កងទ័ពអ៊ីរ៉ាក់នៅតែបន្តវាយរុលទៅមុខជាសន្សឹមៗដើម្បីតម្រង់ទៅកាន់ក្រុងMossoul
កងទ័ពអ៊ីរ៉ាក់បានប្រកាសឲ្យដឹងនៅថ្ងៃពុធ២៩មិថុនាថា “កងទ័ពរបស់ខ្លួន បានបន្តការវាយរុលទៅមុខយ៉ាងសន្យឹមៗនៅភាគខាងជើងអ៊ីរ៉ាក់ ដោយបានសំដៅទៅកាន់ទីវាលសម្រាប់យន្តហោះមួយ ដើម្បីទុកប្រើប្រាស់ជាមួលដ្ឋានផ្នែកខាងក្រោយរបស់ខ្លួននាពេលធ្វើការវាយលុកតាមការគ្រោងទុកប្រឆាំងទៅលើទីក្រុង Mossoul ក្រុងដ៏សំខាន់មួយរបស់អ៊ីរ៉ាក់ដែលត្រួតត្រាដោយអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
កងទាហាននិងសមាជិកនៃកងកម្លាំងប្រឆាំងទល់នឹងអំពើភេរវនិយមរបស់អ៊ីរ៉ាក់ បានវាយដណ្តើមកាន់កាប់ទីភូមិមួយកន្លែងនៅចម្ងាយ ២៦០គម ភាគខាងជើងនៃទីក្រុងបាកដាតលើផ្លូវហាយវ៉េដ៏សំខាន់មួយពីជើងទៅត្បូងនៅថ្ងៃអង្គារមុន។
នៅខណៈនេះ កងទ័ពអ៊ឺរ៉ាក់ កំពុងស្ថិតនៅចម្ងាយប្រមាណតែ៤៥គមប៉ុណ្ណោះពីទីមូលដ្ឋានអាកាសចរណ៍មួយនៅ Kayara។ គោលដៅមួយទៀតនៃការវាយរុលទៅមុខរបស់កងទ័ពអ៊ីរ៉ាក់ គឺដើម្បី វាយដណ្តើមយកមកវិញ រោងចក្រចម្រាញ់ប្រេងមួយកន្លែងនៅម្តុំ Kayara ដែលអាចផលិតប្រេងបានចំណុះ រហូតដល់ទៅ ១ម៉ឺន៦ពាន់បារីលក្នុងមួយថ្ងៃៗ ពីរសប្តាហ៍បន្ទាប់ពីការវាយដណ្តើមយកបានរោងចក្រប្រេងមួយនៅ Baïdji រួចមក។
កងកម្លាំងរដ្ឋាភិបាលអ៊ីរ៉ាក់នៅពេលនេះ បានទទួលផលចំណេញច្រើន ដោយសារជោគជ័យដ៏រុងរឿងមួយ ក្រោយពី វាយដណ្តើមបាន មូលដ្ឋានស៊ុយនីតមួយកន្លែងនៅ Falloudja។ នាពេលនេះ អង្គការរដ្ឋអ៊ីស្លាមជីហាត ក៏ កំពុងតែស្ថិតនៅក្នុងស្ថានភាពដ៏ពិបាកមួយ ដោយហេតុតែពួកអ៊ីស្លាមជីហាតនេះ អស់សមត្ថភាពក្រៅតែពីការខិតខំទប់ទល់ជាមួយកម្លាំងទ័ពរបស់អ៊ីរ៉ាក់តែប៉ុណ្ណោះ ពីរឆ្នាំបន្ទាប់ពីអង្គការជីហាត វាយដណ្តើមយកបាននូវតំបន់ជាច្រើនកន្លែងក្នុងប្រទេសអ៊ីរ៉ាក់និងស៊ីរីរួចមក។
អង្គភាពអ៊ីរ៉ាក់ផ្សេងៗទៀត ក៏នៅតែធ្វើការវាយរុលទៅមុខជាសន្សឺមៗជានិច្ច ដើម្បីឆ្ពោះទៅកាន់ទិសខាងកើតនៃទន្លេ Tigre ព្រមទាំងបានធ្វើប្រតិបត្តិការដើម្បីការពារសន្តិសុខនៅតាមភូមិនានាជាច្រើនកន្លែងទៀតផង។
ចំណែកកងទ័ពអ៊ីរ៉ាក់់វិញ បានបាញ់ផ្លោងគ្រាប់យ៉ាងសម្បើ់មប្រឆាំងទៅលើទីតាំងនានានៅ Hadj Ali នៅថ្ងៃពុធ២៩មិថុនា ដើម្បីត្រៀមការវាយរុលទៅមុខតាមជើងគោគសំដៅទៅដល់ច្រាំងទន្លេ Tigre ។ យ៉ាងណាមិញ ការវាយលុករបស់កងទ័ពអ៊ីរ៉ាក់ប្រឆាំងទៅលើពួកជីហាតប្រដាប់អាវុធ បានជំរុញឲ្យប្រជាជនស៊ីវីលអ៊ីរ៉ាក់ជាច្រើនពាន់នាក់នាំគ្នារត់គេចចេញពីតំបន់សង្គ្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ