អ៊ីស្រាអែលបើកប្រតិបត្តិការផ្លូវអាកាសលើតំបន់ហ្កាហ្សាប៉ាឡេស្ទីន
សម្រាប់យោធាអ៊ីស្រាអែល ការវាយប្រហារផ្លូវអាកាសលើតំបន់ហ្កាហ្សាពេលនេះ គឺជាការតបតនឹងសកម្មភាពផ្លោងគ្រាប់របស់ពួកហាម៉ាស។ គ្មានជនរងគ្រោះដល់ជីវិតទេ ទាំងខាងអ៊ីស្រាអែល ក៏ដូចជាប៉ាឡេស្ទីន ប៉ុន្តែភាពតានតឹងបានឡើងដល់កំរិត។ ការប៉ះទង្គិចមានកាន់តែច្រើន ចលនាហាម៉ាសជាអ្នកគ្រប់គ្រងតំបន់ហ្កាហ្សាបានព្រមានអ៊ីស្រាអែលកុំឱ្យធ្វើការវាយលុក។ ប្រជាជនហ្កាហ្សាដែលទើបត្រដរងើបចេញពីភ្លើងសង្គ្រាមឆ្នាំ២០១៤ កំពុងព្រួយបារម្ភខ្លាចមានសង្គ្រាមជាថ្មីទៀត។
ចុះផ្សាយនៅថ្ងៃ៖
ស្តាប់ - ០១:៥៨
តាំងពីថ្ងៃពុធម្សិលមិញមក ទាហានអ៊ីស្រាអែលដែលឈរជើងនៅតាមបន្ទាត់សុវត្ថិភាពព័ទ្ធតំបន់ហ្កាហ្សា បាននិងកំពុងក្លាយជាផ្ទាំងស៊ីបនៃការផ្លោងគ្រាប់បែកត្បាល់និងរ៉ុកកែត។ ជាការឆ្លើយតបវិញ អ៊ីស្រាអែលបានបើកប្រតិបត្តិការវាយប្រហារផ្លូវអាកាស លើទីតាំង៥កន្លែងរបស់ចលនាហាម៉ាស។ នេះបើតាមប្រភពយោធាអ៊ីស្រាអែល ដែលបានបញ្ជាក់ធ្វើការដៅទិសតែលើពួកចលនាហាម៉ាសមួយតែប៉ុណ្ណោះ។
ប៉ុន្តែក្រសួងមហាផ្ទៃហាម៉ាស បានអះអាងថាមីស៊ីលអ៊ីស្រាអែលពីរ បានធ្លាក់ទៅលើមូលដ្ឋានហ្វឹកហ្វឺនកងពលតូច នៃកងទ័ពជីហាតអ៊ីស្លាម ដែលជាកម្លាំងអ៊ីស្លាមជ្រុលនិយមទីពីរនៅដែនដីប៉ាឡេស្ទីន និងដែលស្ថិតនៅភាគខាងជើងតំបន់ហ្កាហ្សា។ មិនតែប៉ុណ្ណោះ គ្រាប់មួយបានធ្លាក់លើរោងជាងជួសជុលឡាន ដែលបណ្តាលឱ្យជនស៊ីវិល៤នាក់ ក្នុងគ្រួសារតែមួយរងរបួស។ នេះបើតាមប្រភពព័ត៌មានពេទ្យនៅហ្កាហ្សា។
សូមបញ្ជាក់ថា ហេតុការហិង្សាអ៊ីស្រាអែល ប៉ាឡេស្ទីន នៅតំបន់ហ្កាហ្សានេះ បានផ្តើមផ្ទុះឡើងវិញ តាំងពីថ្ងៃអង្គារទី ៣ ឧសភា តាមរយៈការបាញ់រះលើយោធាអ៊ីស្រាអែលមួយក្រុម បន្ទាប់មកការបាញ់តគ្នាកាន់តែសន្ធាប់ឡើងៗ រហូតដល់ការបើកប្រតិបត្តិផ្លូវអាកាស។
អ៊ីស្រាអែលនិងប៉ាឡេស្ទីន បានធ្វើសង្គ្រាមនឹងគ្នានៅតំបន់ហ្កាហ្សា បីដងហើយគិតត្រឹមពីឆ្នាំ២០០៨មក។ សង្គ្រាមនៅឆ្នាំ២០១៤ បានបង្កគ្រោះមហន្តរាយយ៉ាងខ្លាំង ទាំងសម្ភារៈនិងជីវិតមនុស្ស។ ក្រោយពីមានបទឈប់បាញ់ គេសង្កេតឃើញបានការរំលោភជារប៉េះរបោះ ដែលបណ្តាលមកពីក្រុមប្រដាប់អាវុធ- នេះបើតាមអ៊ីស្រាអែល។ តែលើកនេះអ៊ីស្រាអែលបានចោទប្រកាន់ចលនាហាម៉ាសដែលជាអ្នកដឹកនាំតំបន់តែម្តង ថាជាអ្នកបាញ់រ៉ុកកែតមកលើអ៊ីស្រាអែល។
ហេតុដូច្នេះហើយបានជាទាំងពលរដ្ឋនិងតំណាងពិសេសអង្គការសហប្រជាជាតិ ប្រចាំតំបន់ដើមបូព៌ា ព្រួយបារម្ភខ្លាំង និងអំពាវនាវឱ្យគ្រប់ភាគីអត់ធ្មត់ ដើម្បីចៀសវាងសង្គ្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ