ក្រុមប្រទេសផលិតប្រេងព្រមព្រៀងបង្កកបរិមាណបូមប្រេង ដើម្បីទប់តម្លៃ
ក្រុមប្រទេសអ្នកផលិតប្រេងបួនប្រទេស អារ៉ាប៊ីសាអូឌីត កាតា រុស្ស៊ី និងវេណេស៊ុយអេឡាបានព្រមព្រៀងគ្នានៅថ្ងៃអង្គារនេះ បង្កកការផលិតប្រេងឆៅរបស់ខ្លួន ប្រសិនបើបណ្តាប្រទេសផលិតប្រេងធំៗផ្សេងទៀតធ្វើតាមដែរ។ ប៉ុន្តែលក្ខខណ្ឌនេះទំនងត្រូវជាប់គាំង ព្រោះអ៊ីរ៉ង់ កំពុងចង់បង្កើនការបូមប្រេង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នៅក្នុងកិច្ចប្រជុំថ្នាក់រដ្ឋមន្ត្រី ដោយឥតព្រៀងទុកមួយ រៀបចំជាលើកដំបូង ក្នុងរយៈពេល១៨ខែ រដ្ឋមន្ត្រីក្រសួងប្រេងកាត អារ៉ាប៊ីសាអូឌីត រុស្ស៊ី កាតា និងវេណេស៊ុយអេឡា បានព្រមព្រៀងគ្នាកំរិតបរិមាណផលិតប្រេងមួយរយៈ ដើម្បីទ្រទ្រង់តម្លៃប្រេងឆៅកុំឱ្យធ្លាក់ថ្លៃខ្លាំងពេក។ ប្រេងឆៅដែលកាលពីខែមុន បានធ្លាក់ដល់កំរិតទាបបំផុតមិនធ្លាប់មានគិតចាប់ពី១២ឆ្នាំមក។
រដ្ឋមន្ត្រីអារ៉ាប៊ីសាអូឌីត សង្ឃឹមថាក្រោយពីមានកិច្ចព្រមព្រៀងនេះហើយ បណ្តាប្រទេសផលិតប្រេងផ្សេងនៃអង្គការ ឬមិនមែនអង្គការOPEP នឹងធ្វើតាម។ ចំណែកវេណេស៊ុយអេឡា បានសន្យាថានឹងធ្វើដំណើរនៅថ្ងៃស្អែក ទៅក្រុងតេអេរ៉ង់ ដើម្បីបញ្ចុះបញ្ចូលអ៊ីរ៉ាក់ និងអ៊ីរ៉ង់ឱ្យទទួលយកកិច្ចព្រមព្រៀងនេះ។ ព្រោះប្រទេសទាំងពីរនេះ ជាតំណាងឧបសគ្គដ៏ចំបងជាងគេ ក្នុងការកាត់បន្ថយផលិតផលប្រេងនៅលើពិភពលោក។
អ៊ីរ៉ង់ ប្រទេសជាគូប្រជែងដោយផ្ទាល់របស់អារ៉ាប៊ីសាអូឌីត បានបង្ហាញចង់ដណ្តើមចំណែកមួយភាគនៅលើទីផ្សារអន្តរជាតិ ដោយចង់បង្កើនការផលិតប្រេង នៅឆ្នាំនេះ ឱ្យច្រើនខ្លាំង ដើម្បីបង្គប់ការយឺតយ៉ាវ កាលពីប៉ុន្មានឆ្នាំមុន ពេលជាប់ទណ្ឌកម្មអន្តរជាតិ។ អ៊ីរ៉ង់អាចនឹងពិបាកទទួលយកកិច្ចព្រមព្រៀង ព្រោះរុស្ស៊ីនិងអារ៉ាប៊ីសាអូឌីត បង្កើនការបូមប្រេងសឹងដល់កំរិតខ្ពស់បំផុតមិនធ្លាប់មាន។ ឯអ៊ីរ៉ង់ មានសមត្ថភាពផលិតខ្ពស់ខ្លាំង ដែលមិនទាន់ប្រើការសោះ។
សេចក្តីសម្រេចចិត្តក្រុងដូហានេះទទួលការស្វាគមន៍ដោយប្រុងប្រយ័ត្នបំផុតពីសំណាក់ទីផ្សារប្រេង។ ប៉ុន្តែសម្រាប់អ្នកវិភាគ ថ្វីបើសម្រេចចិត្តបង្កកបរិមាណបូមប្រេង ត្រឹមកំរិតដូចខែមករានេះ ជាសញ្ញាវិជ្ជមានមែន តែនឹងមិនធ្វើឱ្យតម្លៃប្រេងឡើងទេ ព្រោះមានសល់ប្រេងក្នុងស្តុកច្រើនផង ហើយកំរិតផលិតប្រេងនៅខែមករា របស់រុស្ស៊ី និងអារ៉ាប៊ីសាអូឌីត ជាបរិមាណលើសតម្រូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ