តួកគីបញ្ជូនទ័ពរាប់រយនាក់ទៅស៊ីរី ក្រោមរូបភាពទ័ពតួកមេនីស្ថាន
ជិតបីខែហើយ ដែលតួកគីបានបើកយុទ្ធនាការប្រយុទ្ធប្រឆាំងនឹងពួកភេរវជន ហើយប្រតិបត្តិការនេះទំនងជាមិនងាយបិទបញ្ចប់ទេ ! ប្រធានាធិបតីតួកគី បានសន្យានៅថ្ងៃអង្គារទី ១១សីហា ម្សិលមិញ ថា នឹងបន្តទម្លាក់គ្រាប់បែក រហូតកម្ចាត់អស់ភេរវជនមិនឱ្យសល់សូម្បីតែម្នាក់។ យុទ្ធនាការនេះ ដៅលើពួកជីហាតនៃអង្គការរដ្ឋអ៊ីស្លាមនៅស៊ីរីផង ពួកឧទ្ទាមគួដនៃគណបក្សពលករគួដឌីស្តង់សំងំជ្រកនៅអ៊ីរ៉ាក់ផង។ ហើយបើតាមព័ត៌មានផ្តាច់មុខរបស់វិទ្យុបារាំងអន្តរជាតិ មានទាហានតួកគីប្រមាណជិត៦០០នាក់ ដែលបានទៅហាត់សមយុទ្ធតាំងពីពីរបីអាទិត្យមកហើយ នៅក្រុងអាឡិបប្រទេសស៊ីរី នឹងត្រូវដាក់ពង្រាយចេញធ្វើប្រតិបត្តិការលើសមរភូមិស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
អង់ការ៉ា និងវ៉ាស៊ីនតោន បានព្រមព្រៀងគ្នា បាញ់ផ្លោងនិងទម្លាក់គ្រាប់លើទីតាំងពួកអង្គការរដ្ឋអីស្លាម និង បង្កើតឱ្យមានតំបន់សន្តិសុខនៅភាគខាងជើងប្រទេសស៊ីរី។ ប៉ុន្តែគ្មានផ្លូវដែលអាជ្ញាធរទាំងពីរបញ្ជូនទ័ពថ្មើរជើង មិនថាជាទ័ពតួកគី ឬទ័ពអាមេរិក ទៅធ្វើប្រតិបត្តិការនៅស៊ីរីឡើយ។
ប៉ុន្តែ នៅថ្ងៃអង្គារទី ១១សីហាម្សិលមិញ អ្វីៗហាក់ដូចជាប្រែក្រឡាស់ ! នាយករដ្ឋមន្ត្រីតួកគី បានអះអាងថាគ្រោងនឹងបញ្ចេញទ័ព ប្រសិនបើតួកគីរងការគំរាមខ្លាំងពីសំណាក់ពួកជីហាតរដ្ឋអ៊ីស្លាម ឬពីកងកម្លាំងស៊ីរីរបស់លោកបាស្ហាអាល់អាសាដ។ តែតាមការពិត ទាហានថ្មើរជើងតួកគី មួយចំនួនបានទៅដល់ទឹកដីស៊ីរី តាំងពីល្ងាចថ្ងៃចន្ទទី ១០ សីហាមកម្ល៉េះ ដើម្បីទៅឈរជើងក្បែរកងកម្លាំងឧទ្ទាមស៊ីរី គាំទ្រដោយតួកគី។
ជួបតាមទូរស័ព្ទនៅថ្ងៃអង្គារម្សិលមិញ នាយទាហានរបស់ក្រុមឧទ្ទាម ជាសម្ព័ន្ធមិត្តរបស់អង់ការ៉ា បានពន្យល់ថា កងយុទ្ធជនតួកមេនីស្ថានប្រមាណបីរយនាក់បានមកដល់ទឹកដីស៊ីរី ជាមួយរថក្រោះ ជាច្រើនគ្រឿង កាលពីថ្ងៃចន្ទ ក្នុងនោះមានមួយភាគជាទាហានតួកគី ដោយមិនបានផ្តល់អំពីចំនួនពិតប្រាកដទេ។
កងទ័ពតួកមេនីស្ថាន ពីរកងពលតូច ដែលបានជ្រៀតចូលទឹកដីស៊ីរី តាមច្រកមួយក្បែរក្រុងគីលីរបស់តួកគី ជាកម្លាំងប្រយុទ្ធនៃកងកម្លាំងយោធាបដិវត្តតួកមេនីស្ថាន មានគ្នាសរុបប្រមាណ៥ពាន់នាក់ និងបានជំនួយឧបត្ថម្ភជាសម្ភារៈបរិក្ខា និងការបំពាក់បំប៉នពីតួកគី តាំងពីខែកក្កដាមក ព្រមទាំងមានទាហានតួកគីផ្ទាល់ហាត់សមជាមួយផង។ បើតាមអ្នកនាំពាក្យកងយោធាបដិវត្តនេះ ចំនួនយោធាតួកគី សរុប ដែលនឹងត្រូវដាក់ពង្រាយនៅស៊ីរី អាចមានដល់ទៅ ៦០០នាក់។ ប៉ុន្តែពុំទាន់អាចផ្ទៀតផ្ទាត់ព័ត៌មាននេះបានទេ មកទល់នឹងម៉ោងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ