រុស្ស៊ីប្តេជ្ញាបន្តទម្លាក់គ្រាប់លើស៊ីរី ឯបាស្ឆា អាល់អាសាដ មានទំនុកចិត្តខ្លាំង
ចាប់តាំងពីថ្ងៃពុធទី ៣០តុលាមក ដែលរុស្ស៊ីបានចេញប្រតិបត្តិការ វាយប្រហារតាមផ្លូវអាកាស ដើម្បីបំបែកក្រុមភេរវកម្មនៅស៊ីរី។ តែអន្តរាគមន៍នេះ ត្រូវបានប្រទេសមហាអំណាចនៅអឺរ៉ុប ក៏ដូចជាអាមេរិក មានការមិនទុកចិត្ត ដោយគេក្រែងថា រុស្ស៊ីធ្វើការវាយប្រហារទៅលើក្រុមឧទ្ទាមប្រឆាំងរដ្ឋាភិបាលស៊ីរី ជាជាងការកម្ទេចក្រុមជីហាដអង្គការរដ្ឋអ៊ីស្លាម។ ទោះបីជាយ៉ាងណា នៅថ្ងៃនេះ រុស្ស៊ីបានប្តេជ្ញាបន្តទម្លាក់គ្រាប់តទៅទៀត ហើយលោកបាស្ឆា អាល់អាសាធ បានថ្លែងតាមទូរទស្សន៍ថា មានទំនុកចិត្តលើរុស្ស៊ី ក្នុងការស្រោចស្រង់តំបន់ទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
យោងតាមការផ្តល់ព័ត៌មាន ពីភ្នាក់ងារឃ្លាំមើលកិច្ចការសិទ្ធិមនុស្សនៅស៊ីរី បានបញ្ជាក់ថា យន្តហោះចម្បាំងរុស្ស៊ី បានទម្លាក់គ្រាប់ទៅលើតំបន់រ៉ាខា ដែលជាមូលដ្ឋានធំរបស់ក្រុមជីហាដអង្គការរដ្ឋអ៊ីស្លាម យ៉ាងដំណំ។ ដូចគ្នាដែរ លោកមេទ័ពអាកាសរុស្ស៊ី អង់ដ្រេ ការតាប៉ូឡូវ បានបញ្ជាក់ផងដែរថា គិតមកត្រឹមពេលនេះ កងទ័ពរុស្ស៊ីបានទម្លាក់គ្រាប់ចំនួន ៦០លើក ដោយបានកម្ទេចទីតាំងរបស់ក្រុមជីហាដចំនួន ៥០កន្លែង និងបានធ្វើឲ្យក្រុមកម្លាំង ពួកជីហាដអង្គការរដ្ឋអ៊ីស្លាម បាក់ទ័ព រត់ខ្ចាត់ខ្ចាយចំនួន៦០០នាក់។
ទោះបីជាយ៉ាងណា ដំណឹងទាំងនេះ គេនៅមិនទាន់ជឿច្បាស់ ថាវាជាការពិត រឺក៏គ្រាន់តែជាសម្តីអួតរបស់មេទ័ពរុស្ស៊ីតែប៉ុណ្ណោះ។ បើផ្អែកតាមបណ្តាញស៊ើបការណ៍របស់អង់គ្លេស បានឲ្យដឹងថា ក្នុងចំណោមការវាយប្រហារទាំងអម្បាលម៉ាណរបស់រុស្ស៊ី គិតពីថ្ងៃពុធមក គឺមានភាគតិចណាស់ ដែលបានវាយទៅលើក្រុមជីហាដអង្គការរដ្ឋអ៊ីស្លាម។ ផ្ទុយទៅវិញ មួយផ្នែកធំ គឺបានធ្លាក់ទៅលើប្រជាជនស្លូតត្រង់ និងក្រុមឧទ្ទាមកណ្តាលនិយម ដែលជាក្រុមប្រឆាំងនឹងរដ្ឋាភិបាលរបស់បាស្ឆា អាល់អាសាដ។
ជាការពិតណាស់ អន្តរាគមន៍ចេញមុខចេញមាត់ របស់រុស្ស៊ី បានធ្វើឲ្យអាមេរិក ក៏ដូចជាបារាំង អាល្លឺម៉ង់ មានការមិនទុកចិត្តទាល់តែសោះ។ ពួកគេសង្ស័យថា រុស្ស៊ីចង់មកការពាររបបផ្តាច់ការរបស់បាស្ឆា អាល់អាសាដ ដោយធ្វើការវាយប្រហារទៅលើក្រុមជីហាដអ៊ីស្លាមផង និងទៅលើក្រុមឧទ្ទាមកណ្តាលនិយមស៊ីរីផង។ ក្រោយការប្រជុំ ជាមួយបារាំងនិងអាល្លឺម៉ង់ រុស្ស៊ីបានបញ្ជាក់គោលជំហរគេថា គេធ្វើការវាយប្រហារទៅលើក្រុមភេរវករទាំងអស់ ដោយឥតរើសមុខ។ ខាងរុស្ស៊ីថែមទាំងបានចំអក ឲ្យបារាំង និងអាមេរិក ថាចង់ការពារក្រុមឧទ្ទាមកណ្តាលនិយម តែផ្ទុយទៅវិញគ្រាន់តែគេសួរថា ភាពខុសគ្នារវាងក្រុមឧទ្ទាមនេះ នឹងក្រុមជីហាដអង្គការរដ្ឋអ៊ីស្លាម ខុសគ្នាត្រង់ណា ឆ្លើយមិនទាំងចេញផង។
ទោះបីជាបារាំងថាទេ អាមេរិកថាកុំ តែរុស្ស៊ីបានប្តេជ្ញាចិត្តរួចទៅហើយ គឺការពាររបបផ្តាច់ការបាស្ឆា អាល់អាសាដ ឲ្យដល់ទីបំផុត។ ព្រោះនេះជាឈ្នាន់មួយ ដើម្បីឲ្យរុស្ស៊ី បានឈរជើងនៅតំបន់ដើមបូព៌ា ហើយមួយទៀត បើសិនជារុស្ស៊ី អាចយកជ័យជំនះ កម្ទេចក្រុមជីហាដបាន នោះរុស្ស៊ីប្រាកដជារីកមុខ ដូចគ្រាប់ជីជាក់ជាមិនខានទេ។ ចំណែក បាស្ឆា អាល់អាសាដ ដែលសំងំចាំដល់ដង្ហើមចុងក្រោយ ពេលនេះកំពុងមានទឹកមាត់លេបឡើងវិញ ក្រោយអន្តរាគមន៍ជួយរបស់រុស្ស៊ី។ រសៀលថ្ងៃអាទិត្យម្សិលមិញ បាស្ឆា បានផ្តល់បទសម្ភាសន៍ ឲ្យទូរទស្សន៍អ៊ីរ៉ង់ ដោយបានអំពាវនាវ ឲ្យមហាអំណាចទាំងអស់ ផ្តល់ក្តីសង្ឃឹម និងការទុកចិត្តលើរុស្ស៊ី ក្នុងការស្រោចស្រង់ស្ថិរភាពតំបន់ទាំងមូល។ តែគួរឲ្យអស់សំណើចដែរ ព្រោះថា បើបាស្ឆា អាល់អាសាដ ចង់ពន្លត់ភ្លើងសង្រ្គាម ក្នុងតំបន់ គួរណាតែព្រមចុះចេញពីដំណែងតាមការទាមទាររបស់ប្រជាជន យូរណាស់ហើយ មិនមែននៅក្រាញអំណាចរហូតដល់ពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ