Hollande គាំទ្រការដឹកជំលៀសប្រជាជននៅអាឡិបក្រោមការត្រួតពិនិត្យរបស់អន្តរជាតិ
នៅប្រទេសបារាំង កាលពីម្សិលមិញ លោកប្រធានាធិបតីFrançois Hollande បានថ្លែងគាំទ្រ ឲ្យមានការដឹកជំលៀសប្រជាជននៅអាឡិបក្រុងធំទីពីររបស់ប្រទេសស៊ីរីក្រោមការត្រួតពិនិត្យពីសំណាក់ក្រុមអ្នកសង្កេតការណ៍អន្តរជាតិផង ក៏ទាំង វត្តមានរបស់ក្រុមអង្គការមនុស្សធម៌ផងដែរ។
ចុះផ្សាយនៅថ្ងៃ៖
ស្តាប់ - ០២:០៩
ពីបញ្ហាដឹកជំលៀសប្រជាជនអាឡិបពីក្រុងអាឡិប លោកប្រធានាធិបតីបារាំង François Hollande នៅថ្ងៃពុធម្សិលមិញ បានស្នើសុំឲ្យមានការដឹកជំលៀសប្រជាជនស៊ីវីលស៊ីរីចេញពីអាឡិប ដោយស្ថិតនៅក្រោមការត្រួតពិនិត្យរបស់ក្រុមអ្នកសង្កេតការណ៍អន្តរជាតិនិងដោយមានវត្តមានរបស់អង្គការមនុស្សធម៌នានា។
ប្រធានាធិបតីបារាំង បានគូសបញ្ជាក់ទៀតថា ចំណែកជំនួយមនុស្សធម៌វិញ ក៏ត្រូវរៀបចំឡើងជាបន្ទាន់ដែរ ដើម្បីយកទៅជួយដល់ប្រជាជនដែលកំពុងរងគ្រោះជាប់កុននៅអាឡិប។
ក្រោយពីកិច្ចរួមប្រជុំមួយរបស់ក្រុមប្រឹក្សាការពារជាតិនិងសន្តិសុខជាតិរួចមក លោក ប្រធានាធិបតីបារាំង បានស្នើ ឲ្យចាត់វិធានការសព្វគ្រប់ ដើម្បីអាចធ្វើការដឹកជំលៀសប្រជាជននៅអាឡិបដោយសេចក្តីថ្លៃថ្នូរនិងដោយសុវត្ថិភាព។
វិមានប្រធានាធិបតីបារាំង l’Elysée បានជូនជាយោបល់ទៀតថា ជំនួយនិងកិច្ចការពារជាបន្ទាន់ ត្រូវពាំនាំយកទៅជួយប្រជាជនស៊ីរីទាំងអស់ ដែលរស់នៅភាគខាងកើតក្រុងអាឡិបដោយឥតរើសអើងនិងដោយស្របទៅតាមច្បាប់មនុស្សធម៌អន្តរជាតិ។ លើសពីនេះ កិច្ចចរចាស្តីពីការផ្លាស់ប្តូរនយោបាយនៅក្នុងប្រទេសស៊ីរី គឺជាការចាំបាច់បំផុតមួយ ដើម្បីឲ្យបានទទួលជោគជ័យមួយជាស្ថាពរនៅក្នុងការប្រយុទ្ធប្រឆាំងទល់នឹងភេរវនិយមនៅប្រទេសស៊ីរី។
ស្របគ្នានេះ អ្នកនាំពាក្យរបស់រដ្ឋាភិបាលបារាំងលោក Stéphane Le Foll បានទាមទារឲ្យមានការបើកច្រករបៀង ដើម្បីអនុញាតឲ្យប្រជាជនស៊ីវីល អាចជំលៀសចេញពីក្រុងអាឡិបផងនិង អនុញ្ញាតផងដែរ ដល់អង្គការមនុស្សធម៌នានា ក្នុងការចូលទៅដល់ក្រុងអាឡិប។
ចំណែកលោកស្រី Anne Hidalgo ចៅហ្វាយទីក្រុងប៉ារីសវិញ ក្នុងគោលបំណងដើម្បីសាមគ្គីភាពជួយគាំទ្រដល់ប្រជាជនស៊ីវីលនៅអាឡិប បានសម្រេចចិត្តបិទភ្លើងមិនបំភ្លឺTour Eiffel ក្នុងយប់ថ្ងៃពុធម្សិលមិញដែរចាប់ពីម៉ោង២០យប់។
វិធានការជានិមិត្តរូបដោយមិនបំភ្លឺភ្លើងនៅ Tour Eiffel កាលពីយប់ម្សិលមិញនេះ គឺជាសញ្ញាមួយដើម្បីធ្វើការអំពាវនាវផងដែរដល់សហគមន៍អន្តរជាតិក្នុងការជួយជ្រោមជ្រែងជាបន្ទាន់ដល់ប្រជាជនរងគ្រោះស៊ីរីនៅអាឡិប-នេះជាការបញ្ជាក់បន្ថែមរបស់ចៅហ្វាយក្រុងបារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ