តួកគី និងអ៊ីរ៉ង់ ចុះកិច្ចព្រមព្រៀងពាណិជ្ជកម្ម ដើម្បីជួយកាតា
កាលពីថ្ងៃអាទិត្យកន្លងទៅ តួកគី អ៊ីរ៉ង់ និងកាតា បានយល់ព្រមចុះកិច្ចព្រមព្រៀង លើប្រូតូកូល មួយ ដើម្បីឈានទៅសម្រេចឲ្យបាន នូវកិច្ចព្រមព្រៀងពាណិជ្ជកម្មមួយ រវាងប្រទេសប្រទេសទាំងបី។ បើតាមប្រភពពីទូរទស្សន៍ជាតិអ៊ីរ៉ង់ កិច្ចព្រមព្រៀងនេះ មានកម្មវត្ថុជួយកាតា ឲ្យមានដង្ហើមសេដ្ឋកិច្ចឡើងវិញ បន្ទាប់ពីប្រទេសនេះ ត្រូវបានអារ៉ាប៊ីសាអូឌីត និងបក្សពួក ព្រួតគ្នាផ្តាច់ចំណងការទូត និងបិទទ្វារព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ប្រតូកូលនៃកិច្ចព្រមព្រៀងមួយ ត្រូវបានចុះហត្ថលេខា នៅទីក្រុងតេអេរ៉ង់ កាលពីថ្ងៃអាទិត្យ ទី ២៦ វិច្ឆិកាម្សិលមិញ ដោយរដ្ឋមន្ត្រីក្រសួងឧស្សាហកម្មអ៊ីរ៉ង់ ជាមួយរដ្ឋមន្ត្រីក្រសួងសេដ្ឋកិច្ចតួកគី និង កាតា។ តែយ៉ាងណា ខ្លឹមសារលំអិត នៃប្រូតូកូលព្រមព្រៀងគ្នា មិនត្រូវបានគេប្រកាសឲ្យដឹងឡើយ។
បើតាមគេហទំព័ររបស់ទូរទស្សន៍រដ្ឋអ៊ីរ៉ង់ បានផ្សាយថា ប្រូតូកូលនេះ បានកំណត់ពីការបង្កើតក្រុមការងារពិសេសមួយ ដើម្បីបើកសម្រួល ដល់ការធ្វើចរាចរណ៍ ទំនិញ និងហិរញ្ញវត្ថុ រវាងប្រទេសទាំង៣។ ប្រភពដដែលបានបញ្ជាក់ថា ប្រទេសទាំង៣ មានបំណង រកច្រកដោះស្រាយ និងគេចវៀង នូវឧបសគ្គក្នុងការបញ្ជូនទំនិញ ពីអ៊ីរ៉ង់ និង ពីតួកគី ទៅកាន់កាតា។
សូមរំលឹកថា កាតា ត្រូវបានប្រទេសជិតខាងនៅជុំវិញ ដែលដឹកនាំដោយអារ៉ាប៊ីសាអូឌីត កាត់ការចោលលែងរាប់ ផ្តាច់ចំណងទូត បិទព្រំដែន ទាំងទឹកទាំងគោក ទាំងអាកាស តាំងតែពីខែមិថុនាកន្លងមកម្លេះ។ អារ៉ាប៊ីសាអូឌីត បារ៉ែន អេមៀរ៉ាតអារ៉ាប់រួម និង អេហ្ស៊ីប បានព្រួតគ្នា ចោទកាតា ថាបានប្រើនយោបាយ គាំទ្រទំនុកបំរុងក្រុមភេរវកម្ម ហើយនឹងមានទំនោរខិតទៅរកអ៊ីរ៉ង់។
កាតា បានច្រានចោលរាល់ការចោទប្រកាន់ទាំងនេះ ហើយលោកអេមៀកាតា Tamim Ben Hammad al-Thani ហាក់ប្រកាន់ជំហររឹងមាំ មិនព្រមចុះចាញ់ការដាក់គំនៀប របស់អារ៉ាប៊ីសាអូឌីត និងបក្សពួកឡើយ។ រហូតមកទល់ពេលនេះ គេនៅពុំទាន់ មានសង្ឃឹមថា ថានឹងអាចមានដំណោះស្រាយ នៃវិបត្តិនេះទេ បោះទោះបីជាកូវ៉ែត សហរដ្ឋអាមេរិក និងបារាំង ព្យាយាមសម្របសម្រួលយ៉ាងណាក៏ដោយ។
ដោយឡែក តាំងតែពីកើតវិបត្តិនេះ មក គេសង្កេត ឃើញ តួកគី និងអ៊ីរ៉ង់បានចេញមុខ ជួយជ្រោមជ្រែងកាតា តាមរយៈការបញ្ជូនទំនិញ សម្ភាៈប្រើប្រាស់ចាំបាច់ និងស្បៀងអាហារ ទៅជួយកាតា។ ប្រូតូកូល នៃនកិច្ចព្រមព្រៀងពាណិជ្ជកម្ម ដែលទើបតែចុះហត្ថលេខា ដោយប្រទេសទាំងបី កាលពីថ្ងៃអាទិត្យម្សិលមិញនេះ គឺជាសក្ខីភាព បញ្ជាក់ថា តួកគី និងអ៊ីរ៉ង់ គាំទ្រកាតា ហើយមិនចង់ឲ្យកាតា ទន់ខ្សោយ ស្ថិតក្រោមបង្គាប់របស់អារ៉ាប៊ីសាអូឌីតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ