បទឈប់បាញ់នៅស៊ីរីចូលជាធរមានតែពួកឧទ្ទាមមួយចំនួនបានបដិសេធមិនព្រមគោរពតាម
នៅប៉ុន្មានម៉ោងមុនបទឈប់បាញ់ចូលជាធរមាននៅប្រទេសស៊ីរី នាថ្ងៃចន្ទ១២កញ្ញានេះ សំណួរជាច្រើន បានចោទសួរឡើងតែគេគ្មានចំឡើយ ដូចថា” តើគេគោរពបទឈប់បាញ់នេះដែរឬទេ ឬថាតើគេនឹងអនុវត្តនៅក្នុងតំបន់ណាខ្លះ? កិច្ចព្រមព្រៀងបទឈប់បាញ់ដែលជាផលផ្លែនៃកិច្ចប្រឹងប្រែងយ៉ាងស្វិតស្វាញរបស់អាមេរិកនិងរុស្ស៊ីចុះនៅទីក្រុងហ្សឺណែវប្រទេសស្វីសកាលពីថ្ងៃសុក្រមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បន្ទាប់ពីមានកិច្ចព្រមព្រៀង”បទឈប់បាញ់”ចុះដោយអាមេរិកនិងរុស្ស៊ីនៅថ្ងៃសុក្រមុនក្នុងទីក្រុងហ្ស៊ឺណែវមក ប្រទេសអ៊ីរ៉ង់ បានសម្តែងការអបអរសាទរនៅថ្ងៃអាទិត្យនិងបានអំពាវនាវឲ្យមានការរៀបចំបង្កើតយន្តការត្រួតពិនិត្យមួយ។ យោងតាមអ្នកនាំពាក្យម្នាក់នៃក្រសួងការបរទេសអ៊ីរ៉ង់ “យន្តការត្រួតពិនិត្យនោះ ជារចនាសម្ព័ន្ធមួយ ដើម្បីបិទបញ្ចប់ លំហូរពួកអ៊ីស្លាមជីហាតថ្មីៗថែមទៀតមកក្នុងប្រទេសស៊ីរី ក៏ព្រមទាំងអាវុធនិងធនធានហិរញ្ញវត្ថុសំរាប់ផ្គត់ផ្គង់ក្រុមភេរវជនផងដែរ។
ចំណែកខាងតួកគីវិញ បានប្រកាសប្រាប់ថា តួកគីមានបំណងបញ្ជូនក្បួនរថយន្តជំនួយមនុស្សធម៌នៅថ្ងៃចន្ទនេះទៅកាន់ក្រុងអាឡិប ភាគខាងជើងស៊ីរី ដែលកំពុងប្រឈមមុខនឹងការវាយប្រហារដ៏សែនសាហាវ នៅខណៈដែលបទឈប់បាញ់ត្រូវចូលជាធរមាននៅយប់ថ្ងៃចន្ទនេះ។
នៅម្សិលមិញ ចលនា Hezbollahលីបង់ បានសន្យាថាពួកគេនឹងគោរពទាំងស្រុងចំពោះការសម្រេចចិត្តរបស់ថ្នាក់ដឹកនាំនិងរដ្ឋាភិបាលស៊ីរី។ ក្រុមយុទ្ធជននៃចលនា Hezbollah លីបង់ ដែលជាអ្នកកាន់សាសនាអ៊ីស្លាមនិកាយស៊ីអ៊ីតនោះ ធ្វើការវាយប្រយុទ្ធអមជាមួយកងកម្លាំងរបស់លោកប្រធានាធិបតីស៊ីរី Bachar al Assad។
ចំណែកក្រុមឧទ្ទាមនានានៅក្នុងប្រទេសស៊ីរីវិញ ហាក់ដូចជានៅមានការអល់អែកមិនទាន់ច្បាស់លាស់ទេ។ ដោយពួក ឧទ្ទាម Ahra al-Cham ដែលមានឥទ្ធិពលខ្លាំងជាងគេនៅស៊ីរី បានប្រកាសថាចលនារបស់ខ្លួន គ្មានពាក់ព័ន្ធជាមួយបទឈប់បាញ់នេះឡើយ ហើយនៅពេលជួបសន្ទនាជាមួយអ្នកកាសែត អ្នកនាំពាក្យរបស់ក្រុមប្រដាប់អាវុធនេះ បានអះអាងបញ្ជាក់ថា ក្រុមខ្លួននឹងមិនគោរពតាមបទឈប់បាញ់នេះទេ។ គួររំលឹកថា ក្រុមឧទ្ទាម Ahrar al-Cham និងក្រុមមួយទៀតដែលជាអតីតក្រុម al –Nosra និងដែលដកខ្លួនចេញពីកិច្ចព្រមព្រៀងនេះ គឺជាចលនាឧទ្ទាមដ៏សំខាន់ដែលដាក់ទីតាំងនៅក្នុងខែត្រអាឡិបនិងអ៊ីតឡិប។
ដូច្នេះហើយ បានជាមានសំណួរជាច្រើនចោទសួរឡើងមិនចេះចប់ ពាក់ព័ន្ធនឹងឥរិយាបថរបស់ក្រុមឧទ្ទាម al –Nosra នេះ ដែលត្រូវបានគេចាត់ទុកថាជាក្រុមឧទ្ទាមមាននិន្នាកាកណ្តាលនិយមនិងក៏ជាសមាជិករបស់កងទ័ពសម្ព័ន្ធមិត្តដែរ។
ម្យ៉ាងទៀត បើសិនជាគេជឿជាក់ថា បទឈប់បាញ់គ្នានឹងត្រូវអនុវត្តនៅតំបន់អាឡិប ក៏គេនៅតែមិនទាន់ច្បាស់ដែរថាតើគេអាចអនុវត្តបទឈប់បាញ់នេះ នៅក្នុងតំបន់ផ្សេងៗទៀតដែរឬទេ ?។ ពីព្រោះ នៅខេត្ត Queitra ដែលស្ថិតនៅជាប់នឹងតំបន់ Golan និងកាន់កាប់ដោយអ៊ីស្រាអែល គឺជាតំបន់មួយកំពុងទទួលរងដោយការវាយលុករបស់ក្រុមឧទ្ទាម។
ហើយគ្រាន់តែពីរថ្ងៃប៉ុណ្ណោះ ការវាយប្រយុទ្ធគ្នានេះ បានបណ្តាលឲ្យមនុស្សស្លាប់និងរងរបួសរាប់សិបនាក់ទាំងខាងចលនាឧទ្ទាមនឹងទាំងខាងប្រជាជនស៊ីវីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ