អ៊ីរ៉ាក់៖យុទ្ធនាការដណ្តើមទីក្រុងមូស៊ូលកំពុងបន្ត តែលោកអូបាម៉ាទស្សន៍ទាយថាលំបាក និងប្រើពេលយូរ
ចុះផ្សាយនៅថ្ងៃ៖
ស្តាប់ - ០៧:២៤
នៅក្នុងប្រទេសអ៊ីរ៉ាក់ យុទ្ធនាការវាយដណ្តើមទីក្រុងមូស៊ូលពីកណ្តាប់ដៃពួកជីហាតអង្គការរដ្ឋអ៊ីស្លាមបានឈានចូលដល់ថ្ងៃទី៣នាថ្ងៃពុធ ទី១៩ តុលានេះ។ គឺជាយុទ្ធនាការដែលកំពុងចូលរួមដោយកម្លាំងទ័ពថ្មើរជើងអ៊ីរ៉ាក់ជាច្រើនពាន់នាក់ ព្រមទាំងមានការគាំទ្រតាមផ្លូវអាកាសពីកម្លាំងសម្ព័ន្ធអន្តរជាតិដឹកនាំដោយអាមេរិក។ អាមេរិកដែលលោកប្រធានាធិបតីអូបាម៉ាបានទស្សន៍ទាយថា ប្រតិបត្តិការដណ្តើមយកមូស៊ូលមានការលំបាក និងប្រើពេលយូរ។ ដោយឡែក ប្រទេសតួកគីក៏បានប្រកាសឲ្យដឹងពីការចូលរួមជាមួយកម្លាំងសម្ព័ន្ធមិត្តអន្តរជាតិដែរ តែភាពតានតឹងកំពុងបន្តមានរវាងតួកគី និងអ៊ីរ៉ាក់។
តុល្យការនៃយុទ្ធនាការវាយដណ្តើមទីក្រុងមូស៊ូលនៅអ៊ីរ៉ាក់ពីកណ្តាប់ដៃអង្គការអ៊ីស្លាមរយៈពេល ២ថ្ងៃកន្លងទៅទទួលបានលទ្ធផលវិជ្ជមាន។ វិជ្ជមានព្រោះទ័ពថ្មើរជើងអ៊ីរ៉ាក់ដែលមានការគាំទ្រផ្លូវអាកាសពីកម្លាំងសម្ព័ន្ធមិត្តដឹកនាំដោយអាមេរិកបានរុលទៅមុខ និងកំពុងបន្តរុលទៅមុខជាបណ្តើរៗឈ្មោះទៅកាន់ទីក្រុងមូស៊ូល។ មានស្រុក និងសង្កាត់ជាច្រើនត្រូវបានរំដោះពីកណ្តាប់ដៃពួកជីហាតអង្គការរដ្ឋអ៊ីស្លាម។ តែមុននឹងដកខ្លួនចេញពីស្រុក និងសង្កាត់ទាំងនោះ ពួកជីហាតបានដាក់ពង្រាយគ្រាប់មីន និងគ្រឿងផ្ទុះផ្សេងៗនៅលើដីពាសវាលពាសកាលដែលធ្វើឲ្យទ័ពអ៊ីរ៉ាក់ពិបាកចូលទៅកាន់ទីកន្លែងទាំងនោះ។
កម្លាំងសម្ព័ន្ធអន្តរជាតិក៏បានប្រាប់ឲ្យដឹងថា ការវាយប្រហារនៅថ្ងៃទី១ បានកម្ទេចផ្ទាំងស៊ីបរបស់អង្គការរដ្ឋអ៊ីស្លាមចំនួន ៥២កន្លែង។ កំណត់សម្គាល់មួយទៀត នៅពេលដែលទ័ពអ៊ីរ៉ាក់ធ្វើដំណើររុលទៅមុខដណ្តើមយកស្រុក និងសង្កាត់ម្តងមួយៗជុំវិញទីក្រុងមូស៊ូល ពួកជីហាតក៏បានដកខ្លួនថយឆ្ពោះទៅកាន់ទីក្រុងមូស៊ូល ហើយជនស៊ីវិលក៏បានភៀសខ្លួនក្នុងទិសដៅដូចគ្នា។ គួរបញ្ជាក់ថា អង្គការរដ្ឋអ៊ីស្លាមមានកម្លាំងប្រដាប់អាវុធនៅមូស៊ូលពី៣ ០០០ ទៅ ៤ ៥០០នាក់។ តែគេអាចនិយាយបានថា កម្លាំងទ័ពអ៊ីរ៉ាក់មានប្រៀបជាងពួកជីហាតទាំងចំនួនទ័ព និងគ្រឿងសព្វាវុធ។
ថ្នាក់ដឹកនាំបស្ចិមលោកទូទៅបានសម្តែងការពេញចិត្តលើលទ្ធផលដែលទទួលបានក្នុងរយៈពេល ២ថ្ងៃ តែបានទទួលស្គាល់ដូចគ្នាថា ប្រតិបត្តិការនៅមូស៊ូលមានការលំបាក និងអាចប្រើពេលយូរ។ លោករដ្ឋមន្រ្តីការពារជាតិបារាំង Jean-Yves Le Drian បានបញ្ជាក់ថា អាចនឹងប្រើពេលជាច្រើនសប្តាហ៍ ឬមួយជាច្រើនខែផងក៏មិនដឹង។ ចំណែកលោកប្រធានាធិបតីអាមេរិកអូបាម៉ាក៏បានទស្សន៍ទាយដូចគ្នា និងសន្និដ្ឋានថា ជោគជ័យនៅមូស៊ូលជាបរាជ័យរបស់អង្គការរដ្ឋអ៊ីស្លាមទាំងស្រុង។
សហគមន៍អន្តរជាតិបារម្ភពីជនស៊ីវិលរស់ក្នុងទីក្រុងមូស៊ូល
មូស៊ូលជាទីក្រុងធំទី២ របស់អ៊ីរ៉ាក់ដែលបានធ្លាក់ក្នុងកណ្តាប់ដៃអង្គការរដ្ឋអ៊ីស្លាមតាំងពីខែមិថុនា ឆ្នាំ ២០១៤។ ជាង ២ឆ្នាំកន្លងទៅនេះ អង្គការរដ្ឋអ៊ីស្លាមបានកែប្រែទីក្រុងមូស៊ូលទៅជាទីស្នាក់ការកណ្តាល ឬអាចថាជាអគ្គមេបញ្ជាការដ្ឋានរបស់ពួកគេជាមួយនឹងដែនដីមួយភាគរបស់ប្រទេសស៊ីរី។ បច្ចុប្បន្ននេះ មានពលរដ្ឋអ៊ីរ៉ាក់ប្រមាណជា ១ ៥០០ ០០០នាក់កំពុងរស់នៅក្នុងទីក្រុងមូស៊ូលក្រោមការគ្រប់គ្រងរបស់អង្គការរដ្ឋអ៊ីស្លាម។ គួររម្លឹកជូនថានៅអ៊ីរ៉ាក់ ពលរដ្ឋភាគច្រើនជាអ្នកកាន់សាសនាអ៊ីស្លាមនិកាយឈីអ៊ីត តែនៅក្នុងទីក្រុងមូស៊ូលមានភាគច្រើនជាអ្នកកាន់សាសនាអ៊ីស្លាមនិកាយស៊ុយនីត។
ខណៈនេះ រដ្ឋាភិបាលអ៊ីរ៉ាក់ និងកម្លាំងសម្ព័ន្ធមិត្តលែងមានមន្ទិលសង្ស័យអ្វីទៀតឡើយក្នុងការដណ្តើមយកទីក្រុងមូស៊ូលពីអង្គការរដ្ឋអ៊ីស្លាម។ តែអ្វីដែលនៅសង្ស័យ គឺមិនមែនងាយស្រួល ប្រើពេលយូរ និងមិនដឹងដណ្តើមយកបានវិញនៅពេលណា។ ក្តីបារម្ភខ្លាំងរបស់សហគមន៍អន្តរជាតិពេលនេះ គឺជោគវាសនាជនស៊ីវិល ១លាន ៥សែននាក់ដែលកំពុងរស់នៅក្នុងទីក្រុងមូស៊ូលសព្វថ្ងៃ។ ចង់ ឬមិនចង់ អង្គការរដ្ឋអ៊ីស្លាមអាចយកជនស៊ីវិលធ្វើជាខែលដើម្បីទប់ទល់នឹងការវាយប្រហាររបស់ទ័ពអ៊ីរ៉ាក់ និងកម្លាំងសម្ព័ន្ធមិត្តអន្តរជាតិ។ ធ្ងន់ធ្ងរជាងនេះ ពួកជីហាតអាចនឹងធ្វើការសម្លាប់រង្គាលលើជនស៊ីវិលដើម្បីជាការសងសឹក។
មានអង្គការមនុស្សធម៌ជាច្រើនបានសំណូមពរឲ្យបង្កើតតំបន់ជុំវិញទីក្រុងមូស៊ូលដើម្បីទទួលជនស៊ីវិលដែលរត់ចេញ។ តែបញ្ហានៅត្រង់ថា ពួកជីហាតអាចរារាំងមិនឲ្យជនស៊ីវិលរត់គេចខ្លួន។ ចំណែកចំណោតមួយទៀតលើកឡើងដោយអង្គការសហប្រជាជាតិ គឺគ្រោះមហន្តរាយមនុស្សធម៌ដែលនឹងកើតឡើងដោយចៀសមិនរួច។
ភាពតានតឹងកំពុងបន្តមានរវាងតួកគី និងអ៊ីរ៉ាក់
នៅថ្ងៃអង្គារ ទី១៨ តុលា ប្រទេសតួកគីតាមរយៈលោកប្រធានាធិបតី លោកនាយករដ្ឋមន្រ្តី និងលោករដ្ឋមន្រ្តីការពារជាតិប្រកាសឲ្យដឹងពីការចូលរួមរបស់តួកគីជាមួយកម្លាំងសម្ព័ន្ធមិត្តអន្តរជាតិដឹកនាំដោយអាមេរិកនៅក្នុងយុទ្ធនាការដណ្តើមទីក្រុងមូស៊ូលពីពួកជីហាតអង្គការរដ្ឋអ៊ីស្លាម។ តែគេពិបាកនឹងដឹងថា តើយន្តហោះចម្បាំងតួកគីបានចូលរួមទម្លាក់គ្រាប់បែកហើយ ឬនៅ។ អ្វីដែលគេដឹង អ៊ីរ៉ាក់មិនបានស្វាគមន៍វត្តមានកម្លាំងទ័ពតួកគីទេ។
នៅក្នុងជម្លោះអ៊ីរ៉ាក់សព្វថ្ងៃ តួកគីបានប្រកាន់ជំហរមួយមិនច្បាស់លាស់តាំងពីដើម។ តួកគីបានបញ្ជូនទាហានរបស់ខ្លួនជាច្រើនរយនាក់ទៅក្នុងប្រទេសអ៊ីរ៉ាក់ តែភាគច្រើនជាគ្រូទៅជួយហ្វឹកហ្វឺនកម្លាំងប្រដាប់អាវុធស្ម័គ្រចិត្តនិកាយស៊ុយនីតស្ថិតក្បែរទីក្រុងមូស៊ូល។ ជំហរតួកគីរបៀបនេះបានធ្វើឲ្យរដ្ឋាភិបាលអ៊ីរ៉ាក់មិនពេញចិត្ត និងបានស្នើតួកគីឲ្យដកទ័ពទាំងនេះចេញពីទឹកដីខ្លួនវិញ។ ទីក្រុងបាកដាដថែមទាំងហៅវត្តមានទាហានតួកគីទាំងនេះថាជាកម្លាំងឈ្លានពាន។
ទន្ទឹមគ្នានេះ ទំនាក់ទំនងតានតឹងរវាងតួកគី និងអ៊ីរ៉ាក់ក៏កើតចេញពីភាពតានតឹងផ្នែកសាសនាដែរ។ នៅក្រោយបរាជ័យរបស់អង្គការរដ្ឋអ៊ីស្លាមនៅទីក្រុងមូស៊ូលនាថ្ងៃណាមួយ តួកគីមិនចង់ឃើញទីក្រុងអ៊ីរ៉ាក់មួយនេះធ្លាក់ទៅក្នុងដៃកម្លាំងប្រដាប់អាវុធឈីអ៊ីត ឬមួយកម្លាំងគួដស្និទ្ធនឹងពួក PKK ដែលជាសត្រូវរបស់តួកគីទេ។ សម្រាប់តួកគី មូស៊ូលជាទីក្រុងប្រវត្តិសាស្រ្តសំខាន់ណាស់ ហើយមានអ្នកជាតិនិយមតួកគីខ្លះថែមទាំងហ៊ាននិយាយថា មូស៊ូលជារបស់តួកគីដែលត្រូវបានធ្លាក់ក្នុងដៃអ៊ីរ៉ាក់នៅក្រោយសង្រ្គាមលោកលើកទី២។
លោកប្រធានាធិបតីតួកគីបានព្រមានរួចហើយថា តួកគីនឹងចូលរួមនៅក្នុងយុទ្ធនាការរំដោះទីក្រុងមូស៊ូលពីកណ្តាប់ដៃអង្គការរដ្ឋអ៊ីស្លាម បើទោះបីជាកម្លាំងសម្ព័ន្ធមិត្តយល់ព្រម ឬមិនយល់ព្រមក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ