ស៊ីរី៖ គ្រាប់កាំភ្លើងផ្ទុះឡើងវិញ ខណៈដែលការចរចាសន្តិភាពជុំទី៣ ត្រូវបិទបញ្ចប់
ការចរចាសន្តិភាពដើម្បីស៊ីរី ជុំទីបី ដែលកំពុងប្រព្រឹត្តិទៅនៅក្នុងទីក្រុងហ្សឺណែវ នឹងត្រូវបិទបញ្ចប់នៅថ្ងៃពុធទី២៧មេសានេះហើយ។ លទ្ធផលនៃការចរចាលើកនេះ ហាក់ធ្វើឲ្យភាគីទាំងអស់ បែកបាក់គ្នាកាន់តែលើសមុនទៅទៀត ដោយសារក្រុមប្រឆាំងស៊ីរី បានដកខ្លួនចេញ ផ្អាកការចរចា។ ការធ្វើបែបនេះ ក៏ដោយសារតែនៅសមរភូមិឯណោះ កងទ័ពរដ្ឋាភិបាលស៊ីរី បានធ្វើការទំលាក់គ្រាប់បែកយ៉ាងដំណំ បើទោះបីជាមានការព្រមព្រៀងទម្លាក់អាវុធក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៥
ការចរចាជុំទីបី បិទបញ្ចប់ដោយលទ្ធផលសូន្យ៖
ការចរចាជុំទីបីនេះ គឺបានលទ្ធផលមិនមែនល្អជាងមុនទេ គឺអាក្រក់ជាងមុនទៅទៀត ព្រោះថាឥឡូវភាគីស៊ីរីទាំងអស់និយាយលែងស្តាប់គ្នាហើយ។ ស្ថានភាពនេះ គឺបណ្តាលមកពីស្ថានការណ៍ជាក់ស្តែងនៅឯក្នុងប្រទេសស៊ីរីឯណោះ ដែលកំពុងតែប្រែប្រួល វិលត្រលប់ទៅរកភាពចលាចលឡើងវិញ។
ភាគីទាំងអស់ ដែលមានអាមេរិក និងរុស្ស៊ីជាអ្នកជួយជ្រោមជ្រែង បានសន្យាធ្វើការដាក់អាវុធបណ្តោះអាសន្ន ហើយនាំគ្នាចូលតុចរចា ដោយមានលោកស្តេហ្វាន ដឺមីស្ទូរ៉ា អ្នកតំណាងពិសេស របស់អង្គការសហប្រជាជាតិ ជាអាជ្ញាកណ្តាល។ ការចរចាបានធ្វើទៅបីដងមកហើយ តែជាការចរចាដោយប្រយោល មានន័យថា អង្គការសហប្រជាជាតិ ជាអ្នកនាំពាក្យពីម្ខាងទៅប្រាប់ម្ខាងទៀត ដោយ ភាគីទាំងអស់អត់ចូលតុ និយាយទល់មុខគ្នាទេ។
ប៉ុន្តែចាប់ពីចុងសប្តាហ៍មុននេះ ស្ថានការណ៍នៅស៊ីរី កាន់តែវឹកវរ ដោយសារកងទ័ពរដ្ឋាភិបាលរបស់បាស្ឆា អាល់អាសាដ បានបង្កើនការវាយប្រហារ ទម្លាក់គ្រាប់បែក នៅតំបន់ខេត្តអាឡិប ដែលនេះជាការរំលោភទាំងស្រុង ទៅលើបទឈប់បាញ់បណ្តោះអាសន្ន។ គ្រាន់តែពី រវាងថ្ងៃសុក្រ និងថ្ងៃសៅរ៍ សប្តាហ៍មុននេះ មានមនុស្សស្លាប់ជាង៥០នាក់ ហើយភាគច្រើនជាប្រជាជនសាមញ្ញ។ ការទំលាក់គ្រាប់បែករបស់កងទ័ពរដ្ឋាភិបាលស៊ីរី បានបន្តនៅថ្ងៃអង្គារទី២៦ មេសទៀត ដែលធ្វើឲ្យមានមនុស្សស្លាប់យ៉ាងហោចណាស់ជាង២០នាក់។
មាត់ថាចរចា តែបន្តវាយប្រហារទំលាក់គ្រាប់សម្លាប់ប្រជាជន៖
ក្រុមប្រឆាំងស៊ីរី ដែលពួកគេបានរួមរួមគ្នាបង្កើតជាមួយក្រុម មានឈ្មោះថាគណកម្មាធិការជាន់ខ្ពស់ដើម្បីការចរចា(HCN) បានសម្រេចចិត្តដកខ្លួន សុំផ្អាកការចរចានៅក្រុងហ្សឺណែវ។ ពួកគេធ្វើបែបនេះ ដោយសារតែពួកគេចោទថារដ្ឋាភិបាលបាស្ឆាកំពុងតែលេងខ្សែលើ មាត់ថាចរចា តែដៃចុចបញ្ជារយន្តហោះ ឲ្យទំលាក់គ្រាប់បែកសម្លាប់ប្រជាជនស៊ីរី។ ក្រុមប្រឆាំងនេះ បានទាំងចោទលោកស្តេហ្វាន ដឺមីស្ទូរ៉ា ទៀតផងថា គ្មានសេចក្តីក្លាហានក្នុងការដាក់គំនៀបលើរដ្ឋាភិបាលបាស្ឆា អាល់អាសាដ បណ្តោយឲ្យពួកនេះបន្តរំលោភបទឈប់បាញ់។
សរុបទៅ គឺថា ការចរចាសន្តិភាពជុំទីបីត្រូវបិទនៅថ្ងៃនេះមែន តែតាមពិត វាគ្មានអ្វីទៅមុខ តាំងតែពីថ្ងៃសុក្រម្លេះ បន្ទាប់ពីក្រុមប្រឆាំងបានធ្វើពហិការ។ ដោយឡែក ខាងរដ្ឋាភិបាលស៊ីរី បានជួបជាមួយនឹងលោកស្តេហ្វាន ដឺមីស្ទូរ៉ា នៅថ្ងៃម្សិលមិញ ហើយថាសរុបទៅការចរចាលើកនេះ មានប្រយោជន៍ច្រើនសម្រាប់ពួកគេ។ ជាមួយគ្នានេះ លោកអនុរដ្ឋមន្ត្រីការបរទេសរុស្ស៊ីបានបញ្ជាក់ថា ការចរចាជុំទីបួន នឹងចាប់ផ្តើមធ្វើនៅថ្ងៃទី១០ឧសភាខាងមុខនេះ។
រុស្ស៊ីស្នើអង្គការសហប្រជាជាតិ ឲ្យចាត់ទុកក្រុមប្រឆាំងស៊ីរីពីរក្រុម ទៅជាក្រុមភេរវកម្ម៖
លោកអគ្គរដ្ឋទូតរុស្ស៊ី ប្រចាំនៅអង្គការសហប្រជាជាតិ បានប្រកាសឲ្យដឹងថា រុស្ស៊ីបានដាក់ពាក្យសុំទៅគណកម្មការភេរវកម្ម របស់ក្រុមប្រឹក្សាសន្តិសុខអង្គការសហប្រជាជាតិ ស្នើឲ្យចាត់ក្រុមប្រឆាំងស៊ីរីពីរ ជាក្រុមភេរវកម្ម។ ក្រុមទាំងពីរនេះមានទីមួយ គឺក្រុមឈ្មោះ Ahrar al-Sham និងទីពីរគឺក្រុម Jaïch al-Islam។ រុស្ស៊ីផ្តល់អំណះអំណាងថា ក្រុមទាំងពីរនេះមានទំនាក់ទំនង យ៉ាងជិតស្និទ ជាមួយនឹងក្រុមភេរវកម្មផ្សេងទៀត ដូចជាក្រុមជីហាដអង្គការរដ្ឋអ៊ីស្លាម និងក្រុមអាល់កាយដា។
តាមពិត អ្វីដែលយើងត្រូវដឹង គឺថាភាពស្មុគស្មាញមួយដែលសំខាន់ នៅក្នុងជម្លោះស៊ីរី គឺមកពីមានក្រុមប្រឆាំង ក្រុមឧទ្ទាមហ្នឹង ច្រើនក្រុមពេក។ ហើយក្រុមខ្លះមានការប្រាស្រ័យទាក់ទងគ្នា ជាមួយនឹងក្រុមជីហាដអ៊ីស្លាមជ្រុលនិយមមែន។ ក៏ប៉ុន្តែក្រុមទាំងពីរដែលរុស្ស៊ីចោទនាពេលនេះ គឺជាក្រុមដែលបានចូលរួមក្នុងការចរចាសន្តិភាព នៅហ្សឺណែវ។ ជាក់ស្តែង លោក មហាម៉េដ អាលូឆ ដែលជាបុគ្គលម្នាក់តំណាងឲ្យក្រុមគណកម្មាធិការជាន់ខ្ពស់ដើម្បីការចរចា គឺជាមេដឹកនាំរបស់ក្រុម Jaïch al-Islam នេះឯង។ លោកម្នាក់នេះ ហើយ ដែលបានផ្តើមគំនិតសុំដកខ្លួនពីការចរចាសន្តិភាព ដោយសារតែកងទ័ពរដ្ឋាភិបាលស៊ីរី នៅតែបន្តទម្លាក់គ្រាប់នៅអាឡិប។
យុទ្ធសាស្ត្រ កំចាយក្រុមប្រឆាំងពីកន្លែងចរចា៖
បើយើងវិភាគឲ្យមែនទែន ការស្នើសុំរបស់រុស្ស៊ីនាពេលនេះ គឺមិនខុសពីការវាយបកវិញទៅលើក្រុមប្រឆាំងស៊ីរីទេ។ មិនត្រឹមតែប៉ុណ្ណោះ កាលពីថ្ងៃសៅរ៍កន្លងទៅនេះ មេបញ្ជារការម្នាក់ដ៏សំខាន់របស់ក្រុមAhrar al-Sham ត្រូវបានគេសម្លាប់ក្នុងហេតុការណ៍ភេរវកម្មអត្តឃាត។ យើងមិនទាន់ដឹងថា ខាងណាជាអ្នកបញ្ជារទេ តែយ៉ាងណាក៏ដោយ អ្នកដែលបានផលពីស្ថានការណ៍នេះ គឺរដ្ឋាភិបាល បាស្ឆា អាល់អាសាដ។
យើងឃើញថា ឆ្លៀតពេលដែលការចរចាសន្តិភាពនៅគាំង កងទ័ពរដ្ឋាភិបាលបាស្ឆា បន្ថែមការទម្លាក់គ្រាប់ទៅលើក្រុមឧទ្ទាមប្រឆាំង ឯរុស្សីវិញជួយព្រួតគ្នា ស្នើឲ្យអង្គការសហប្រជាជាតិចាត់ទុកក្រុមប្រឆាំងពីរក្រុម ថាជាក្រុមភេរវកម្មទៀត។ នេះ គឺជាយុទ្ធសាស្ត្រ របស់ប្រធានាធិបតីបាស្ឆា និងរុស្សី ក្នុងការកាច់ដៃកាច់ជើងក្រុមប្រឆាំង មិនឲ្យងើបបាន។
ចង់ឲ្យក្រុមប្រឆាំងស៊ីរីទាំងអស់រួមគ្នាតែមួយក្នុងការចរចា ជារឿងពិបាក៖
ក្រុមប្រឆាំងនិមួយៗ មានគោលជំហររឹងរូសណាស់ ហើយអ្នកដែលនៅពីក្រោយខ្នង ក៏ខុសៗគ្នាទៀត។ តាមពិតទៅ អ្នកដែលទាមទារសុំឲ្យក្រុមប្រឆាំងទាំងអស់ចាប់ដៃគ្នាបង្កើតក្រុមតែមួយនេះ គឺជាក្រុមដែលមាននិន្នការកណ្តាលនិយម រឺអាចហៅម្យ៉ាងទៀតថា ក្រុមដែលមិនសូវជាប្រឆាំងខ្លាំងក្លាជាមួយប្រធានាធិបតីបាស្ឆាទេ។ ក្រុមនេះ មានការគាំទ្រពីរុស្ស៊ី និងអេហ្ស៊ីប ហើយរដ្ឋាភិបាលស៊ីរី ក៏មិនសូវជាស្អប់ក្រុមនេះ ណាស់ណាដែរ។
បើតាមអ្នកវិភាគខ្លះ គេយល់ថាក្រុមនេះ អាចជាកូនអុករបស់រដ្ឋាភិបាលបាស្ឆាផងក៏មិនដឹង។ កន្លងមកក្នុងការចរចា ក្រុមនេះមិនបានកំណត់លក្ខខណ្ឌបឋមដាច់អហង្ការ ថាត្រូវតែប្រធានាធិបតីបាស្ឆា ចុះចេញពីតំណែងទេ។ ផ្ទុយពីក្រុមប្រឆាំងដែលមានឈ្មោះថា គណកម្មាធិការជាន់ខ្ពស់ដើម្បីការចរចា ដែលមានការគាំទ្រពីអាមេរិក និងបារាំង ដែលពួកគេទាមទារថា ប្រធានាធិបតីបាស្ឆា ត្រូវតែចុះចេញពីតំណែង មុននឹងបើកឲ្យមានសម័យអន្តរកាល។
សរុបទៅសរុបមក យើងឃើញថា អ្វីដែលរដ្ឋាភិបាលបាស្ឆា និងរុស្ស៊ីព្យាយាមធ្វើ គឺធ្វើយ៉ាងណា កំចាយក្រុមដែលប្រឆាំងខ្លាំង ពោលគឺក្រុមដែលទាមទារឲ្យប្រធានាធិបតីបាស្ឆាចុះចេញពីតំណែង ហើយទន្ទឹមគ្នានេះ គេរុញក្រុមប្រឆាំងកណ្តាលនិយម ឲ្យប្រមែលប្រមូលគ្នា ធ្វើជាក្រុមប្រឆាំងតែមួយដើម្បីចរចា។
យ៉ាងណាក៏ដោយ ស្ថានការណ៍ទាំងអស់នេះ គឺអ្វីៗរំពឹងទាំងស្រុងទៅលើភាពម្ចាស់ការ ឥតលម្អៀង និងថ្លឹងថ្លែងរបស់លោកស្តេហ្វាន ដឺមីស្ទូរ៉ា ដែលជាអ្នកតំណាងឲ្យអង្គការសហប្រជាជាតិ។ បើសិនជាក្រុមឧទ្ទាមប្រឆាំង យល់ថាគេកំពុងតែបោកប្រាស់ខ្លួន ហើយអង្គការសហប្រជាជាតិភ្នែកស ជឿតាមរុស្ស៊ីនិងបាស្ឆាទៀត មានន័យថាក្រុមឧទ្ទាម នឹងត្រលប់ទៅកាន់អាវុធវិញជាមិនខានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ