សំណុំរឿងនុយក្លេអ៊ែរអ៊ីរ៉ង់៖ ការចរចា នឹងបន្តទៅដល់ដើមខែកក្កដា
តាមការគ្រោងទុក ការចរចារវាងប្រទេសមហាអំណាចទាំង៦ ជាមួយនឹងអ៊ីរ៉ង់ ស្តីពីកម្មវិធីនុយក្លេអ៊ែរអ៊ីរ៉ង់ នឹងត្រូវបញ្ចប់នៅថ្ងៃទី៣០ មិថុនាស្អែកនេះ។ ប៉ុន្តែមកដល់់នាទីចុងក្រោយ ភាគីទាំងអស់នៅតែមិនត្រូវរូវគ្នា លើចំណុចគ្រិះសំខាន់ជាច្រើន ដែលមិនអាចឲ្យគេសម្រេចកិច្ចព្រមព្រៀងនេះបាន។ កាលពីរសៀលថ្ងៃអាទិត្យ ម្សិលមិញ គ្រប់ភាគី បានធ្វើការបញ្ជាក់ព្រមគ្នាជាផ្លូវការ ថា ការចរចា នឹងត្រូវបន្តធ្វើ ទៅមុខទៀត ថ្វីបើផុតកាលកំណត់ក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ការចរចានៅទីក្រុងវីយែន ប្រទេសអូទ្រីស កាលពីថ្ងៃអាទិត្យទី ២៨ មិថុនា មិនបានទទួលលទ្ធផលនោះទេ។ ភាគីទាំងអស់ ដែលមានក្រុមប្រទេសមហាអំណាចទាំង៦ មាន៖ អាមេរិក បារាំង អង់គ្លេស អាល្លឺម៉ង់ ចិន និងរុស្ស៊ី នៅមិនទាន់ត្រូវគ្នាជាមួយភាគីអ៊ីរ៉ង់នៅឡើយ។ ចំណុចសំខាន់ៗ ដែលភាគីទាំងអស់ នៅមិនទាន់ចុះសម្រុងនឹងគ្នា គឺទាក់ទិនទៅនឹងការកំណត់ឲ្យបានស៊ីជំរៅ ទៅ លើ ការ ព្រមព្រៀងគ្នាត្រួសៗ ដែលបានចុះហត្ថលេខា នៅក្រុង ឡូហ្សាន ប្រទេស ស្វីស កាល ពី ខែ មេសា។ នៅពេលនេះ ភាគីទំាងអស់ បានព្រមព្រៀងគ្នាថាត្រូវបន្តការចរចាទៅមុខទៀត នៅដើមខែកក្កដា ដើម្បីស្វែងរកកិច្ចព្រមព្រៀងចុងក្រោយ។
លោក ចាវាដ ហ្សារីហ្វ រដ្ឋមន្រ្តីការបរទេសអ៊ីរ៉ង់ បានធ្វើដំណើរត្រឡប់ទៅអ៊ីរ៉ង់វិញ នៅល្ងាចថ្ងៃអាទិត្យ ម្សិលមិញ ដើម្បីពាំនាំយកសំណើរផ្សេងៗ ទៅពិភាក្សាជាមួយ ថ្នាក់ដឹកនាំរបស់អ៊ីរ៉ង់។ លោក នឹងត្រឡប់មកទីក្រុងវីយែនវិញ នៅថ្ងៃចន្ទនេះ បើតាមការរាយការណ៍របស់ទីភ្នាក់ងារព័ត៌មានផ្លូវការរបស់អ៊ីរ៉ង់។
ដោយឡែក លោកស្រី ហ្វេដេរីកា ម៉ូហ្គេរីនី ប្រមុខការទូតសហភាពអឺរ៉ុប បានមានប្រសាសន៍ថា ថាមិនត្រូវនៅនាទីចុងក្រោយនេះ ភាគីទាំងអស់អាចនឹងត្រូវរ៉ូវគ្នា បើសិនជាគ្រប់គ្នា ឈរលើឆន្ទៈរួមមួយ ដែលចង់ឲ្យកិច្ចព្រមព្រៀងនេះ លេចចេញជារូបរាង្គឡើង ហើយព្រមធ្វើសម្បទាន ទៅវិញទៅមក។
យ៉ាងណាមិញ សុទិដ្ឋិនិយម របស់លោកស្រី ម៉ូហ្គេរីនី មិនត្រូវបានលោករដ្ឋមន្រ្តីការបរទេសបារាំង និងលោករដ្ឋមន្រ្តីការបរទេសអង់គ្លេស យល់ស្របនោះទេ។ លោក ហ្វីលីព ហាកម៉ុន រដ្ឋមន្រ្តីការបរទេសអង់គ្លេស បានមានប្រសាសន៍ថា លោកសុខចិត្តមិនបាច់មានកិច្ចព្រមព្រៀង ជាជាងមានកិច្ចព្រមព្រៀងមួយ ដែលសម្រេចឲ្យតែបានៗ ហើយគ្មានភាពរឹងមាំ។ ចំណែកលោកឡូរ៉ង់ហ្វាប្យ៊ូស បានមានប្រសាសន៍ថា អ្វីដែលគ្រប់គ្នាចង់បានគឺ កិច្ចព្រមព្រៀងមួយ ដែលមានកំលាំងរឹងមាំ ដែលធានាថាអ៊ីរ៉ង់ មាននុយក្លេអ៊ែរសម្រាប់តែប្រើ ក្នុងវិស័យថាមពលស៊ីវីលប៉ុណោ្ណះ ហើយអ៊ីរ៉ង់ត្រូវតែធានាឲ្យច្បាស់ប្រាកដ ថាខ្លួននឹងមិនផលិតគ្រាប់បែកនុយក្លែអ៊ែរ។
ក្នុងន័យនេះ លោក រដ្ឋមន្រ្តីការបរទេសបារាំង បានបញ្ជាក់ថា ដូច្នេះវាមានលក្ខខណ្ឌបី សំខាន់ ដែលអ៊ីរ៉ង់ត្រូវគោរព ទីមួយគឺ ការកាត់បន្ថយជាដរាប នូវសមត្ថភាពទាំងការផលិត ទាំងការស្រាវជ្រាវ លើវិស័យនុយក្លេអ៊ែរ។ ទីពីរ គឺការបើកទ្វារឲ្យភ្នាក់ងារនុយក្លេអ៊ែរចុះឆែកឆេរគ្រប់ទីកន្លែង រាប់បញ្ចូលទាំងទីតាំងយោធាផង ហើយទីបី ចុងក្រោយ គឺការដាក់ទណ្ឌកម្មជាស្វ័យប្រវត្តិ លើអ៊ីរ៉ង់ បើសិនជាអ៊ិរ៉ង់ មិនគោរពកិច្ចព្រមព្រៀង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ