ក្រុមកួដស៊ីរី ប្រកាសថាកំពុងចរចាជាមួយរដ្ឋាភិបាលស៊ីរី ដើម្បីសុំស្វយ័តភាព
ក្រុមកួដស៊ីរី បានប្រកាសឲ្យដឹង កាលពីថ្ងៃសៅរ៍ ទី២៨កក្កដាថា ក្រុមគេកំពុងតែចរចា ជាមួយតំណាងរដ្ឋាភិបាលស៊ីរី របស់លោកបាឆា អាល់អាសាដ ដើម្បីរៀបចំធ្វើវិមជ្ឈការ និងសុំឲ្យដែនដីដែលគ្រប់គ្រង ដោយក្រុមកួដ អាចមានស្វយ័តភាព។ បើទោះបីជានេះគ្រាន់តែជាការចាប់ផ្តើមចរចា តែយ៉ាងណា វាគឺជាលើកដំបូងហើយ ដែលមានការចរចារបៀបនេះ ជាមួយរដ្ឋាភិបាលបាឆា អាល់អាសាដ ខណៈដែលសង្រ្គាមនៅស៊ីរី មិនទាន់រលត់ទាំងស្រុងនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
កាលពីថ្ងៃព្រហស្បតិ៍កន្លងទៅ តំណាងកងកម្លាំងកួដស៊ីរី បានធ្វើដំណើរទៅក្រុងដាម៉ាស តាមការអញ្ជើញរបស់រដ្ឋាភិបាលលោកបាឆា អាល់អាសាដ ដើម្បីចាប់ផ្តើមការចរចាគ្នា ស្តីពីការបែងចែកអំណាច តាមបែបវិមជ្ឈការ និងការផ្តល់សិទ្ធិស្វ័យត ទៅឲ្យដែនដីគ្រប់គ្រងដោយក្រុមកួដស៊ីរី។ នេះបើតាមការប្រកាស កាលពីថ្ងៃសៅរ៍ របស់កងកម្លាំងប្រជាធិបតេយ្យស៊ីរី ដែលរួមគ្នា ដោយក្រុមកួដ និងក្រុមអារ៉ាប់។
បើតាមប្រភពដដែលនេះ គឺរដ្ឋាភិបាលស៊ីរី បានបង្កើត ក្រុមប្រឹក្សាពិសេសមួយ ដើម្បីចាត់ចែងការចរចា ជាមួយភាគីទាំងអស់ ដែលក្នុងនោះ មានក្រុមអារ៉ាប់ និងក្រុមកួដស៊ីរី។ បញ្ហាសេដ្ឋកិច្ច ប្រព័ន្ធយុត្តាធិការ និងបញ្ហានយោបាយ ទាំងនេះ សុទ្ធសឹងតែចោទឡើង ដែលក្រុមប្រឹក្សាពិសេសនេះ ត្រូវចរចាគ្នា រកច្រកចេញ។
លោក Sihanouk Dibo សមាជិកតំណាងឲ្យគណបក្សសហព័ន្ធប្រជាធិបតេយ្យស៊ីរី បានអះអាងថា ក្រុមប្រឹក្សានេះ នឹងនិយាយគ្នាអំពីដំណាក់កាលដែលត្រូវធ្វើ ដើម្បីឈានទៅធ្វើការបែងចែកអំណាច តាមបែបវិមជ្ឈការ។ ទោះយ៉ាងណា លោកម្នាក់នេះ និយាយថា ការចរចាគ្នា ទើបតែចាប់ផ្តើមធ្វើ ហើយលោកទទួលស្គាល់ថា វានឹងមានរយៈពេលយូរទៅមុខទៀត ព្រោះរដ្ឋាភិបាលស៊ីរី គ្រប់គ្រងអំណាចប្រមូលផ្តុំយ៉ាងណែន និងយូរយារណាស់មកហើយ។ ដោយឡែក រដ្ឋាភិបាលក្រុងដាម៉ាស មិនបានធ្វើការអះអាង ឬមានប្រតិកម្មអ្វីទាំងអស់ ទាក់ទិននឹងតំណឹង នៃការចរចាធ្វើវិមជ្ឈការនេះទេ។ គួរកត់សម្គាល់ថា កាលពីចុងឆ្នាំ២០១៧ ប្រមុខការទូតស៊ីរី ធ្លាប់បានលើកឡើងថា រដ្ឋាភិបាលស៊ីរី អាចនឹងមិនមានអ្វីជំទាស់ទេ បើសិនជាក្រុមកួដស៊ីរី ប្រាថ្នាចង់បានស្វ័យតភាពខ្លះនោះ។
គួរបញ្ជាក់ថា ក្រុមកួដស៊ីរី កន្លងមកតែងត្រូវបានរដ្ឋាភិបាលកណ្តាលស៊ីរី បំភ្លេចចោល ថ្វីបើប្រជាជនកួដ មានប្រមាណជា១៥%នៃប្រជាជនសរុបនៅស៊ីរី។ សង្រ្គាមស៊ីវីលនៅស៊ីរី បានផ្តល់ឱកាស ឲ្យក្រុមកួដស៊ីរីអាចប្រយុទ្ធយកឈ្នះ លើក្រុមជីហាតអង្គការរដ្ឋអ៊ីស្លាម ដោយមានជំនួយពីកងទ័ពអាមេរិក ហើយបានកាន់កាប់ដែនដីមួយចំនួនធំ នៅភាគខាងជើងឈាងខាងកើតស៊ីរី។ បើតាមអង្គការឃ្លាំមើលសិទ្ធិមនុស្សស៊ីរី ក្រុមកួដ បច្ចុប្បន្នកំពុងគ្រប់គ្រងដែនដីប្រមាណ៣០%នៃផ្ទៃដីស៊ីរី។
នៅឆ្នាំ២០១៦ ក្រុមកួដ ធ្លាប់បានប្រកាសថាតំបន់ខ្លួន គឺជាតំបន់នៃសហព័ន្ធស៊ីរី ដែលមានស្វ័យតភាពពិសេស ដូចជាមានការបោះឆ្នោតដាច់ដោយឡែក ប្រមូលពន្ធដារដាច់ដោយឡែក ព្រមទាំងមានប្រព័ន្ធអប់រំ និងមានកងកម្លាំងនគរបាល ដាច់ដោយឡែកផងដែរ។ ការដាក់ចិត្តចរចាជាមួយរដ្ឋាភិបាលស៊ីរី ដើម្បីធ្វើវិមជ្ឈការ ជាជាងការទាមទារឯករាជ្យ ត្រូវបានគេមើលឃើញថា គឺជាយុទ្ធសាស្ត្ររបស់ក្រុមកួដស៊ីរី ដើម្បីកុំឲ្យបាត់បង់អ្វីដែលខ្លួនខំតស៊ូបាន ហើយនិងមិនចង់ប្រឈមមុខនឹងរដ្ឋាភិបាលស៊ីរី ព្រោះខ្លួនដឹងថា រដ្ឋាភិបាលស៊ីរី អាចនឹងវាយសំពងបកវិញ ជាមួយនឹងការទំលាក់គ្រាប់បែករបស់កងទ័ពរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ