កងទ័ពអ៊ីរ៉ាក់រំដោះបានក្រុងហ្វាលូចា ពីដៃពួកជីហាដរដ្ឋអ៊ីស្លាម
យោងតាមអ្នកនាំពាក្យកងទ័ពអ៊ីរ៉ាក់ បានបញ្ជាក់ថា នៅថ្ងៃអាទិត្យទី ២៦មិថុនា កងទ័ពរដ្ឋាភិបាលអ៊ីរ៉ាក់ បានវាយដណ្តើមយកក្រុង ហ្វាលូចា មកពីដៃពួកជីហាដអង្គការរដ្ឋអ៊ីស្លាមវិញ។ នេះគឺជាដំណឹងល្អ ដែលបង្ហាញអំពីបរាជ័យកាន់តែធំទៅៗ របស់ពួកជីហាដអង្គការរដ្ឋអ៊ីស្លាម មិនថានៅអ៊ីរ៉ាក់ រឺនៅស៊ីរី។ តែយ៉ាងណាក៏ ការវិលត្រលប់របស់ប្រជាជនស្លូតត្រង់ ទៅកាន់សមរភូមិដែលដណ្តើមបានមកវិញ ត្រូវជួបការលំបាកច្រើន ដោយសារមានសេសសល់អាវុធជាតិផ្ទុះច្រើនពេក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
យោងតាមសម្តីរបស់លោក Sabah Al-Noman អ្នកនាំពាក្យកងទ័ពអ៊ីរ៉ាក់ បានបញ្ជាក់ថា នៅថ្ងៃអាទិត្យម្សិលមិញ កងកម្លាំងប្រឆាំងពួកភេរវកម្មពិសេសរបស់អ៊ីរ៉ាក់ វាយសង្រ្គុបដណ្តើមយកវិញ នូវទីក្រុងហ្វាលូចា Fallouja ដែលស្ថិតនៅភាគខាងលិច។ ទីក្រុងនេះ បានធ្លាក់ទៅក្នុងដៃរបស់ពួកជីហាដអង្គការរដ្ឋអ៊ីស្លាម តាំងពីខែមករា ឆ្នាំ២០១៤ម្លេះ។
អ្នកនាំពាក្យរូបនេះ បានបន្ថែមថា ប្រតិបត្តិការវាយយកក្រុងហ្វាលូចា បានចាប់ផ្តើម កាលពីថ្ងៃទី ២៣ ឧសភា ហើយនៅថ្ងៃចុងក្រោយ នៅតំបន់ Al-Jolan ដែលជាមូលដ្ឋានចុងក្រោយ របស់ពួកជីហាដ គឺកងកម្លាំងអ៊ីរ៉ាក់ បានសម្រុកចូលទៅដោយគ្មានបានបាញ់ សូម្បីតែមួយគ្រាប់ ព្រោះពួកជីហាដបានរត់ផះក្រញ៉ាំ ចេញទៅអស់ទៅហើយ។
យ៉ាងណាក៏ដោយ អ្នកនាំពាក្យក្រុមកុម្ម៉ង់ដូមួយក្រុមទៀតរបស់អ៊ីរ៉ាក់ បានបញ្ជាក់ថា នៅជុំវិញក្រុងហ្វាលូចា នៅមានក្រុមជីហាដសំងំលាក់ខ្លួន ជាច្រើនចំណុច។ យ៉ាងណាមិញ កាលពីថ្ងៃអាទិត្យ កងទ័ពអ៊ីរ៉ាក់បានធ្វើការឆែកឆេរ ប្រជាជនចំនួន២ម៉ឺននាក់ ដែលរត់ចេញពីសមរភូមិហ្វាលូចា ព្រោះខ្លាចមានការបន្លំខ្លួនរបស់ពួកជីហាដអង្គការរដ្ឋអ៊ីស្លាម។ ដោយឡែក ការវិលត្រលប់របស់ប្រជាជនទាំងនេះ ទៅកាន់ផ្ទះសម្បែងវិញ អាចនឹងជួបការលំបាក ដោយសារតែគ្រាប់មីន គ្រាប់ផ្ទុះជាច្រើន ត្រូវបានបង្កៃពាសពេញទីក្រុង។
សូមបញ្ជាក់ថា ចូលមកដល់ពាក់កណ្តាលឆ្នាំ២០១៦នេះ ក្រុមជីហាដអង្គការរដ្ឋអ៊ីស្លាម បានទទួលបរាជ័យជាច្រើនសមរភូមិ។ បន្ទាប់ពីបានបាត់បង់តំបន់ភ្នំស៊ីនចា Sinjar កាលពីខែវិច្ឆិកា ឆ្នាំ២០១៥ ក្រុមនេះបានបរាជ័យ បាត់បង់ក្រុងរ៉ាម៉ាឌី ដែលនៅក្បែររដ្ឋធានីបាដាដ ទៀត កាលពីខែ កុម្ភៈដើមឆ្នាំនេះ។ ដោយឡែក នៅអាហ្វហ្កានីស្ថាន យោងតាមប្រភពពីអាជ្ញាធរនៅភាគខាងកើតប្រទេស បានឲ្យដឹងថា បេសកកម្មកម្ទេចក្រុមជីហាដរបស់កងទ័ពអាហ្វហ្កានីស្ថាន បានសម្លាប់ជនជីហាដចំនួន១៨នាក់ ក្នុងរយៈពេល ពីរថ្ងៃកន្លងមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ