ទីក្រុងបេតិកភណ្ឌប៉ាល់មៀរ ត្រូវបានរំដោះទាំងស្រុងពីដៃពួកជីហាដអ៊ីស្លាម
យោងតាមការរាយការណ៍ របស់ប្រព័ន្ធឃោសនាព័ត៌មានរដ្ឋាភិបាលស៊ីរី គឺនៅថ្ងៃទី២៧មីនានេះ ទីក្រុងបូរាណប៉ាល់មៀរ ដែលមានប្រាសាទបូរាណចំណាស់តាំងពីមុនសតវត្សទីមួយទៀតនោះ ត្រូវបានរំដោះទាំងស្រុងមកវិញហើយ ពីដៃពួកជីហាដអង្គការរដ្ឋអ៊ីស្លាម។ កងទ័ពរដ្ឋាភិបាលស៊ីរី បានធ្វើការវាយសម្រុក ដេញពួកឧទ្ទាមជីហាដអង្គការរដ្ឋអ៊ីស្លាម ដោយមានការជួយអន្តរាគមន៍ពីទាហានអាកាសរបស់រុស្ស៊ី ក្នុងរយៈពេល៣សប្តាហ៍ចុងក្រោយនេះ ដើម្បីដណ្តើមយកទីក្រុងនិម្មិតរូបនេះមកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ទូរទស្សន៍ជាតិស៊ីរី បានផ្សាយថា ទីក្រុងបូរាណប៉ាល់មៀរ បានរំដោះមកវិញទាំងស្រុងហើយ ដោយកងទ័ពរដ្ឋាភិបាលស៊ីរី។ ដោយឡែកក្រុមអ្នកសង្កេតការសិទ្ធិមនុស្ស បានផ្តល់ដំណឹងថា ការប្រយុទ្ធនៅមិនទាន់ស្ងាត់គ្រាប់នៅឡើយទេ ដោយសារគេនៅតែឮសូរសំឡេងបាញ់បោះ នៅភាគខាងកើត តំបន់ប៉ាល់មៀរនៅឡើយ។ តែយ៉ាងណាក៏ដោយ ក្រុមឧទ្ទាមជីហាដអង្គការរដ្ឋអ៊ីស្លាម បានដកថយចេញពីតំបន់នេះស្ទើរតែទាំងអស់ហើយ ដោយពួកវាបានរត់គេចទៅទិសខាងកើត។
យោងតាមប្រសាសន៍លោកRami Abdoulrahman ប្រធានអ្នកសង្កេតការសិទ្ធិមនុស្ស បានឲ្យដឹងថានៅសមរភូមិប៉ាល់មៀរនេះ ពួកជីហាដអង្គការរដ្ឋអ៊ីស្លាម បានស្លាប់មនុស្សអស់៤០០នាក់ ហើយចំណែកកងទ័ពរដ្ឋាភិបាលស៊ីរីវិញ មានស្លាប់ប្រមាណជា១៨០នាក់។ នេះគឺជាការបាត់បង់កម្លាំងដ៏ធំបំផុតមិនធ្លាប់មានទេ សម្រាប់ក្រុមជីហាដអង្គការរដ្ឋអ៊ីស្លាម ដែលបានបាត់បង់កម្លាំងភ្លាមៗ ដល់ទៅ៤០០នាក់ នៅសមរភូមិតែមួយដូច្នេះ។ ជោគជ័យរបស់កងទ័ពរដ្ឋាភិបាលស៊ីរី គឺមួយផ្នែកធំបានមក ដោយសារតែជំនួយទាហានអាកាសរុស្ស៊ី ដែលបានជួយទំលាក់គ្រាប់បែកប្រហែលជា១៥០គ្រាប់ ក្នុងរយៈពេល៣-៤ថ្ងៃចុងក្រោយនេះ។
សូមបញ្ជាក់ថា វាសនាទីក្រុងប៉ាល់មៀរ ត្រូវបានគេព្រួយបារម្ភជាខ្លាំងនៅពេលដែលទីក្រុងបូរាណនេះ ត្រូវបានក្រុមជីហាដអង្គការរដ្ឋអ៊ីស្លាមវាយយកបាន កាលពីខែឧសភា ឆ្នាំ២០១៥។ ទីក្រុងនេះ មានប្រាសាទបូរាណជាច្រើន តាមបែបរចនាបទក្រិក រ៉ូម៉ាំង ដែលមានចំណាស់ជាច្រើនសតវត្សមុនគ្រឹស្តសករាជទៅទៀត។ ទៅក្រុងនេះ ត្រូវបានចាត់បញ្ចូលជាសម្បតិ្តបេតិកភណ្ឌមនុស្សជាតិ ដោយអង្គការយូណេស្កូផងដែរ។ ការបាញ់ផ្លោង ទំលាក់គ្រាប់បែក រួមទាំងការគាស់កកាយ យករូបចម្លាក់ទៅលក់ដោយខុសច្បាប់ បានបំផ្លាញទីក្រុងនេះយ៉ាងដំណំ។
ក្រៅពីមានតំលៃជានិម្មិតរូប ការកាន់កាប់ទីក្រុងនេះឡើងវិញ ក៏គឺជាយុទ្ធសាស្ត្ររបស់កងទ័ពរដ្ឋាភិបាលបាស្ហា អាល់អាសាដ។ តាមរយៈការយកឈ្នះពេលនេះ រដ្ឋាភិបាលស៊ីរីចង់បង្ហាញថា មានតែកងកម្លាំងខ្លួនមួយគត់ដែលសហគមន៍អន្តរជាតិអាចទុកចិត្តបាន ដើម្បីធ្វើការប្រយុទ្ធយកឈ្នះទៅលើក្រុមជីហាដអង្គការរដ្ឋអ៊ីស្លាម។ ហេតុផលនេះ នឹងជួយឲ្យគេបន្ធូរបន្ថយ មិនសូវកៀបសង្កត់លើប្រធានាធិបតីបាស្ហា អាល់អាសាដ នៅក្នុងតុចរចាសន្តិភាពនៅឯក្រុងហ្សឺណែវ។
ជាការពិតណាស់ ក្នុងរយៈពេលប៉ុន្មានសប្តាហ៍ចុងក្រោយនេះ ក្រុមជីហាដអង្គការរដ្ឋអ៊ីស្លាមបានបាត់បង់ទឹកដីជាច្រើន ហើយកំពុងឈានទៅបាត់បង់តំបន់មូស៊ូល ដែលជាស្នូលមូលដ្ឋានធំរបស់ពួកវាប្រចាំនៅអ៊ីរ៉ាក់។ កាលពីដើមឆ្នាំនេះដែរ កងទ័ពអ៊ីរ៉ាក់បានវាយដណ្តើមយកវិញ នូវទីក្រុងរ៉ាម៉ាឌី និងទីក្រុងទីគ្រីត។ ចំណែកកាលពីខែកុម្ភៈកន្លងទៅ ទីក្រុងអាល់ ឆាដាឌី ក៏បានធ្លាក់មកក្នុងដៃកងទ័ពរដ្ឋាភិបាលស៊ីរី វិញដែរ។ ទីក្រុងទាំងអស់នេះគឺជាទីក្រុងយុទ្ធសាស្ត្រ ដើម្បីបិទច្រកចេញចូលកាត់ផ្តាច់ទំនាក់ទំនង រវាងតំបន់ មូស៊ូល និងតំបន់រ៉ាកា ទីក្រុងធំរបស់ពួកវានៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ