អេហ្ស៊ីបក្នុងព្យុះនៃអំពើហិង្សាលង់ខ្លួនកាន់តែជ្រៅក្នុងសង្គ្រាមប្រឆាំងភេរវជន
ថ្ងៃទី៣កក្កដានេះ ជាខួបពីរឆ្នាំគត់នៃការទម្លាក់ប្រធានាធិបតីអេហ្ស៊ីបដំបូងគេ លោក ម៉ូហាម៉ាត់ ម័រស៊ី ប្រសូតចេញពីការបោះឆ្នោត តាមបែបប្រជាធិបតេយ្យ បិទបញ្ចប់របបកាន់អំណាចផ្តាច់ការរាប់សិបឆ្នាំរបស់លោកមូបារ៉ាក់។ តែក៏ជាថ្ងៃ ដែលមេទ័ព អាប់ដែល ហ្វាតះ អាលស៊ីស៊ី បានដណ្តើមអំណាចឡើងគ្រប់គ្រងប្រទេសវិញដែរ។ ក្នុងរយៈពេលពីរឆ្នាំនេះ អេហ្ស៊ីបបានស្គាល់តែការប្រយុទ្ធប្រឆាំងនឹងភេរវជនអ៊ីស្លាមជ្រុលនិយម និងការបង្ក្រាបមិនរើសមុខ និងគ្រប់ទម្រង់ លើក្រុមអ្នកប្រឆាំង មិនថាជាក្រុមភារតអ៊ីស្លាម ឬចលនាប្រឆាំងអ្វីទេ។
ចុះផ្សាយនៅថ្ងៃ៖
ស្តាប់ - ០៥:២៧
បន្ទាប់ពីមានចលនាបាតុកម្មទម្លាក់ប្រធានាធិបតីនៃបក្សអ៊ីស្លាមជ្រុលនិយម ភារតអ៊ីស្លាម ប្រសូតចេញពីការបោះឆ្នោតមក អេហ្ស៊ីបបានស្គាល់ការវាយប្រហារស្ទើរជារៀងរាល់ថ្ងៃ តែជាទម្រង់តូចៗ រប៉េះរប៉ោះ រហូតមក។ ភេរវកម្មដែលមានលក្ខណៈធ្ងន់ធ្ងរខ្លាំង ជាងគេ គឺការវាយប្រហារ សម្លាប់រដ្ឋអាជ្ញាម្នាក់ និង ពីរថ្ងៃបន្ទាប់មកទៀត ក្រុមបះបោរប្រដាប់អាវុធ ដែលប្រកាសភ្ជាប់ខ្លួនជាអង្គការរដ្ឋអ៊ីស្លាមបានធ្វើការវាយប្រហារលើទីតាំងជាច្រើន មានស្លាប់រាប់សិបនាក់ នៅតំបន់ស៊ីណៃ។
កាន់តែបង្ក្រាប កាន់តែជ្រុលនិយម
លោកអាល់ស៊ីស៊ី ដឹកនាំទម្លាក់លោក ម៉រស៊ី ព្រោះតែអតីតប្រធានាធិបតីរូបនេះ ជាអ្នកអ៊ីស្លាមជ្រុលនិយម នៃបក្សភារតអ៊ីស្លាម។ ចលនាអ៊ីស្លាមជ្រុលនិយមនេះ ត្រូវបានបង្កើតឡើងតាំងពីឆ្នាំ១៩២៨ ហើយទើបតែអាចបានគ្រប់គ្រងប្រទេសជាលើកទីមួយ ពីឆ្នាំ២០១២ដល់ថ្ងៃទី ៣ កក្កដា ២០១៣ តាមរយៈការបោះឆ្នោតដោយសេរី តែត្រូវបានទម្លាក់ចេញតំណែងទៅវិញដោយចលនាបាតុកម្មប្រជាជន។
អតីតមេទ័ពអាល់ស៊ីស៊ី បានក្លាយជាប្រធានាធិបតីជំនួស បានចាត់ទុកចលនានេះជាអង្គការភេរវនិយម និងបានធ្វើការបង្ក្រាបយ៉ាងចាស់ដៃបំផុត ក្លាយជាចលនាខុសច្បាប់ ខ្លះត្រូវនិរទេសខ្លួនចេញ។ សកម្មជនខ្លះបានផ្តាច់ខ្លួនទៅធ្វើជាអ្នកជ្រុលនិយម យុវវ័យរបស់ចលនា ដែលជាអ្នកអ៊ីស្លាមជ្រុលនិយមស្រាប់ នាំគ្នាប្រមូលផ្តុំជាក្រុមប្រដាប់អាវុធតូចៗ តែសកម្ម ដើម្បីប្រឆាំងនឹងអំណាចក្រុងគែរ។ ខ្លះទៀត មានលក្ខណៈឯកាខ្លាំង បានលោតចូលក្នុងចលនាជីហាត ទៅស៊ីរី ខ្លះទៅចូលជាមួយនឹងក្រុមចលនាប្រដាប់បះបោរនៅស៊ីណៃ ដែលដឹកនាំសកម្មភាពតាំងពីឆ្នាំ២០១១មក ឱ្យ ភ្ជាប់ខ្លួនជាមួយអង្គការរដ្ឋអ៊ីស្លាម នៅខែវិច្ឆិកា២០១៤ និងមានបង្កើនល្បឿនឱ្យផ្តាច់ខ្លួនទៅជាសាខាសកម្មភាពនៅស៊ីរី នៅអ៊ីរ៉ាក់ ឬនៅលីប៊ី និងស្វែងរកការធ្វើសកម្មភាពនៅក្នុងប្រទេស ក្រៅតំបន់ស៊ីណៃ។
បើនិយាយអំពីតួលេខទើបគួរឱ្យព្រឺក្បាល បាតុករគាំទ្រអតីតប្រធានាធិបតីម៉រស៊ី ជាង១៤០០នាក់ បានស្លាប់ និង ជាង១៥០០០នាក់ កំពុងជាប់ក្នុងពន្ធនាគារ។ ក្នុងចំណោមនោះ មានក្រុមអ្នកអ៊ីស្លាមជ្រុលនិយមជាច្រើនដល់ត្រូវប្រហារជីវិត ទាំងហ្វូងៗតែម្តង ទោះបីជាមានការរិះគន់ថ្កោលទោសពីសំណាក់អង្គការការពារសិទ្ធិមនុស្សយ៉ាងណាក៏ដោយ។
លោកម៉រស៊ីផ្ទាល់ ព្រមទាំងប្រមុខដឹកនាំបក្សភារតអ៊ីស្លាម ជាច្រើននាក់ ក៏មានទោសប្រហារជីវិតទៀត។ ហេតុដូច្នេះហើយបានជាចលនាអ៊ីស្លាមជីហាត សម្លាប់ប៉ូលិស ទាហាន ផ្គើនរដ្ឋាភិបាល ក្រោមពាក្យថាដើម្បីសងសឹកនឹងការបង្ក្រាប។
ដំបូងឡើងការបង្ក្រាបធ្វើឡើងប្រឆាំងនឹងតែពួកអ៊ីស្លាមជ្រុលនិយមទេ តែក្រោយមកក្រុមយុវជន ឬចលនាប៉ះបោរធ្វើបដិវត្តអារ៉ាប ប្រឆាំងនឹងរបបមូបារ៉ាក់ កាលពីឆ្នាំ២០១១ ក៏ត្រូវបង្ក្រាបដោយឥតរើសមុខដែរ។ អ្នកឯកទេសខ្លះយល់ថា ការរឹតត្បិតបង្ក្រាបខ្លាំងជ្រុលហួសហេតុពេក គឺជាចំណែកមួយដែលបង្កឱ្យពួកជីហាតឡើងសកម្មភាពខ្លាំង។
លោក អាល់ស៊ីស៊ី នៅតែមានប្រជាប្រិយភាព មានការគាំទ្រពីពលរដ្ឋ
ពលរដ្ឋអេហ្ស៊ីបមួយភាគធំមានរបួសស្នាម ពេលដែលបក្សភារតអ៊ីស្លាម របស់លោកម៉រស៊ី បានឡើងកាន់អំណាចមួយភ្លែត (មួយឆ្នាំ) ទើបគិតថា ប្រធានាធិបតីអាល់ស៊ីស៊ី ជាអ្នកដែលអាចធានាបាននូវស្ថិភាព សន្តិសុខសម្រាប់ប្រទេស។ សហគមន៍អន្តរជាតិ ជាពិសេសខាងបស្ចឹមលោកក៏ដូចគ្នា ថ្វីបើដឹងថាមានការរំលោភសិទ្ធិមនុស្ស ដែលប្រធានាធិបតីអេហ្ស៊ីបបច្ចុប្បន្នចេះតាំងជំហរខ្លួន ធ្វើជាដៃគូសន្ទនា អាចទុកចិត្តបាន។ អេហ្ស៊ីបមានរបបដឹកនាំថ្មី ទោះបែបយោធាបន្តិចក្តី តែអាចធានាសស្ថិរភាពជាតិបាន វាល្អជាងបណ្តោយឱ្យប្រទេសមួយមានប្រជាជនជាង ៩០លានជាអ្នកកាន់សាសនាអ៊ីស្លាមដ៏ធំជាងគេនៅក្នុងតំបន់ ធ្លាក់ក្នុងភាពវឹកវរនយោបាយ។
ឥលូវរដ្ឋាភិបាលបានបង្កើតច្បាប់ប្រឆាំងភេរវនិយម ដែលផ្តល់អំណាចច្រើនដល់អាជ្ញាធរក្នុងការបង្ក្រាប និងប្រើកម្លាំងយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ