ប្រធានាធិបតីបារាំងសន្យាជួយលីបង់ ដោះស្រាយវិបត្តិនយោបាយ និងបញ្ហាជនភៀសខ្លួន
ចាប់ពីថ្ងៃសៅរ៍ ទី១៦មេសា លោកប្រធានាធិបតីបារាំង ហ្វ្រង់ស័រ ហូឡង់ បានចាប់ផ្តើមទស្សនកិច្ចនៅតំបន់ដើមបូព៌ា ដោយបានចាប់ផ្តើមពីប្រទេសលីបង់ បន្ទាប់មកអេហ្ស៊ីប និងហ្សកដានី។ នេះជាទស្សនកិច្ចរបស់ប្រធានាធិបតីបារាំង ដែលលោកមានទិសដៅបង្ហាញពីឥទ្ធិពលនិងតួនាទីបារាំង ក្នុងកិច្ចការកសាងសន្តិភាពក្នុងតំបន់ដើមបូព៌ា។ ក៏ប៉ុន្តែក្នុងប្រទេសបារាំងឯណោះវិញ លោកប្រធានាធិបតីហ្វ្រង់ស័រ ហូឡង់ កាន់តែបាត់បង់ការគាំទ្រកាន់តែខ្លាំង។
ចុះផ្សាយនៅថ្ងៃ៖
ប្រទេស លីបង់ជួបការរាំងស្ទះនយោបាយជិត២ឆ្នាំមកហើយ ដោយគ្មានប្រធានាធិបតីគ្រប់គ្រងទេ។ ហើយមួយវិញទៀតលីបង់ មានព្រំដែនជាប់ជាមួយស៊ីរី ដែលធ្វើឲ្យមានជនភៀសខ្លួនស៊ីរី ជាង១លាននាក់ ដែលបានរត់ទៅជ្រកកោននៅលីបង់ បង្ករជាបន្ទុកមួយដ៏ធ្ងន់ថែមទៀត សម្រាប់ប្រទេសដ៏តូចមួយនេះ។ លោកប្រធានាធិបតីបារាំង កំពុងតែមានវត្តមានក្នុងប្រទេសលីបង់ ដើម្បីពិភាក្សា លើកម្មវិធីជំនួយ ដើម្បីជួយលីបង់។
ជនភៀសខ្លួនស៊ីរី នៅលីបង់មានជិត៣០% នៃប្រជាជនលីបង់៖
បន្ថែមពីវិបត្តិនយោបាយគឺ វិបត្តិជនភៀសខ្លួនស៊ីរី ដែលនាំគ្នារត់មកនៅកកកុញក្នុងប្រទេសលីបង់។ កន្លងមក តាមបណ្តាញព័ត៌មាននានា គេនាំគ្នានិយាយតែពីតួកគី ដែលមានជនភៀសខ្លួនស៊ីរី រាប់លាននាក់។ ជនភៀសខ្លួនស៊ីរី ដែលរត់ទៅលីបង់ មានមិនជាងនៅតួកគីមែន តែបើយើងធ្វើសមមាត្រ ទៅនឹងផ្ទៃដី ហើយប្រជាជនសរុប គឺថាលីបង់ កំពុងជួបវិបតិ្តធ្ងន់ធ្ងរជាងតួកគីឆ្ងាយណាស់ ព្រោះលីបង់ជាប្រទេសតូចជាងតួកគីឆ្ងាយណាស់ ហើយប្រជាជនលីបង់មានតែជាង៤លាននាក់ទេ។
បច្ចុប្បន្ននេះ ជនភៀសខ្លួនស៊ីរី នៅលីបង់ មានដល់ទៅ ជាងមួយលាននាក់។ នេះនៅមិនរាប់ជនភៀសខ្លួនមកពីតំបន់ផ្សេង ដូចជាជនភៀសខ្លួនប៉ាឡេស្ទីនជាដើម។ សរុបទៅមានន័យថា ចំនួនជនភៀសខ្លួន នៅលីបង់ មានសឹងតែស្មើ៣០%នៃចំនួនប្រជាជនលីបង់ទៅហើយ។ ដូច្នេះហើយ បានជាលីបង់ត្រូវការជំនួយបន្ទាន់ពីសហគមន៍អន្តរជាតិ។
ជួយលីបង់១៥០លានអឺរ៉ូ ដោះស្រាយវិបត្តិជនភៀសខ្លួនស៊ីរី៖
អ្វីដែលរដ្ឋាភិបាលបារាំងបានសន្យា គឺបារាំងនឹងផ្តល់ប្រាក់ឧបត្ថម្ភដល់លីបង់ សម្រាប់ឆ្នាំ២០១៦នេះ គឺ៥០លានអឺរ៉ូ។ តាមពិត ការសន្យានេះ បានធ្វើរួចទៅហើយ កាលពីដើមខែមីនា ក្នុងឱកាសសន្និសីទរកជំនួយជួយជនភៀសខ្លួនស៊ីរីនៅទីក្រុងឡុងដ៍។ បន្ថែមពីនេះ សម្រាប់៣ឆ្នាំទៅមុខទៀត លោកប្រធានាធិបតីបារាំងសន្យា ជួយលីបង់ ១០០លានអឺរ៉ូ។
ក្រៅពីជំនួយហិរញ្ញវត្ថុ បារាំងបានសន្យាជាមួយលីបង់ ថានឹងទទួលយកជនភៀសខ្លួនស៊ីរី ចំនួន៣ពាន់នាក់ ដែលបច្ចុប្បន្នស្នាក់នៅលីបង់ យកមករស់នៅបារាំង ដោយធ្វើការសហការជាមួយនឹងឧត្តមស្នងការជនភៀសខ្លួន របស់អង្គការសហប្រជាជាតិ។ យ៉ាងណាក៏ដោយ ៣ពាន់វានៅតិចណាស់។ បារាំងសន្យាទទួលជនភៀសខ្លួនស៊ីរី សរុបទាំងអស់៣ម៉ឺននាក់ ក៏ប៉ុន្តែចំនួនពិតប្រាកដ នៅមិនទាន់បានដល់ពាក់កណ្តាលនេះនៅឡើយទេ។
ដោះស្រាយវិបត្តិនយោបាយលីបង់ ជារឿងបន្ទាន់៖
ទាក់ទិននិងបញ្ហានយោបាយលីបង់ តាមពិតទៅខាងវិមានប្រធានាធិបតីបារាំង មានការប្រុងប្រយ័ត្នណាស់ ព្រោះមិនចង់រងពាក្យរិះគន់។ ព្រោះអី្វ ព្រោះថាគេអាចរិះគន់ថា លោកហ្វ្រង់ស័រ ហូរឡង់ ចង់ទៅជួយដោះស្រាយវិបត្តិនយោបាយនៅស្រុកគេ ទាំងខ្លួនឯងនៅបារាំងឯនេះវិបត្តិនៅរុំកោះ ប្រជាប្រិយភាពធ្លាក់ចុះលែងមានអ្នកណាគាំទ្រ បែរជាចង់ទៅផ្តល់មេរៀនឲ្យលីបង់ទៀត។ កន្លែងនេះហើយ ដែលធ្វើឲ្យលោកហ្វ្រង់ស័រ ហូឡង់មិនសូវជាមានគោលជំហរច្បាស់លាស់ទេ ក្នុងវិបត្តិនយោបាយលីបង់។
គោលជំហរមិនច្បាស់លាស់នេះ ត្រូវបានលោកប្រធានាធិបតីបារាំង ដែលបានជួបសន្ទនាជាមួយនាយករដ្ឋមន្ត្រីលីបង់ លោក តាំម៉ាំ សាឡាម អះអាងថា បារាំងមិនកាន់ជើងភាគីណា បក្សណានោះទេ។ បញ្ហាចំបងគឺស្ថិរភាព និងការបង្រួបបង្រួមជាតិលីបង់។ លោកហ្រ្វង់ស័រ ហូឡង់មានប្រសាសន៍ថា ជិត២ឆ្នាំហើយ ដែលលីបង់ និយាយគ្នាមិនត្រូវ មិនអាចតែងតាំងប្រធានាធិបតីបាន។ បញ្ហានេះ មិនអាចបន្តនៅអូសបន្លាយទៀតបានទេ ព្រោះលីបង់កំពុងតែរុំព័ទ្ធដោយវិបត្តិ ជាពិសេសគឺចលនាភេរវកម្មអ៊ីស្លាមជ្រុលនិយម។ ដូច្នេះលីបង់ ត្រូវការឲ្យមានរដ្ឋាភិបាលមួយរឹងមាំ មានអំណាចកណ្តាលជន្ទោល និងត្រូវការស្ថាប័នធំៗរបស់រដ្ឋមានកំលាំង ធ្វើការមានប្រសិទ្ធិភាព។
អ្វីដែលលោកហ្រ្វង់ស័រ ហូឡង់ បានសន្យាជាមួយលីបង់ គឺលោកនឹងប្រើតួនាទីបារាំង នៅក្នុងក្រុមប្រឹក្សាសន្តិសុខអង្គការសហប្រជាជាតិ ដើម្បីធ្វើការដឹកនាំក្រុមចំរុះមួយដែលត្រូវបានបង្កើតឡើងក្នុងគោលដៅដោះស្រាយវិបតិ្តលីបង់។ ក្រុមចំរុះនេះ ស្ថិតក្នុងក្របខណ្ឌអង្គការសហប្រជាជាតិ ជាមួយនឹងសហព័ន្ធប្រទេសអារ៉ាប់ ជាមិត្តជាមួយលីបង់។ ស្ថិតក្នុងកម្មវត្ថុនេះ លោក ហ្សង់ម៉ាក អេរ៉ូ រដ្ឋមន្ត្រីការបរទេសបារាំង និងអញ្ជើញទៅប្រទេសលីបង់ នៅថ្ងៃទី២៧ឧសភា ខាងមុខនេះ ដើម្បីចាប់ផ្តើមផ្តល់សន្ទុះដល់ការចរចានយោបាយ ជាមួយភាគីលីបង់ទាំងអស់។
ជំនួយយោធា៖
រ៉ាប៊ីសាអូឌីត ដោយខឹងនឹងពួកហេសបូឡាលីបង់ ដែលចូលរួមជាមួយអ៊ីរ៉ង់ ក្នុងសង្រ្គាមនៅស៊ីរី បានសម្រេចផ្អាកជំនួយយោធាដែលមានទឹកប្រាក់ប្រមាណជាជិត៣ពាន់លានអឺរ៉ូ។ ជំនួយយោធានេះ គឺអារ៉ាប៊ីសាអូឌីត កុម្មង់ទិញពីបារាំង យកទៅជួយលីបង់។ យ៉ាងណាក៏ដោយ នេះគ្រាន់តែជាការផ្អាក ហើយកិច្ចសន្យានៅមិនទាន់លុបចោលទេ។ បញ្ហាចោទគឺថាគេមិនដឹងថាអាវុធដែលកុម្មង់ទិញ មិនដឹងជាធ្លាក់ទៅក្នុងដៃអ្នកណាទេ។
បញ្ហាយោធាលីបង់គឺស្មុគស្មាញ ដោយសារតែមានកងទ័ពសេរីលីបង់ផង មានកងទ័ពហេសបូឡាលីបង់ផង។ ទាំងពីរនេះមាននិន្នកានយោបាយខុសគ្នា ហើយដែលជាប្រភពនៃភាពតានតឹងនយោបាយ។ វិស័យកងទ័ពលីបង់ ត្រូវការជំនួយបន្ទាន់ ដើម្បីឲ្យកងទ័ពនេះ អាចមានលទ្ធភាពទប់ក្រុមឧទ្ទាមជីហាដអង្គការរដ្ឋអ៊ីស្លាម។
រដ្ឋាភិបាលបារាំង មិនបានបញ្ជាក់លំអិត អំពីកម្មវិធីជំនួយផ្នែកយោធាឲ្យលីបង់ទេ។ អ្វីដែលលោកហ្រ្វង់ស័រ ហូឡង់បានប្រកាស គឺគ្រាន់តែបាននិយាយថា បារាំងនឹងព្យាយាមរកវិធីជួយលីបង់ ក្នុងវិស័យយោធា និងកងអាវុធហត្ថ។ តាមការបញ្ជាក់ លោករដ្ឋមន្ត្រីការពារជាតិបារាំង និងធ្វើការពិភាក្សាជាមួយរដ្ឋមន្ត្រីការពារជាតិលីបង់ ដើម្បីស្វែងយល់ពីតំរូវការបន្ទាន់ របស់កងទ័ពសេរីលីបង់ មិនថាក្នុងវិស័យហ្វឹកហាត់ សម្ភារៈ រឺវិស័យទិន្ន័យយោធាជាដើម។ បន្ទាប់មក បារាំងនឹងសម្រេច ថាត្រូវជួយតាមវិធីណា ផ្នែកណា។ ក្រៅពីនេះ លោកហ្រ្វង់ស័រ ហូឡង់ បានប្រកាសផងដែរ ថាបារាំងនឹងបន្តរក្សាកងកម្លាំងពិសេសរបស់បារាំង ចំនួន៩០០នាក់ ដែលឈរជើងនៅលើបង់ក្នុងបេសកកម្មរបស់អង្គការសហប្រជាជាតិ ឲ្យនៅដដែល។
យ៉ាងណាក៏ដោយ យើងសង្ឃឹមថា អន្តរាគមន៍របស់បារាំង នៅលីបង់នឹងអាចហុចផលល្អ សម្រាប់លីបង់ និងតំបន់ដើមបូពា ហើយជាពិសេស សម្រាប់ប្រជាប្រិយភាពលោកហ្វ្រង់ស័រ ហូឡង់ផ្ទាល់តែម្តង។ ព្រោះបើនិយាយពីបញ្ហាក្នុងស្រុក គឺថា៤ឆ្នាំមកនេះលោកហូឡង់ បរាជ័យសឹងតែគ្រប់វិស័យតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ