ប្រធានាធិបតីអេហ្ស៊ីប ចុះហត្ថលេខា ប្រគល់កូនកោះពីរ ជូនអារ៉ាប៊ីសាអូឌីត
លោក ហ្វាតាហ អាល់ស៊ីស៊ី ប្រធានាធិបតីអេហ្ស៊ីប បានចុះហត្ថលេខា កាលពីថ្ងៃសៅរ៍ទី ២៤ មិថុនា ផ្តល់សច្ចាប័ន ទៅដល់កិច្ចព្រមព្រៀងកំណត់ព្រំដែនទឹក រវាងអេហ្ស៊ីប និងអារ៉ាប៊ីសាអូឌីត ដែលបានចុះហត្ថលេខាកាលពីខែមេសា ឆ្នាំ២០១៦។ តាមរយៈកិច្ចព្រមព្រៀងនេះ អេហ្ស៊ីបសុខចិត្តប្រគល់កូនកោះពីរ ក្នុងសមុទ្រក្រហម ទៅឲ្យអារ៉ាប៊ីសាអូឌីត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
មួយសប្តាហ៍ក្រោយ ពេលសភាអេហ្ស៊ីបបានបោះឆ្នោតផ្តល់សច្ចាប័ន លោក ហ្វាតាហ អាល់ស៊ីស៊ី បានចុះហត្ថលេខា កាលពីថ្ងៃទី២៤ មិថុនា លើកិច្ចព្រមព្រៀងកំណត់ព្រំដែនទឹកជាមួយ អារ៉ាប៊ីសាអូឌីត។ លោកប្រធានាធិបតីអេហ្ស៊ីប បានឆក់ឱកាស ដែលប្រជាជនអេហ្ស៊ីបត្រូវឈប់សំរាក អបអរការបិទបញ្ចប់បុណ្យបួសអ៊ីស្លាម ដើម្បីបញ្ចៀសការធ្វើបាតុកម្មតវ៉ា។
គេនៅចាំបាន កាលពីខែមេសា ឆ្នាំ២០១៦ នៅ ពេលប្រទេសទាំងពីរ បានសម្រេចចុះកិច្ចព្រមព្រៀងនេះ ប្រជាជនអេហ្ស៊ីបរាប់ពាន់នាក់ បានចុះផ្លូវ ធ្វើបាតុកម្មតវ៉ា ចំពោះការដែលអេហ្ស៊ីប សុខចិត្តបាត់បង់បូរណភាពទឹកដី។ យោងតាមកិច្ចព្រមព្រៀងនេះ អេហ្ស៊ីប ត្រូវប្រគល់កោះពីរ នៅក្នុងសមុទ្រក្រហម គឺកោះ ទីរ៉ាន់(Tiran) និងកោះសាណាហ្វៀរ (Sanafir) ទៅឲ្យអារ៉ាប៊ីសាអូឌីត។
សូមបញ្ជាក់ថា កិច្ចព្រមព្រៀងយល់ព្រមបាត់បង់ទឹកដីនេះ បានឆ្លងកាត់ភាពចំរូងចំរាស់ផ្លូវច្បាប់ តាំងតែពីដំបូងនៅអេហ្ស៊ីប។ កាលពីខែមករា ឆ្នាំ២០១៧នេះ តុលាការរដ្ឋបាលកំពូលអេហ្ស៊ីប បានបដិសេធកិច្ចព្រមព្រៀងនេះ ដោយបានលើកឡើងថា កោះទាំងពីរមានប្រវត្តិ និងភូមិសាស្ត្រ ស្ថិតក្នុងដែនអធិបតេយ្យភាពរបស់អេហ្ស៊ីប។ ក្រោយមករដ្ឋាភិបាលអេហ្ស៊ីប បានរិះរកវិធីគ្រប់យ៉ាង ដើម្បីលប់ចោលសាលក្រមនេះ តាមរយៈការដាក់ពាក្យប្តឹង ទៅតុលាការធម្មនុញ្ញ។
នៅដើមសប្តាហ៍នេះ តុលាការធម្មនុញ្ញ បានសម្រេច ព្យួរទុកនូវរាល់សេចក្តីសម្រេចដែលមានពីមុន។ តែទោះយ៉ាងណា បញ្ហានេះ នៅមិនទាន់ដាច់ស្រេច នៅឡើយទេ ដោយសារ គេកំពុងរងចាំ ឲ្យតុលាការធម្មនុញ្ញ សម្រេចថាតើកិច្ចព្រមព្រៀងនេះ ធ្វើឲ្យប៉ះពាល់ដល់អធិបតេយ្យភាពអេហ្ស៊ីប ឬយ៉ាងណា ឬមួយក៏រដ្ឋាភិបាល ត្រូវធ្វើប្រជាមតិ សួរចិត្តប្រជាជនអេហ្ស៊ីប។
គួរកត់សំគាល់ដែរថា ការព្យាយាមមានះ របស់លោកប្រធានាធិបតី អាល់ស៊ីស៊ី ក្នុងការចុះហត្ថលេខាប្រគល់កោះទៅឲ្យអារ៉ាប៊ីសាអូឌីត នេះ ត្រូវបានគេរិះគន់ជាខ្លាំង ទាំងបណ្តាញព័ត៌មាន ទាំងអ្នកនយោបាយ សូម្បីតែពីសំណាក់មន្ត្រីរដ្ឋាភិបាល ដែលធ្លាប់ស្និទនិងលោកអាល់ស៊ីស៊ី។ អ្នកនយោបាយខ្លះលើកឡើង ថា លោកអាល់ស៊ីស៊ី ចង់ធ្វើកាដូ ផ្គាប់ផ្គន់ ចិត្តអារ៉ាប៊ីសាអូឌីត ដែលជាអ្នកផ្តល់ប្រាក់កំចី ប្រាក់វិនិយោគច្រើនជាងគេបង្អស់ ដល់អេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ