អានតួអត្ថបទ
យេម៉ែន

យេម៉ែន៖ ​ស្លាប់​ប្រជាជន​ស្លូតត្រង់​៦៨​នាក់ ​ក្នុង​ថ្ងៃ​តែមួយ ​ក្រោម​គ្រាប់បែក​អារ៉ាប៊ីសាអូឌីត​២គ្រាប់

យ៉ាងហោចណាស់​ មានការទំលាក់គ្រាប់បែក ២កន្លែង​នៅយេម៉ែន​ ដោយកងទ័ពអារ៉ាប៊ីសាអូឌីត​ កាលពីថ្ងៃទី២៨ ធ្នូ ម្សិលមិញ ដោយបានផ្តាច់ជីវិតប្រជាជនយេម៉ែនស្លូតត្រង់ សរុប​ប្រមាណ៦៨នាក់។ មន្ត្រីទទួលបន្ទុកកិច្ចការមនុស្សធម៌ របស់អង្គការសហប្រជាជាតិ បានថ្លែងថ្កោលទោស ភាគីទាំងសងខាង នៃសង្រ្គាមនៅយេម៉ែន​ ថាមិនបានផ្តល់អាទិភាពដល់អាយុជីវិត របស់ប្រជាជនស្លូតត្រង់ទេ។ ក្រៅពីស្លាប់ ដោយសារគ្រាប់បែក របស់អារ៉ាប៊ីសាអូឌីត ប្រជាជនយេម៉ែនរាប់លាននាក់ កំពុងប្រឈមមុខនឹង ជំងឺអាសន្នរោគ និងគ្រោះទុរភិក្ខ យ៉ាងធ្ងន់ធរ។

គ្រាប់បែក​អារ៉ាប៊ីសាអូឌីត ទំលាក់​នៅ​ក្រុង​សាណា ថ្ងៃទី​​២៥ ​សីហា ​២០១៧ (រូបភាពឯកសារ)
គ្រាប់បែក​អារ៉ាប៊ីសាអូឌីត ទំលាក់​នៅ​ក្រុង​សាណា ថ្ងៃទី​​២៥ ​សីហា ​២០១៧ (រូបភាពឯកសារ) REUTERS/Khaled Abdullah
ផ្សាយពាណិជ្ជកម្ម

គ្រាប់បែកទីមួយ ត្រូវបានកងទ័ពអាកាសរបស់អារ៉ាប៊ីសាអូឌីត ទំលាក់ពីលើទីប្រជុំជនផ្សារមួយកន្លែង ក្នុងខេត Taëz ភាគនិរតីយេម៉ែន ដោយបានបណ្តាលឲ្យស្លាប់មនុស្ស ៥៤នាក់ សុទ្ធសឹងតែជាប្រជាជនស៊ីវីល ក្នុងចំណោមនោះមាន៨នាក់ ជាកុមារ។ ចំណែកគ្រាប់បែកទី២ របស់អារ៉ាប៊ីសាអូឌីត ដដែល ត្រូវគេទំលាក់នៅខេត្ត Hodeida  ជាប់មាត់សមុទ្រក្រហម បណ្តាលឲ្យស្លាប់មនុស្ស១៤នាក់។ នេះបើតាមការប្រកាសឲ្យដឹង ពីសំណាល់ លោក Jamie McGoldrick អ្នកសម្របសម្រួលកិច្ចការមនុស្សធម៌របស់អង្គការសហប្រជាជាតិ ប្រចាំនៅយេម៉ែន។

មន្ត្រីអង្គការសហប្រជាជាតិរូបនេះ បានថ្លែងថា វាជារឿងដ៏សោកសង្រេងបំផុត ដោយឃើញភាគីទាំងពីរនៃជំលោះនៅយេម៉ែន​ មិនថាក្រុមហ៊ូទី ឬអារ៉ាប៊ីសាអូឌីតេទេ ម្នាក់ៗ គ្មាននរណាខ្វាយខ្វល់ ពីអាយុជីវិតរបស់ប្រជាជនយេម៉ែនស្លូតត្រង់ឡើយ។ ការទំលាក់គ្រាប់បែក ពីសំណាក់កងទ័ពអារ៉ាប៊ីសាអូឌីត មកលើទីផ្សារ ទីប្រជុំជន ដែលសំបូរសុទ្ធតែជាប្រជាជនស្លូតត្រង់ បានបង្ហាញឲ្យឃើញច្បាស់ថា អារ៉ាប៊ីសាអូឌីត មិនបានផ្តល់តំលៃដល់អាយុជីវិត ជនជាតិយេម៉ែន សូម្បីតែបន្តិច។

គួរបញ្ជាក់ថា ចាប់តាំងពីក្រុមឧទ្ទាមហ៊ូទី បានបាញ់គ្រាប់មីស៊ីលថ្មីមួយទៀត កាលពីថ្ងៃទី ១៩ធ្នូ សំដៅកំទេចទីក្រុងរីយ៉ាដ  កងទ័ពអារ៉ាប៊ីសាអូឌីត បានបន្ថែមការវាយប្រហារកាន់តែញឹកញាប់ ទៅលើដែនដីយេម៉ែន ​ដែលគ្រប់គ្រង ដោយក្រុមឧទ្ទាមហ៊ូទី។ ក្រៅពីជនរងគ្រោះស្លាប់ ទាំង៦៨នាក់ ក្នុងថ្ងៃព្រហស្បតិ៍ទី ២៨ធ្នូនេះ នៅមានប្រជាជនស្លូតត្រង់ ៤១នាក់ផ្សេងទៀត ដែលបានស្លាប់ ក្នុងរវាង១០ថ្ងៃចុងក្រោយនេះ ដោយសារតែគ្រាប់បែក របស់អារ៉ាប៊ីសាអូឌីត។

សង្រ្គាមយេម៉ែន ដែលធាតុពិត គឺជាសង្រ្គាមប្រជែងឥទ្ធិពលនៅឧបទ្វីបអារ៉ាប៊ី រវាងអារ៉ាប៊ីសាអូឌីត​ និងអ៊ីរ៉ង់​​នោះ បានចាប់ផ្តើមឡើងអស់ជាង៣ឆ្នាំមកហើយ ហើយបានផ្តាច់ជីវិតមនុស្សជិត១ម៉ឺននាក់។ បច្ចុប្បន្នអង្គការមនុស្សធម៌ជាច្រើន បានទាញសញ្ញាអាសន្ន ម្តងហើយម្តងទៀត ថាប្រជាជនយេម៉ែន កំពុងប្រឈមមុខនឹងជំងឺអាសន្នរោគ ព្រមទាំងគ្រោះទុរភិក្ខ ដោយសារតែអារ៉ាប៊ីសាអូឌីត បានឡោមព័ទ្ធ បិទច្រកព្រំដែនទាំងស្រុង។ យ៉ាងណាមិញ កាលពីថ្ងៃពុធ កន្លងទៅនេះ លោកប្រធានាធិបតីបារាំង បានអំពាវនាវ ឲ្យអារ៉ាប៊ីសាអ៊ូឌីត ត្រូវបញ្ឈប់ជាបន្ទាន់ នូវការឡោមព័ទ្ធយេម៉ែន ហើយត្រូវរៀបចំយន្តការចរចា  ជាមួយនិងក្រុមហ៊ូទីយេម៉ែន ដើម្បីបញ្ចប់សង្រ្គាម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

ចែករំលែក :
រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ