ទស្សនកិច្ចនៅតំបន់ដើមបូព៌ា របស់នាយករដ្ឋមន្ត្រីបារាំង
លើកទីមួយសម្រាប់ លោកនាយករដ្ឋមន្ត្រីបារាំង ម៉ានុយអ៊ែល វ៉ាល់ស៍ ដែលកំពុងតែបំពេញទស្សនកិច្ច នៅ តំបន់ដើមបូព៌ា។ ក្នុងរយៈពេល៤ថ្ងៃ លោក នាយករដ្ឋមន្រ្តីបារាំង នឹងធ្វើដំណើរទៅកាន់ ប្រទេស អេហ្ស៊ីប អារ៉ាប៊ីសាអ៊ូឌីត និងប្រទេសហ្សកដានី។ ក្នុងដំណើរទស្សនកិច្ចនេះ ប្រធានបទសំខាន់ គឺសំដៅចរចាពីកិច្ចសន្យា ទិញលក់សម្ភារៈយោធារបស់បារាំង មានដូចជានាវា និងយន្តហោះរ៉ាហ្វាល់ជាដើម។ ក្រៅពីនេះ លោកនាយករដ្ឋមន្ត្រី ក៏នឹងពិភាក្សាផងដែរ ពីបញ្ហាសិទ្ធិមនុស្ស និងវិបត្តិសង្រ្គាម នៅស៊ីរី និងអ៊ីរ៉ាក់ ដែលកំពុងតែធ្វើឲ្យរញ្ជួយស្ថិរភាព តំបន់ដើមបូព៌ាទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ជាការចាប់ផ្តើម លោក ម៉ានុយអ៊ែល វ៉ាលស៍ នាយករដ្ឋមន្ត្រីបារាំង នឹងអញ្ជើញបាយថ្ងៃត្រង់ ជាមួយនឹងលោកប្រធានាធិបតី អេហ្ស៊ីប អាប់ឌែល ហ្វាតា អាល់ស៊ីស៊ី ហើយក្នុងពេលរសៀល នឹងជួបពិភាក្សា ជាមួយនឹងនាយករដ្ឋមន្ត្រីអេហ្ស៊ីប ឆេរីហ្វ អ៊ីស្មាយ។ ទស្សនកិច្ចរបស់លោក នាយករដ្ឋមន្ត្រីបារាំង នៅអេហ្ស៊ីប សង្កត់ធ្ងន់ ទៅលើកិច្ចសន្យាទិញនាវាមីស្ត្រាល់ ពីរគ្រឿង របស់បារាំង ដែលអេហ្ស៊ីប សុំទិញយក បន្ទាប់ពីបារាំង ប្តូរចិត្ត លែងលក់ទៅឲ្យរុស្ស៊ី។
នាវាមីស្រ្តាល់ពីរគ្រឿងនេះ បារាំងលក់ទៅឲ្យអេហ្ស៊ីប ក្នុងតម្លែ ៩៥០លានអឺរ៉ូ ក៏ប៉ុន្តែកិច្ចសន្យា នៅមិនទាន់ចុះហត្ថលេខាជាស្ថាពរទេ ដោយសារនៅមានសេសសល់ចំណុចមួយចំនួន ដែលត្រូវពិភាក្សាគ្នា។ គួររំលឹកដែរ ថាកាល ពីខែកុម្ភៈកន្លងទៅ អេហ្ស៊ីប បានទិញយន្តហោះរ៉ាហ្វាល់បារាំងចំនួន ២៤គ្រឿង ដែលគិតជាទឹកប្រាក់ ស្មើនឹង ជាង៥ពាន់លានអឺរ៉ូ។ ក្រៅពីកិច្ចសន្យាសម្ភារៈយោធាទាំងនេះ អេហ្ស៊ីប មានបំណង ពង្រីកបណ្តាញរថភ្លើងក្រោមដី នៅទីក្រុងគែរ ដែលក្រុមហ៊ុនបារាំង ធ្លាប់បានទទួលការងាររួចមកហើយ។
ខុទ្ទកាល័យលោក ម៉ានុយអ៊ែល វ៉ាលស៍ បានបញ្ជាក់ផងដែរថា លោកនាយករដ្ឋមន្ត្រី នឹងលើកឡើងផងដែរ ពីការគោរពសិទ្ធិមនុស្សនៅអេហ្ស៊ីប ដែលរដ្ឋាភិបាលនេះ ត្រូវបានគេចោទប្រកាន់ជាញឹកញយ ថាបានប្រើអំណាចផ្តាច់ការ កម្ចាត់ក្រុមអតីតប្រធានាធិបតីអេហ្ស៊ីប មូហាម៉េដ ម៉កស៊ី។
បន្ទាប់ពីអេហ្ស៊ីប លោកនាយករដ្ឋមន្ត្រីបារាំង នឹងបន្តដំណើរទៅ អារ៉ាប៊ីសាអ៊ូឌីត ជាទីដែលលោក នឹងត្រូវបានអនុញ្ញាតឲ្យចូលគាល់ ព្រះចៅ សាល់ម៉ាន់។ តាមប្រភព ពីអ្នកអមដំណើរលោកនាយករដ្ឋមន្ត្រី នឹងឆ្លៀតឱកាសនេះ ដើម្បីស្នើរសុំការប្រោសព្រះរាជទាន លើកលែងទោស ដល់យុវជនអ៉ារ៉ាប៊ីសាអ៊ូឌីតអាយុ ១៧ឆ្នាំ ឈ្មោះ អាលី អាល់ នីមរ៍ ដែលត្រូវតុលាការកាត់ទោសប្រហារជីវិត ដោយសារតែបានចូលរួមធ្វើបាតុកម្ម ប្រឆាំងនឹងរដ្ឋាភិបាលអារ៉ាប៊ីសាអ៊ូឌីត។
ចំណែកនៅប្រទេសហ្សកដានី លោកនាយករដ្ឋមន្ត្រីបារាំង មានបំណងទៅត្រួតពិនិត្យជុំរំជនភៀសខ្លួនស៊ីរី និងជនជាតិអ៊ីរ៉ាក់ ដែលបានរត់គេចពីក្រុមជីហាដរដ្ឋអ៊ីស្លាម។ នៅហ្សកដានី មានជនភៀសខ្លួនស៊ីរី ចំនួន ៦៥ម៉ឺននាក់។ នៅហ្សកដានី ដែរ បារាំង ក៏បានតាំងមូលដ្ឋានទ័ពអាកាសរបស់ខ្លួនផងដែរ ដែលជាបេសកកម្ម វាយប្រហារទៅលើក្រុមជីហាដអង្គការរដ្ឋអ៊ីស្លាម នៅអ៊ីរ៉ាក់ និងនៅស៊ីរី។ យន្តហោះចម្បាំង និងយន្តហោះប្រដេញ ទម្លាក់គ្រាប់បែកជាច្រើនគ្រឿងរបស់បារាំង គឺមានមូលដ្ឋានចុះចត នៅក្នុងទឹកដីហ្សកដានី ដែលមានព្រំប្រទល់ជាប់ជាមួយអ៊ីរ៉ាក់ និងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ