អ.ស.ប.-អ៊ីរ៉ាក់៖អង្គការរដ្ឋអ៊ីស្លាមបានសម្លាប់មនុស្ស ២៣២នាក់ក្បែរទីក្រុងមូស៊ូល
នៅក្នុងប្រទេសអ៊ីរ៉ាក់ ប្រតិបត្តិការរំដោះទីក្រុងមូស៊ូលបានឈានចូលដល់ថ្ងៃទី១១ នាថ្ងៃសុក្រ ទី២៨ តុលានេះ។ នៅក្នុងប្រតិបត្តិការវាយប្រហារដែលបានចាប់ផ្តើមកាលពីថ្ងៃទី១៧ តុលា ទ័ពថ្មើរជើងអ៊ីរ៉ាក់ដោយមានការគាំទ្រផ្លូវអាកាសពីកម្លាំងសម្ព័ន្ធមិត្តកំពុងបន្តរុលទៅមុខកាន់តែជិតទ្វារទីក្រុងមូស៊ូល។ តុល្យការដំបូងនៃប្រតិបត្តិរយៈពេល ១១ថ្ងៃកន្លងទៅត្រូវបានប្រកាសដោយមេបញ្ជាការអាមេរិកាំងលោក Joseph Votel នាថ្ងៃព្រហស្បតិ៍ ទី២៧ តុលា។ ដោយឡែកនៅថ្ងៃនេះ អង្គការសហប្រជាជាតិបានប្រាប់ឲ្យដឹងថា ពួកជីហាតបានសម្លាប់មនុស្ស ២៣២នាក់នៅក្បែរទីក្រុងមូស៊ូល។
ចុះផ្សាយនៅថ្ងៃ៖
ស្តាប់ - ០២:២៩
ដំណឹងសម្លាប់រង្គាលពលរដ្ឋអ៊ីរ៉ាក់ដោយពួកជីហាតអង្គការរដ្ឋអ៊ីស្លាមក្បែរទីក្រុងមូស៊ូលត្រូវបានប្រកាសដោយលោកស្រី Ravina Shamdasani អ្នកនាំពាក្យក្រុមប្រឹក្សាសិទ្ធិមនុស្សអង្គការសហប្រជាជាតិនាឱកាសសន្និសីទកាសែតក្នុងទីក្រុងហ្សឺណែវ។ យោងតាមលោកស្រី Ravina ក្នុងចំណោមមនុស្សទាំង ២៣២នាក់ដែលពួកជីហាតបានសម្លាប់ មាន ១៩០នាក់ជាអតីតសមាជិកនៃសេវាសន្តិសុខ និង ៤០នាក់ជាជនស៊ីវិលដែលមិនព្រមស្តាប់បញ្ជារបស់ពួកជីហាត។ ក្រៅពីសម្លាប់ចោលភ្លាមៗ ពួកជីហាតក៏បានកែនប្រមូលមនុស្សជាច្រើនពាន់នាក់នៅជុំវិញទីក្រុងមូស៊ូលដើម្បីធ្វើជាខែលទប់ស្កាត់ការវាយប្រហារពីអាកាសរបស់កម្លាំងអន្តរជាតិ។
ដោយឡែកនៅថ្ងៃព្រហស្បតិ៍ ទី២៧ តុលា មេបញ្ជាការអាមេរិកាំងលោក Joseph Votel បានប្រកាសឲ្យដឹងនូវតុល្យការលើកដំបូងស្តីពីប្រតិបត្តិការរំដោះទីក្រុងមូស៊ូលរយៈពេល ១១ថ្ងៃកន្លងទៅ។ តាមលោក Votel ទាហានអ៊ីរ៉ាក់សម្លាប់បានពួកជីហាតពី ៨០០ ទៅ ៩០០នាក់ និងថា លោកពិបាកនឹងផ្តល់តួលេខជាក់ស្តែងដោយសារតែពួកជីហាតបានធ្វើការបំលាស់ទីជាក្រុមតូចៗនៅជុំវិញទីក្រុងមូស៊ូល និងព្យាយាមបន្លំខ្លួនជាមួយហ្វូងប្រជាជន។ ចំណែកនៅខាងទ័ពអ៊ីរ៉ាក់ និងកម្លាំងប្រដាប់អាវុធគួដឌីស្ថានវិញត្រូវបានលោក Votel ទម្លាយឲ្យដឹងថា មានស្លាប់ ៥៧នាក់ និងរបួស ២៥៥នាក់ខាងទ័ពអ៊ីរ៉ាក់ ព្រមទាំងស្លាប់ ៣០នាក់ និងរបួសពី ៧០ ទៅ ១០០នាក់នៅខាងពួកគួដឌីស្ថាន។
អ្វីដែលសហគមន៍អន្តរជាតិកំពុងព្រួយបារម្ភខ្លាំងនោះ គឺការរត់ភៀសខ្លួនក្រោមទ្រង់ទ្រាយធំរបស់ជនស៊ីវិលប្រមាណជា ១លាន ៥សែននាក់នៅក្នុងទីក្រុងមូស៊ូល។ តួលេខផ្តល់ដោយរដ្ឋាភិបាលអ៊ីរ៉ាក់ឲ្យដឹងថា ខណៈនេះ មានជនស៊ីវិលជាង ១១ ៧០០នាក់បានរត់ចេញពីទីក្រុងមូស៊ូល តែតួលេខរបស់អង្គការសហប្រជាជាតិមានដល់ទៅជាង ១៥ ០០០នាក់។ យ៉ាងណាក៏ដោយ ទីភ្នាក់ងារមនុស្សធម៌នានាបានប្រមើលទុកថា អាចនឹងអ្នករត់ភៀសខ្លួនដល់ទៅ ២០០ ០០០នាក់នាប៉ុន្មានថ្ងៃខាងមុខ។
រហូតមកដល់ពេលនេះ ប្រតិបត្តិការរំដោះទីក្រុងមូស៊ូលរយៈពេល ១១ថ្ងៃកន្លងទៅទទួលបានលទ្ធផលវិជ្ជមានគួរឲ្យកត់សម្គាល់។ ចំណែកលោកប្រមុខការពារជាតិអាមេរិកអាស្តុន កាទ័របានបង្ហើបឲ្យដឹងថា បន្ទាប់ពីទីក្រុងមូស៊ូល ប្រទេសអ៊ីរ៉ាក់ សហគមន៍អន្តរជាតិនឹងបើកសមរភូមិថ្មីរំដោះទីក្រុងរ៉ាក់កាប្រទេសស៊ីរីទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ