លោកដូណាល់ ត្រាំ សន្យាជួយរកកិច្ចព្រមព្រៀងសន្តិភាព រវាងអ៊ីស្រាអែល និងប៉ាឡេស្ទីន
លោក ប្រធានាធិបតីសហរដ្ឋអាមេរិក ដូណាល់ ត្រាំ កំពុងបន្តទស្សនកិច្ចនៅក្នុងតំបន់ដើមបូព៌ា។ បន្ទាប់ពីបានទៅទីក្រុងហ្សេរូសាឡឹម កាលពីថ្ងៃចន្ទ នៅថ្ងៃអង្គារ ទី២៣ឧសភានេះ លោកដូណាល់ ត្រាំ បានអញ្ជើញទៅទីក្រុងបេត្លេហឹម ដែលស្ថិតក្នុងដែនដីស៊ីហ្សកដានី របស់ប៉ាឡេស្ទីន ដើម្បីជួបជាមួយ លោក ម៉ាសមូដ អាប៉ាស ប្រមុខដឹកនាំប៉ាឡេស្ទីន។ លោក ដូណាល់ ត្រាំ បានថ្លែងក្នុងឱកាសនោះថា លោកសន្យាប្រឹងប្រែង ឲ្យអស់ពីសមត្ថភាព ដើម្បីសម្រេចកិច្ចព្រមព្រៀងសន្តិភាព រវាងអ៊ីស្រាអែល និងប៉ាឡេស្ទីន ឲ្យបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោក ដូណាល់ ត្រាំ ត្រូវបានទទួលដោយលោក ម៉ាសមូដ អាបាស នៅវិមានប្រធានាធិបតី ក្នុងទីក្រុងបេត្លេហឹម ក្នុងដែនដីស៊ីហ្សកដានី កាលពីព្រឹកថ្ងៃអង្គារ ទី២៣ឧសភា។ នៅតាមផ្លូវដែលមានការយាមកាម យ៉ាងតឹងតែង ពីសំណាក់ អាជ្ញាធរប៉ាឡេស្ទីន មានចងទង់ជាតិអាមេរិក និងប៉ាឡេស្ទីន អមជាមួយបដាពាក្យស្លោក សរសេរថា “ទីក្រុងសន្តិភាព ទទួលមេដឹកនាំសន្តិភាព”។
ទីក្រុងសន្តិភាព ក្នុងន័យពាក្យស្លោក តែធាតុពិត ទីក្រុងបេត្លេហឹម និងតំបន់ស៊ីហ្សកដានី ស្ថិតក្នុងបរិបទសង្រ្គាម រាប់សិបឆ្នាំមកហើយ។ ជាងនេះទៅទៀត តំបន់ស៊ីហ្សកដានី ត្រូវបែងចែកជាពីរ ខណ្ឌចែក ម្ខាងខាងលិច ម្ខាងខាងកើត។ អ៊ីស្រាអែល បានធ្វើជញ្ជាំងថ្ម វែងអន្លាយ ដាក់អនានិគម នៅផ្នែកខាងលិច។ យ៉ាងណាមិញ ទិដ្ឋាភាពខណ្ឌចែកទឹកដី ជាពីរ ដោយជញ្ជាំងថ្មបេតុងនេះ លោកដូណាល់ ត្រាំ ក៏បានឃើញនឹងភ្នែក នៅពេលក្បួនរថយន្តលោក ធ្វើដំណើរឆ្លងកាត់ ច្រកឆែកឆេរ ដែលមានការត្រួតពិនិត្យយ៉ាងតឹងតែង ពីសំណាក់ ទាហានស្រាអែល។
នៅចំពោះមុខ លោក អាបាស លោកដូណាល់ ត្រាំ បានថ្លែងថា សន្តិភាពគឺជាជំរើស ដែលយើងត្រូវតែសម្រេចចិត្តយក ជារៀងរាល់ថ្ងៃ។ ក្នុងន័យនេះ សហរដ្ឋអាមេរិក នឹងមានវត្តមានជានិច្ច ដើម្បីជួយកសាងសន្តិភាព។ លោកបន្តថា លោកនឹងប្រឹងប្រែង ឲ្យអស់ពីសមត្ថភាព ដើម្បីជួយអ៊ីស្រាអែល និងប៉ាឡេស្ទីន សម្រេចឲ្យបានកិច្ចព្រមព្រៀងសន្តិភាពនឹងគ្នា។
ដោយឡែក លោក ម៉ាសមូដ អាបាស បានឆ្លើយតបទៅកាន់លោក ដូណាល់ ត្រាំ វិញថា មធ្យោបាយតែមួយគត់ដើម្បីកសាងសន្តិភាពរវាងអ៊ីស្រាអែល និងប៉ាឡេស្ទីន គឺត្រូវទទួលស្គាល់ប៉ាឡេស្ទីន ជារដ្ឋអធិបតេយ្យ និងឯករាជ្យ ស្មើភាពគ្នាជាមួយអ៊ីស្រាអែល។ លោកប្រមុខដឹកនាំប៉ាឡេស្ទីន បន្ថែមថា ប៉ាឡេស្ទីន ត្រៀមខ្លួនជានិច្ច ដើម្បីចរចាជាមួយភាគីអ៊ីស្រាអែល ដោយសន្តិវិធី។ បញ្ហាគឺមិនមែនប៉ាឡេស្ទីន ស្អប់ខ្ពើមសាសនាជ្វីហ្វទេ តែបញ្ហាគឺនៅត្រង់ថា ប៉ាឡេស្ទីន មិនអាចទទួលយកការដាក់អណានិគម ទន្រ្ទានយកដែនដីប៉ាឡេស្ទីន ពីសំណាក់អ៊ីស្រាអែល។
តែយ៉ាងណា លោក ដូណាល់ ត្រាំ ដែលធ្លាប់បានបង្ហាញគោលជំហរ ថាមិនពេញចិត្តនឹងគំនិត ឲ្យមានប្រទេសពីរឯករាជ្យនោះ មិនបានឆ្លើយតបអ្វី ទៅនឹកការលើកឡើងរបស់លោកអាប៉ាសទេ។ ជាងនេះ ទៅទៀត កាលពីថ្ងៃចន្ទ នៅចំពោះមុខថ្នាក់ដឹកនាំអ៊ីស្រាអែល លោកត្រាំ បានថ្លែងបែបបង្ការទុកមុនថា មានគេប្រាប់លោកថា ជម្លោះអ៊ីស្រាអែល-ប៉ាឡេស្ទីន ជាជម្លោះស្មុគស្មាញ ពិបាកដោះស្រាយបំផុត តែយ៉ាងណា លោកសង្ឃឹមថា លោកនឹងអាចជួយជ្រោមជ្រែង ឲ្យមានកិច្ចព្រមព្រៀងសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ