ស៊ីរី៖ បទឈប់បាញ់បណ្តោះអាសន្នចូលជាធរមាន តែគ្រប់គ្នានៅមិនទុកចិត្តរុស្ស៊ី
ថ្ងៃព្រហស្បតិ៍ទី២០ តុលានេះ បទឈប់បាញ់បណ្តោះអាសន្ននៅសមរភូមិអាឡិប ភាគខាងជើងស៊ីរី ដែលកងទ័ពរុស្ស៊ី និងកងទ័ពរដ្ឋាភិបាលស៊ីរី ទទួលយល់ព្រមអនុវត្តនោះ ត្រូវចូលជាធរមានហើយ។ ការផ្អាកការប្រយុទ្ធបណ្តោះអាសន្ននេះ គឺធ្វើឡើងដោយមានការស្នើសុំពីសហគមអន្តរជាតិ ដើម្បីរំដោះប្រជាជនស្លូតត្រង់ អ្នករបួស និងក្រុមឧទ្ទាមស៊ីរីណា ដែលមានបំណងចេញពីតំបន់អាឡិប។ យ៉ាងណាក៏ដោយ តាមប្រភពព័ត៌មាន សំឡេងកាំភ្លើងនៅតែបន្លឺដដែលនៅតាមច្រករំដោះ ហើយប្រជាជនស៊ីរី នៅតែមិនទុកចិត្តពីភាពស្មោះត្រង់របស់រុស្ស៊ី និងកងទ័ពរដ្ឋាភិបាលបាឆ្ហា អាល់អាសាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ច្រករំដោះចំនួន៨កន្លែង ជុំវិញភាគខាងកើតក្រុងអាឡិប ត្រូវបានព្រមព្រៀងគ្នាឲ្យបង្កើត ដើម្បីរំដោះប្រជាជន អ្នករបួស និងក្រុមឧទ្ទាម។ ហើយតាមរយៈច្រកទាំងនេះផងដែរ ដែលអង្គការមនុស្សធម៌ និងអង្គការសហប្រជាជាតិត្រូវការ ដើម្បីដឹកស្បៀងអាហារ និងសំភារៈទៅជួយប្រជាជនប្រមាណជា២ម៉ឺន៥ពាន់នាក់ ដែលនៅជាប់គាំងក្នុងទីក្រុងអាឡិប។
រដ្ឋាភិបាលស៊ីរី និងកងទ័ពរុស្ស៊ីបានយល់ព្រមបើកច្រកទាំងនេះ ហើយបានសន្យាគោរព ដោយផ្អាកការប្រយុទ្ធបណ្តោះអាសន្ន។ យ៉ាងណាមិញ ពីរថ្ងៃមកនេះ រុស្ស៊ីបានផ្អាកការទំលាក់គ្រាប់បែក ពីលើក្រុងអាឡិប។ តែបើយោងតាមប្រភព ពីអ្នកយកព័ត៌មានបារាំង ដែលប្រចាំការនៅទីនោះ ថ្មីបើបទឈប់បាញ់បានចូលជាធរមាន កាលពីម៉ោង៨ព្រឹកថ្ងៃព្រហស្បតិ៍នេះក៏ដោយ តែគេនៅតែឮសំឡេងកាំភ្លើងដដែលនៅច្រកBoustane al-Qasr។ ខាងរដ្ឋាភិបាលស៊ីរី បានចោទថាក្រុមឧទ្ទាម ជាអ្នកចាប់ផ្តើមបាញ់មុន។
តាមការគ្រោងទុក បទឈប់បាញ់នេះ មានរយៈពេល៣ថ្ងៃ គិតចាប់ពីថ្ងៃព្រហស្បតិ៍ទី ២០តុលានេះទៅ។ យ៉ាងណាក៏ដោយ ភាពស្រពិចស្រពិល ស្តីពីការគោរពបទឈប់បាញ់នេះនៅតែមាន។ តាមការឲ្យដឹងពីភាគីរុស្ស៊ី ការទំលាក់អាវុធបណ្តោះអាសន្ននេះ មានរយៈពេល៣ថ្ងៃ ហើយមួយថ្ងៃៗមានរយៈពេល១១ម៉ោង ពោលគឺពីម៉ោង៨ព្រឹក រហូតដល់ម៉ោង៧ល្ងាច។ ក៏ប៉ុន្តែកងទ័ពរដ្ឋាភិបាលស៊ីរីវិញ បានអះអាងថា ការទំលាក់អាវុធគឺធ្វើឡើងបីថ្ងែ តែមួយថ្ងៃតែ៨ម៉ោងទេ គឺពីម៉ោង៨ព្រឹក ដល់ម៉ោង៤រសៀល។
ប្រជាជននៅតំបន់អាឡិបមួយភាគធំ បានឆ្លើយទៅកាន់អ្នកយកព័ត៌មានថា ពួកគេមិនទុកចិត្តរុស្ស៊ី និងកងទ័ពរដ្ឋាភិបាលបាឆ្ហា អាល់ អាសាដទេ។ ថ្មីបើពួកគេមានការលំបាកខ្លាំង ដោយត្រូវជាប់គាំងក្នុងទីក្រុងអាឡិប តែពួកគេនៅតែមិនហ៊ានប្រថុយជីវិត ធ្វើដំណើរឆ្លងកាត់ច្រករំដោះ ដែលរុស្ស៊ី និងកងទ័ពរដ្ឋាភិបាលស៊ីរី បើកឲ្យដែរ។ មួយវិញទៀត វាក៏មិនមែនជាលើកទីមួយទេ ដែលរុស្ស៊ី និងកងទ័ពបាឆ្ហា បានក្បត់សំដីខ្លួនឯង សន្យាថាផ្អាកការប្រយុទ្ធ តែមិនទាន់បានប៉ុន្មានម៉ោងផង ក៏ឆ្មក់ឱកាសទំលាក់គ្រាប់ពីលើក្បួនធ្វើដំណើររបស់ប្រជាជន ដោយយកលេសថាកម្ទេចក្រុមភេរវកម្ម។
សូមបញ្ជាក់ថា កាលពីថ្ងៃពុធម្សិលមិញនេះ លោកពូទីន ប្រធានាធិបតីរុស្ស៊ី បានមកជួបប្រជុំជាមួយលោកហ្វ្រង់ស័រ ហូឡង់ និងលោកស្រីអង់ហ្គេឡា មែគែល នៅទីក្រុងប៊ែកឡាំង ហើយបានសន្យាថានឹងពន្យាបទឈប់បាញ់នេះបន្តទៀត បើសិនជាចាំបាច់។ ប្រធានាធិបតីបារាំង និងលោកស្រីអធិកាបតីអាល្លឺម៉ង់ បានសង្កត់ធ្ងន់ពីគោលបំណងដាក់សំពាធលើរុស្ស៊ី ឲ្យគោរពសម្តីខ្លួន ឲ្យខាងតែបាន ពុំនោះទេ សហភាពអឺរ៉ុបនឹងលៃលករកវិធីដាក់ទណ្ឌកម្មលើរុស្ស៊ី ពីបទឧក្រិដ្ឋកម្មសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ