អ៊ីរ៉ាក់៖ ម៉ូស៊ូលត្រូវរំដោះបានមកវិញ តែការលំបាក កំពុងរងចាំរដ្ឋាភិបាលអ៊ីរ៉ាក់
ចុះផ្សាយនៅថ្ងៃ៖
ស្តាប់ - ០៦:៥៣
ក្រុងម៉ូស៊ូល ទីក្រុងធំទីពីររបស់អ៊ីរ៉ាក់ ដែលបានធ្លាក់ទៅក្នុងការគ្រប់គ្រង របស់ពួកជីហាតអង្គការរដ្ឋអ៊ីស្លាម ពេលនេះ ទើបតែត្រូវបានរំដោះមកវិញ ដោយកងទ័ពអ៊ីរ៉ាក់ កាលពីថ្ងៃអាទិត្យ ម្សិលមិញ។ ថ្វីបើក្រុមជីហាតអង្គការរដ្ឋអ៊ីស្លាម នៅតែគ្រប់គ្រងដែនដីមួយចំនួនផ្សេងទៀត នៅអ៊ីរ៉ាក់ តែការរំដោះបានម៉ូស៊ូលនេះ គឺជានិម្មិតរូបដ៏សំខាន់ សម្រាប់រដ្ឋាភិបាលអ៊ីរ៉ាក់។ តែទន្ទឹមគ្នានេះ ការលំបាកជាច្រើន កំពុងរងចាំរដ្ឋាភិបាលអ៊ីរ៉ាក់ ក្នុងការរៀបចំកសាងទីក្រុងនេះ និងស្តារឲ្យមានស្ថិរភាពឡើងវិញ ចៀសវៀងការវិលត្រលប់ ធ្លាក់ទៅក្នុងដៃរបស់ក្រុមជីហាត សាជាថ្មី។
និម្មិតរូបនៃជោគជ័យ ទៅលើក្រុមជីហាតអង្គការរដ្ឋអ៊ីស្លាម
ខែមិថុនា ឆ្នាំ២០១៤ ក្រុមជីហាតអង្គការរដ្ឋអ៊ីស្លាម បានវាយដណ្តើមយកទីក្រុងម៉ូស៊ូល ជាមួយនឹងប្រជាជនប្រមាណជា២លាននាក់។ នៅពេលនោះ ដែនដីអ៊ីរ៉ាក់ ១ភាគ៣ ត្រូវស្ថិតនៅក្នុងការគ្រប់គ្រងរបស់ក្រុមជ្រុលនិយមនេះ។ ការវាយរំដោះយកម៉ូស៊ូលមកវិញ គឺជានិម្មិតរូបជោគជ័យមួយដ៏ធំ សម្រាប់អ៊ីរ៉ាក់ ព្រោះថាទីក្រុងនេះ គឺជាទីប្រមូលផ្តុំអំណាច របស់ក្រុមជីហាតអង្គការរដ្ឋអ៊ីស្លាម។ គឺទីនេះហើយ ដែលមេក្លោងជីហាត Abou Bakr Al Baghdadi បានប្រកាសបង្កើតដែនដី កាលីហ្វា ប្រើច្បាប់អាជ្ញាសិកអ៊ីស្លាមជ្រុលនិយម និងផ្សព្វផ្សាយទ្រឹស្តីខ្មៅងងឹតរបស់ពួកនេះ។ បើទោះបី ក្រុមជីហាត នៅតែកាន់កាប់តំបន់ផ្សេងទៀត តែយ៉ាងណា ការបាត់បង់ក្រុងម៉ូស៊ូល នឹងធ្វើឲ្យក្រុមនេះ បាក់កំលាំង និងស្មារតី។
លោកនាយករដ្ឋមន្ត្រីអ៊ីរ៉ាក់ បានធ្វើដំណើរទៅដល់ម៉ូស៊ូលផ្ទាល់តែម្តង ដើម្បីអបអរសាទរជាមួយកងទ័ពអ៊ីរ៉ាក់។ ការអបអរសាទររាំច្រៀង លើកគ្រវីទង់ជាតិអ៊ីរ៉ាក់ មិនមែនមាននៅតែម៉ូស៊ូលទេ សូម្បីតែនៅរដ្ឋធានីបាកដាតឯណោះ ក៏ប្រជាជនមានការត្រេកអរសប្បាយ នឹងជោគជ័យនេះដែរ។ លទ្ធផលនេះ វាបានជំរុញឲ្យប្រជាជនអ៊ីរ៉ាក់ មានសេចក្តីសង្ឃឹម ក្នុងយុទ្ធនាការបោសសំអាត ក្រុមជីហាតជ្រុលនិយមនេះ ឲ្យអស់ពីតំបន់ដើមបូព៌ា។ ដោយឡែក សហគមអន្តរជាតិ ក៏បានផ្ញើរសារអបអរចំពោះកងទ័ពអ៊ីរ៉ាក់ និងកងទ័ពសម្ព័ន្ធមិត្តដែរ។
ជោគជ័យដោយប្រយោល នៃយុទ្ធសាស្ត្ររបស់លោកអូបាម៉ា
កងទ័ពអ៊ីរ៉ាក់តែមួយ មិនអាចវាយឈ្នះទេ គឺត្រូវមានជំនួយពីកងទ័ពសម្ព័ន្ធមិត្ត មានដូចជាកងទ័ពបារាំង និងកងទ័ពអាមេរិក។ ក៏ប៉ុន្តែអ្វីដែលយើងគួរកត់សម្គាល់ គឺថាកងទ័ពសម្ព័ន្ធមិត្ត មិនបានបើកការវាយប្រយុទ្ធនៅលើដីដោយផ្ទាល់ទេ គឺគេជួយទម្លាក់គ្រាប់ ពីខាងលើ និងផ្តល់ជំនួយបច្ចេកទេស។ ការងារធំចំបងបង្អស់ គឺការប្រយុទ្ធនៅលើដី រុលទៅមុខ ម្តងបន្តិចៗ ដែលការងារនេះ គឺកងទ័ពអ៊ីរ៉ាក់ ជាអ្នកធ្វើទាំងស្រុង។ ត្រង់ចំណុចនេះហើយ ដែលគេអបអរសរសើរកងទ័ពអ៊ីរ៉ាក់ ព្រោះបីឆ្នាំមុននេះ ត្រូវគេរិះគន់ ថាគ្មានសមត្ថភាព គ្មានការចាត់ចែងដឹកនាំ ឲ្យបានត្រឹមត្រូវ បណ្តោយឲ្យក្រុមជីហាតដណ្តើមដែនដីអស់១ភាគ៣។
បើយើងវិភាគ ឲ្យបានវែងឆ្ងាយ ការកើនឡើងសមត្ថភាព បានជោគជ័យរបស់កងទ័ពអ៊ីរ៉ាក់នេះ ក៏គឺជាជោគជ័យដោយប្រយោល របស់គោលនយោបាយលោកបារ៉ាក់ អូបាម៉ាដែរ។ នៅពាក់កណ្តាលឆ្នាំ២០១៤ នៅពេលដែលសហរដ្ឋអាមេរិក បានសម្រេចប្រើកំលាំងទ័ព ដើម្បីវាយកំទេចក្រុមជីហាតអង្គការរដ្ឋអ៊ីស្លាម លោកអូបាម៉ា បានដាក់គោលការណ៍មួយ ទៅកាន់ក្រសួងការពារជាតិអាមេរិក ថាកងទ័ពអាមេរិក នឹងមិនធ្វើប្រតិបត្តិការ នៅលើដីដោយផ្ទាល់ទេ គឺធ្វើប្រតិបតិ្តការ តែនៅលើអាកាសតែប៉ុណ្ណោះ។
ធ្វើបែបនេះ ទីមួយគឺកុំឲ្យមានទាហានអាមេរិកស្លាប់ច្រើន ដូចកាលជំនាន់មុន។ មុនឆ្នាំ២០១៤ ទាហានអាមេរិកស្លាប់នៅអ៊ីរ៉ាក់ ដល់ទៅ៣៥០០នាក់ តែបើគិតពីឆ្នាំ២០១៤មក មានទាហានអាមេរិក ស្លាប់តែ១១នាក់ទេ។ ហើយមូលហេតុចំបងមួយទៀត គឺលោកអូបាម៉ា ចង់ឲ្យកងទ័ពរបស់អ៊ីរ៉ាក់ ខ្លួនឯង ធ្វើការហ្វិកហាត់ បង្កើនសមត្ថភាព និងបទពិសោធន៍ប្រយុទ្ធដោយខ្លួនឯង មិនត្រូវរំពឹងលើកងទ័ពអាមេរិកទេ។
គឺក្នុងន័យនេះហើយ ដែលកងទ័ពអាមេរិក បានបញ្ជូនអ្នកជំនាញទៅហ្វឹកហ្វឺនទាំងបច្ចេកទេសប្រយុទ្ធ យុទ្ធសាស្ត្រ និងរបៀបគ្រប់គ្រងសម្ភារៈ ឲ្យដល់កងទ័ពអ៊ីរ៉ាក់។ ក្នុងរយៈពេល៣ឆ្នាំមកនេះ កងទ័ពអ៊ីរ៉ាក់ប្រមាណ១សែននាក់ បានទទួលការហ្វឹកហាត់ បង្កើនសមត្ថភាព។ បច្ចុប្បន្ននេះ មានទាហានអាមេរិក នៅលើដីអ៊ីរ៉ាក់ តែ៥០០០នាក់ទេ ដែលសុទ្ធតែជាអ្នកជំនាញបច្ចេកទេស និងកងទ័ពអាកាស។
គោលបំណងរបស់លោកអូបាម៉ា គឺធ្វើយ៉ាងណា ឲ្យអ៊ីរ៉ាក់ មានកងទ័ពដែលរឹងមាំ មានវិន័យ មានសមត្ថភាព ការពារប្រទេសខ្លួនឯង និងបោសសំអាតបណ្តាញជីហាតភេរវកម្ម ដោយខ្លួនឯង គួរជាទីទុកចិត្តរបស់ប្រជាជន។ អាមេរិក មិនអាចធ្វើអន្តរាគមន៍ជួយ ជារៀងដ៍រាបទេ។ ដូច្នេះ ជោគជ័យដណ្តើមបានម៉ូស៊ូល នាពេលនេះ គឺវាបានបង្ហាញឲ្យឃើញថា គោលការណ៍របស់លោកអូបាម៉ា បានហុចផលវិជ្ជមានពិតមែន។
ការលំបាក ក្នុងការស្ថាបនាស្ថិរភាពម៉ូស៊ូល កំពុងរងចាំរដ្ឋាភិបាលអ៊ីរ៉ាក់
រំដោះម៉ូស៊ូលបានមកវិញហើយ តែអ្វីដែលលំបាក គឺកសាងស្ថាបនាទីក្រុងនេះឡើងវិញ។ ការកសាងម៉ូស៊ូល ត្រូវចាប់ផ្តើមជាចាំបាច់ តាមរយៈការសាងសង់សំណង់ និងហេដ្ឋារចនាសម្ព័ន្ធក្រុងឡើងវិញទាំងស្រុង។ រដ្ឋាភិបាលអ៊ីរ៉ាក់ ទើបបានបង្កើតមូលនិធិមួយ ហើយបានអំពាវនាវ ឲ្យបណ្តាប្រទេសផ្សេងៗ ជួយចូលរួមផ្តល់ថវិកា។ យ៉ាងណាមិញ រដ្ឋាភិបាលអ៊ីរ៉ង់ ក៏ទើបបានប្រកាសថា គេត្រៀមខ្លួន ជួយអ៊ីរ៉ាក់ ដើម្បីធ្វើការកសាងស្ថាបនា ម៉ូស៊ូលឡើងវិញ ក៏ដូចជាផ្តល់នូវជំនួយមនុស្សធម៌ ឲ្យដល់ប្រជាជន ដែលរងរបួស។
ទាំងនេះជាការលំបាកផ្នែកសម្ភារៈ ក៏ប៉ុន្តែអ្វីដែលលំបាកបំផុត សម្រាប់រដ្ឋាភិបាលអ៊ីរ៉ាក់នោះ គឺធ្វើយ៉ាងណា ស្តារស្ថិរភាពនៅម៉ូស៊ូលឡើងវិញ។ ត្រង់នេះ គឺរដ្ឋាភិបាលអ៊ីរ៉ាក់ ត្រូវមានគោលនយោបាយមួយជាក់លាក់ ពុំនោះទេ ម៉ូស៊ូល ប្រាកដជាធ្លាក់ចូលទៅក្នុងភាពអាណាធិបតេយ្យ និងអសន្តិសុខ ហើយស្រួលមិនស្រួល ក្រុមជីហាតប្រាកដជាវិលមកវិញ។
បញ្ហាចោទសំខាន់ គឺទីមួយរដ្ឋាភិបាលអ៊ីរ៉ាក់ ត្រូវរកមនុស្សមកដឹកនាំក្រុងម៉ូស៊ូល ដែលមានសមត្ថភាព។ បញ្ហាចោទមួយទៀត គឺទប់ស្កាត់ចរន្តគំនិតស្អប់គុំគួនគ្នា រវាងប្រជាជននៅម៉ូស៊ូល និងកងកម្លាំងអាជ្ញាធរអ៊ីរ៉ាក់។ សហគមប្រជាជននៅម៉ូស៊ូល ភាគច្រើនគឺជាអ្នកកាន់សាសនាអ៊ីស្លាម និកាយស៊ុនីត រឺឯកម្លាំងអាជ្ញាធរអ៊ីរ៉ាក់ ភាគច្រើន គឺជាអ្នកកាន់និកាយឈីអ៊ីត។
កន្លងមក រដ្ឋាភិបាលអ៊ីរ៉ាក់ ធ្លាប់មានគំនិត ស្អប់ខឹង នឹងប្រជាជនម៉ូស៊ូល មួយចំនួនធំ ដែលបន្តរស់នៅសហការ ជាមួយនឹងក្រុមជីហាតអង្គការរដ្ឋអ៊ីស្លាម ក្នុងរយៈពេល៣ឆ្នាំមកនេះ ព្រោះពួកគេជាកាន់និកាយស៊ុនីតដូចគ្នា។ ហេតុនេះហើយ ទើបបានជាមានការព្រួយបារម្ភ ខ្លាចមានការសងសឹកធ្វើបាប ទៅលើប្រជាជន ទាំងនោះ។
ដូច្នេះ ការរៀបចំសន្តិសុខ និងកសាងទំនុកចិត្ត រួមរស់ជាមួយគ្នា រវាងអ្នកកាន់និកាយ ស៊ុនីត និងនិកាយឈីអ៊ីត គឺជារឿងសំខាន់ និងលំបាកបំផុត សម្រាប់រដ្ឋាភិបាលអ៊ីរ៉ាក់។ ក្នុងរយៈពេល៣ឆ្នាំមកនេះ ប្រជាជនម៉ូស៊ូល បានទទួលរងនូវការប៉ះទង្គិចផ្លូវចិត្តច្រើនណាស់ ។ ដូច្នេះ បើសិនជាគ្មានការយកចិត្តទុកដាក់ទេ ពួកគេនឹងអាចធ្លាក់ទៅតាមការអូសទាញជាថ្មី របស់ពួកជ្រុលនិយមណាមួយ។ ៩ ខែ ទំរាំរំដោះបានម៉ូស៊ូលមកវិញ ដោយចំណាយប្រាក់អស់រាប់រយលាន ដូច្នេះ វាគួរឲ្យស្តាយណាស់ បើសិនជារដ្ឋាភិបាលអ៊ីរ៉ាក់ មិនយកចិត្តទុកដាក់ ផ្តល់អាទិភាព ដល់ចំណុចទាំងអស់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ