែន ដែលអារ៉ាប៊ីសាអូឌីត ចាត់ទុកថាជាកូនកាំបិតរបស់អ៊ីរ៉ង់នេះ ហាក់បានបន្ថែមការវាយប្រហារទៅលើអារ៉ាប៊ីសាអូឌីត កាន់តែខ្លាំង។ ជាក់ស្តែង កាលពីសប្តាហ៍មុន ក្នុងយប់ថ្ងៃទី២៥ ឆ្លងចូលថ្ងៃទី២៦មីនា ក្រុមហ៊ូទី បានបាញ់មីស៊ីល ដល់ទៅ៧គ្រាប់ ចូលទៅក្នុងដីអារ៉ាប៊ីសាអូឌីត។
ចុះផ្សាយនៅថ្ងៃ៖
លោកមេបញ្ជាការ Turki al-Maliki អ្នកនាំពាក្យកងទ័ពសម្ព័ន្ធមិត្តអារ៉ាប់ បានបញ្ជាក់ថា មីស៊ីល១គ្រាប់ ត្រូវបានកងទ័ពអារ៉ាប៊ីសាអូឌីត ស្ទាក់បាននៅវេលាម៉ោង ១០ និង១៦នាទី ព្រឹក ថ្ងៃសៅរ៍ទី ៣១មីនា។ ប្រភពដដែលអះអាងថា យ៉ាងហោចណាស់ មានបុរសជនជាតិឥណ្ឌាម្នាក់ បានរងរបួស។ ចំណែក ទីភ្នាក់ងារ ព័ត៌មានផ្លូវការរបស់អារ៉ាប៊ីសាអូឌីត បានចុះផ្សាយថា ក្រុមហ៊ូទី បានបាញ់គ្រាប់មីស៊ីល យ៉ាងងងឹតងងុល សំដៅទៅដំបន់ ក្រុង Najrane ដោយមិនគិតខ្វល់ ថាធ្លាក់ត្រូវផ្ទះប្រជាជនស្លូតត្រង់ ឬក៏អត់នោះទេ។ ដោយឡែក ទីភ្នាក់ងារព័ត៌មាន Saba របស់ក្រុមហ៊ូទី បានប្រកាសដែរថា ក្រុមហ៊ូទី ពិតជាបានបាញ់មីស៊ីលមួយគ្រាប់ សំដៅកំទេច បន្ទាយកងសេនាជាតិរបស់អារ៉ាប៊ីសាអូឌីត នៅក្នុងទីក្រុង Najrane។
គួររំលឹកថា កាលពីថ្ងៃព្រហស្បតិ៍ ទី២៩ក្រុមហ៊ូទី ក៏បានបាញ់មួយគ្រាប់សំដៅទៅក្រុងJazane ដើម្បីកំទេច ទីតាំងស្តុកប្រឹងកាតដ៏ធំមួយ។ ដោយឡែក កាលពីសប្តាហ៍មុន នៅយប់ថ្ងៃទី២៥ ឆ្លងចូលទី២៦មីនា ក្រុមហ៊ូទី បានបាញ់មីស៊ីលចំនួន៧គ្រាប់ ផ្ទួនៗគ្នា ដោយក្នុងនោះ មាន៣គ្រាប់បានហោះទៅរដ្ឋធានីរីយ៉ាដ។ កងទ័ពអារ៉ាប៊ីសាអូឌីត បានប្រកាសថា ខ្លួនបានប្រើប្រព័ន្ធខែលមីស៊ីល ដែលបានទិញពីអាមេរិក ដើម្បីកំទេចគ្រាប់មីស៊ីលទាំងនោះ មុននឹងធ្លាក់ទៅដល់ដី។
គួរកត់សម្គាល់ដែរថា ការបាញ់មីស៊ីលផ្ទួនៗគ្នា ជាច្រើនគ្រាប់ នារយៈពេលប៉ុន្មានថ្ងៃចុងក្រោយនេះ គឺក្រុមហ៊ូទី ចង់រំលឹកខួប៣ឆ្នាំ ដែលកងទ័ពអារ៉ាប៊ីសាអូឌីត បានដឹកនៃក្រុមសម្ព័ន្ធមិត្តអារ៉ាប់ ទៅទំលាក់គ្រាប់បែកនៅយេម៉ែន។ អារ៉ាប៊ីសាអូឌីត បានចោទអ៊ីរ៉ង់ថា គឺជាអ្នកប្រគល់បច្ចេកវិទ្យា និងគ្រាប់មីស៊ីលទាំងនោះ ទៅឲ្យក្រុមហ៊ូទី។ ការចោទប្រកាន់ ដែលអ៊ីរ៉ង់ តែងតែប្រកែកជានិច្ច។ តែយ៉ាងណា បើយោងតាមរបាយការណ៍ស៊ើបអង្កេត របស់អ្នកជំនាញនៅអង្គការសហប្រជាជាតិ បានឲ្យដឹងថាគ្រាប់មីស៊ីល ដែលក្រុមហ៊ូទីបានប្រើ គឺមានលក្ខណៈស្រដៀង នឹងគ្រាប់មីស៊ីល អ៊ីរ៉ង់ខ្លាំងណាស់។
សង្រ្គាមយេមែន បានអូសបន្លាយ៤ឆ្នាំមកហើយ។ ការខូចខាត និងការបាត់បង់ជីវិតមនុស្សមានកាន់តែធ្ងន់ធ្ងរ នៅក្រោយពេលដែលអារ៉ាប៊ីសាអូឌីត បានចូលធ្វើអន្តរាគមទំលាក់គ្រាប់បែក។ គិតមកត្រឹមពេលនេះ មានមនុស្សស្លាប់ប្រមាណ១ម៉ឺននាក់ និងរបួសប្រមាណ៥ម៉ឺន៣ពាន់នាក់។ ក្រៅពីខ្វះស្បៀងអាហារ និងទំនិញប្រើប្រាស់គ្រប់មុខ ប្រជាជនយេម៉ែន កំពុងប្រឈមមុខនឹងបញ្ហាសុខភាព យ៉ាងធ្ងន់ធ្ងរ បន្ទាប់ពីមានការឆ្លងរាតត្បាត នូវជំងឺអាសន្នរោគ។
ការព្យាយាមរកច្រកចរចាសន្តិភាព តែងតែរលាយក្លាយជាផេះ ជាច្រើនលើកច្រើនសារ។ អង្គការសហប្រជាជាតិ ទើបតែបានតែងតាំង លោក Martin Griffiths ឲ្យធ្វើជាអ្នកសម្របសម្រួលកិច្ចការចរចា។ ដោយឡែក បើតាមប្រភពពីមន្ត្រីទូត និងមន្ត្រីយេម៉ែនខ្លះ ដែលបានថ្លែងប្រាប់ទីភ្នាក់ងារព័ត៌មាន Reuters បានឲ្យដឹងថា ក្រុមហ៊ូទី បានបញ្ជូនក្រុមតំណាងខ្លួន ឲ្យទាក់ទងចរចាជាមួយអារ៉ាប៊ីសាអូឌីត ដោយមានប្រទេសអូម៉ង់ ជាអាជ្ញាកណ្តាល អស់រយៈពេល២ខែមកហើយ តែជាការចរចា ដោយគ្មានតំណាង របស់រដ្ឋាភិបាលយេម៉ែន ដែលបច្ចុប្បន្ន កំពុងភៀសខ្លួន នៅអារ៉ាប៊ីសាអូឌីតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ