អ៊ីរ៉ាក់៖ បារាំងសន្យាផ្តល់ប្រាក់កម្ចី ៤៣០លានអឺរ៉ូ ដើម្បីស្តារសេដ្ឋកិច្ចអ៊ីរ៉ាក់ឡើងវិញ
រដ្ឋមន្ត្រីការបរទេស និងរដ្ឋមន្ត្រីក្រសួងការពារជាតិបារាំង បានទៅដល់ទីក្រុងបាដាដ កាលពីថ្ងៃសៅរ៍ទី ២៦សីហា។ ក្នុងជំនួបជាមួយនាយករដ្ឋមន្ត្រីអ៊ីរ៉ាក់ នៅរសៀលថ្ងៃសៅរ៍ លោករដ្ឋមន្ត្រីការបរទេសបារាំង បានបញ្ជាក់ថា រដ្ឋាភិបាលបារាំង សន្យាផ្តល់ប្រាក់កម្ចី ចំនួន៤៣០លានអឺរ៉ូ ដើម្បីស្តារសេដ្ឋកិច្ចអ៊ីរ៉ាក់ ឲ្យបានល្អប្រសើរឡើងវិញ។ អ៊ីរ៉ាក់ ដែលត្រូវខ្ទេចខ្ទាំ គ្រប់វិស័យ កំពុងត្រូវការជំនួយ និងការគាំទ្រ ដើម្បីកសាងប្រទេសឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
"បារាំងមានវត្តមានតាំងតែពីដំបូងនៅអ៊ីរ៉ាក់ ដើម្បីជួយជ្រោមជ្រែងកងទ័ពអ៊ីរ៉ាក់ ក្នុងការបោសសម្អាត ក្រុមជីហាតអង្គការរដ្ឋអ៊ីស្លាម។ ដូច្នេះ គ្មានរឿងអ្វី ដែលថាបារាំង ត្រូវអវត្តមាន ក្នុងដំណាក់កាលបន្ទាប់ ដែលជាដំណាក់កាលជួយស្តារ និងកសាងអ៊ីរ៉ាក់ឡើងវិញនោះទេ"។ នេះគឺជាប្រសាសន៍ របស់លោក Jean-Yves le Drian រដ្ឋមន្ត្រីការបរទេសបារាំង ដែលបានទៅដល់ក្រុងបាដាដ អមដំណើរដោយលោកស្រី Florence Parly រដ្ឋមន្ត្រីក្រសួងការពារជាតិបារាំង។
ស្ថិតក្នុងជំនួបជាមួយលោក al-Abadi នាយករដ្ឋមន្ត្រីអ៊ីរ៉ាក់ លោករដ្ឋមន្ត្រីការបរទេសបារាំង បានអះអាងថា រដ្ឋាភិបាលបារាំងសន្យា ផ្តល់ប្រាក់កម្ចី ចំនួន៤៣០លានអឺរ៉ូ ដល់អ៊ីរ៉ាក់។ យោងតាមប្រភពពីក្រសួងការបរទេសបារាំង ប្រាក់កម្ចីនេះ ជាប្រភេទកម្ចីដើម្បីទ្រទ្រង់ហិរញ្ញវត្ថុរដ្ឋ ដូចទៅនឹងកម្ចីរបស់ធនាគារពិភពលោកដែរ។ មានន័យថា រដ្ឋាភិបាលអ៊ីរ៉ាក់ ត្រូវមានកាតព្វកិច្ច ធ្វើកំណែទម្រង់ កាត់បន្ថយអំពើពុករលួយ រៀបចំស្តារឡើងវិញនូវការគ្រប់គ្រងស្ថាប័នរដ្ឋ ប្រព័ន្ធរដ្ឋបាល ក៏ដូចជាប្រើប្រាស់ប្រភពថាមពល ឲ្យមានប្រសិទ្ធិភាពជាដើម។
ដំណើរទៅដល់របស់រដ្ឋមន្ត្រីបារាំង ព្រមទាំងការសន្យាជួយជ្រោមជ្រែងអ៊ីរ៉ាក់នេះ ធ្វើឡើងព្រមពេលជាមួយគ្នា នៅពេលដែលកងទ័ពអ៊ីរ៉ាក់ កំពុងតែសម្រុកវាយដណ្តើមយកទីក្រុង Tal-Afar ពីដៃក្រុមជីហាតអង្គការរដ្ឋអ៊ីស្លាម។ នេះគឺជាជោគជ័យ ដ៏ធំមួយទៀត ក្នុងការបោសសម្អាតក្រុមជីហាតអង្គការរដ្ឋអ៊ីស្លាម បន្ទាប់ពីកងទ័ពអ៊ីរ៉ាក់ បានដណ្តើមយកបានទីក្រុងម៉ូស៊ូល មកវិញ កាលពីខែកក្កដា កន្លងទៅ។
វិនាសដោយសង្រ្គាមច្រើនឆ្នាំមកនេះ សេដ្ឋកិច្ចអ៊ីរ៉ាក់ ត្រូវការការស្តារឡើងវិញទាំងស្រុង។ តម្លៃប្រេងឆៅដែលបានធ្លាក់ចុះខ្លាំង បានធ្វើឲ្យអ៊ីរ៉ាក់ខ្វះចំណូល។ អ៊ីរ៉ាក់ត្រូវការកសាងហេដ្ឋារចនាសម្ព័ន្ធសឹងតែទាំងស្រុង។ តាមការប៉ាន់ស្មាន គេត្រូវការប្រាក់ប្រមាណ ជិត១០០០ ពាន់លានអឺរ៉ូ ដើម្បីកសាងអ៊ីរ៉ាក់។
ការស្តារកសាងអ៊ីរ៉ាក់ មិនមែនធ្វើឡើងតែទៅលើកត្តាសម្ភារៈប៉ុណ្ណោះទេ។ ចំណុចសំខាន់បំផុតមួយទៀតនោះ គឺការកសាង ផ្លូវចិត្ត ធ្វើឲ្យសង្គមអ៊ីរ៉ាក់ មានយុត្តិធម៌ មានការរស់នៅចុះសម្រុង យល់យោគគ្នា រវាងប្រជាជនអ្នកកាន់សាសនាអ៊ីស្លាម និកាយឈីអ៊ីត និងអ្នកកាន់និកាយស៊ុនីត។ ក្រុមស៊ុនីត ដែលធ្លាប់តែរងអំពើអយុត្តិធម៌ អាចនឹងងាយធ្លាក់ទៅតាមការអូសទាញ របស់ពួកជ្រុលនិយម បានយ៉ាងងាយ។ មួយវិញទៀត បញ្ហាអធិបតេយ្យភាពរបស់ដែនដីជនជាតិគួក ក៏អាចចោទជាបញ្ហា ធ្វើឲ្យអ៊ីរ៉ាក់ បែកបាក់សាជាថ្មីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ