ភេរវកម្មសម្លាប់ប៉ូលិស៣០នាក់ នៅតួកគី
ភេរវកម្មបំផ្ទុះគ្រាប់បែក កាលពីយប់ថ្ងៃសៅរ៍ទី ១០ធ្នូ នៅខាងក្រៅរបងស្តាត ក្នុងទីក្រុងអ៊ីស្តង់ប៊ូល របស់តួកគី បានសម្លាប់មនុស្សយ៉ាងតិច ៣៨នាក់ និងរបួស១៦៦នាក់។ តាមរដ្ឋាភិបាលតួកគី តម្រុយស៊ើបអង្កេតបានបង្ហាញបណ្តើរៗហើយថា គឺក្រុមទាមទារបំបែកទឹកដី គួដ ដែលជាអ្នករៀបចំភេរវកម្មសម្លាប់មនុស្ស កាលពីយប់ថ្ងៃសៅរ៍។
ចុះផ្សាយនៅថ្ងៃ៖
ស្តាប់ - ០១:៣៨
រដ្ឋាភិបាលតួកគីបានប្រកាសថ្ងៃកាន់ទុក្ខជាតិ នៅថ្ងៃអាទិត្យនេះ បន្ទាប់ពីទីក្រុងអ៊ីស្តង់ប៊ូលបានរងការវាយប្រហារជាថ្មីពីសំណាក់ក្រុមភេរវជន។ នៅយប់ថ្ងៃសៅរ៍ម្សិលមិញ ភេរវកម្មបំផ្ទុះគ្រាប់បែក បានកើតមាន ពីរលើក ផ្ទួនៗគ្នា នៅខាងក្រៅរបងស្តាត គឺនៅពីរម៉ោងក្រោយ ចប់ការប្រកួតបាល់ទាត់។ គ្រាប់បែកទីមួយផ្ទុះចេញពីរថយន្តដែលចតចោលនៅមុខទីស្នាក់ការប៉ូលិស និងគ្រាប់បែកទីពីរផ្ទុះចេញពីអត្តឃាតជន ដែលត្រូវចោមរោម ចោទសួរពីប៉ូលិស នៅសួន ក្បែរស្តាត។
សម្រាប់ប្រធានាធិបតីតួកគី លោករេស៊ីប អ៊ែដូហ្កាន ភេរវកម្មសំដៅប៉ូលិសរក្សាសន្តិសុខ ហើយនិងជនស៊ីវិល នៅយប់ម្សិលមិញ បានស្តែងយ៉ាងច្បាស់ថា ក្រុមភេរវជនមានគោលដៅ សម្លាប់ជីវិតមនុស្សឲ្យបានច្រើនបំផុត។
នៅក្រោយការវាយប្រហារភេរវកម្ម មនុស្សជាង១០នាក់ ត្រូវបានអាជ្ញាធរតួកគី ចាប់ឃាត់ខ្លួន។ រហូតមកដល់ម៉ោងនេះ នៅមិនទាន់មានក្រុមណាមួយ ប្រកាសចេញមុខទទួលខុសត្រូវនៅឡើយទេ។ ប៉ុន្តែ រដ្ឋមន្រ្តីក្រសួងមហាផ្ទៃតួកគី នៅព្រឹកថ្ងៃអាទិត្យនេះ បានអះអាងថា ភស្តុតាង ដែលរកបានការស៊ើបអង្កេត បានបង្ហាញថា គឺឧទ្ទាមគួដ ដែលជាអ្នករៀបចំ វាយប្រហារភេរវកម្ម កាលពីយប់ថ្ងៃសៅរ៍។
មានព្រំដែនជាប់ប្រទេសស៊ីរី តួកគី ដែល ស្ថិតនៅក្បែរជង្រុកក្រុមភេរវនិយម បានធ្លាក់ខ្លួន ទទួលរងការវាយប្រហារ សឹងរៀងរាល់ខែ ចាប់តាំងពីពាក់កណ្តាលឆ្នាំ ២០១៥។ គិតមកត្រឹមភេរវកម្មនៅថ្ងៃសៅរ៍ម្សិលមិញ តួកគីទទួលរងភេរវកម្មយ៉ាងតិច ១២លើក ដែលរដ្ឋាភិបាលបានចោទទម្លាក់ការទទួលខុសត្រូវទៅលើក្រុមជីហាតអង្គការរដ្ឋអ៊ីស្លាម ហើយនិងក្រុមឧទ្ទាមគួដដែលជាសត្រូវ របស់រដ្ឋាភិបាលតួកគី។ តាមរដ្ឋាភិបាលតួកគី គឺក្រុមសកម្មប្រយុទ្ធគួដ ដែលជាម្ចាស់ធ្វើភេរវកម្ម សម្លាប់ប៉ូលិស និងទាហានតួកគី រហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ