ភេរវកម្មអត្តឃាតសំដៅសម្លាប់ទាហាន នៅយេម៉ែន
យេម៉ែនរងការវាយប្រហារភេរវកម្មមិនលោះថ្ងៃ។ នៅព្រឹកថ្ងៃអាទិត្យនេះ ភេរវកម្មអត្តឃាតមួយ បានផ្ទុះឡើងនៅអាដែន ទីក្រុងធំទី២របស់យេម៉ែន ដោយបានសម្លាប់ទាហាន៤០នាក់ និងរបួសជាង៥០នាក់។ ក្នុងរយៈពេល៤ខែចុងក្រោយ នេះជាលើកទី៣ដែលទាហានរដ្ឋាភិបាលយេម៉ែន គាំទ្រដោយប្រទេសអារ៉ាប៊ី សាអូឌីត ក្លាយជាផ្ទាំងស៊ីប រងការវាយប្រហារ ភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
នៅទីក្រុងអាដែន អត្តឃាតជនបានឆ្លៀតពេលក្រុមទាហានយេម៉ែន ជួបប្រជុំគ្នា នៅមុខបន្ទាយ ដើម្បី ចុចបំផ្ទុះគ្រាប់បែក នៅលើខ្លួន។ តាមអ្នកទទួលខុសត្រូវយោធាយេម៉ែន នៅព្រឹកថ្ងៃអាទិត្យនេះ អត្តឃាតជនបានបន្លំខ្លួនចូលក្នុងចំណោមទាហានយេម៉ែន រាប់រយនាក់ ដែលកំពុងតម្រង់ជួរ រង់ចាំបើកប្រាក់ខែ ពីមេរបស់ខ្លួន។
តាមប្រធានមន្ទីរពេទ្យស្រុក ចំនួនទាហានស្លាប់ដោយគ្រាប់បែករបស់អត្តឃាតជន នឹងអាចកើនឡើង ច្រើនជាង ៤០នាក់ បើមើលទៅទៅលើស្ថានភាពធ្ងន់ធ្ងររបស់ទាហានរងរបួស។ ភេរវកម្មនៅព្រឹកថ្ងៃអាទិត្យមានលក្ខណៈដូចគ្នាបេះបិទនឹងភេរវកម្ម កាលពីមួយសប្តាហ៍មុន ដែលបានសម្លាប់ទាហានរដ្ឋាភិបាលយេម៉ែន ៤៨នាក់ ដែលបានឈរប្រជុំគ្នា ចាំបើកប្រាក់ខែ។ ក្រុមជីហាត អង្គការរដ្ឋអ៊ីស្លាម បានចេញមុខទទួលខុសត្រូវលើភេរវកម្មអត្តឃាត កាលពីសប្តាហ៍មុន ហើយនិងភេរវកម្មសម្លាប់ក្រុមយុវជន ៧១នាក់ ផ្សេងទៀត ដែលរដ្ឋាភិបាល យេម៉ែន ទើបបានរើសបញ្ចូល។
ក្រុមជីហាតអង្គការរដ្ឋអ៊ីស្លាម ហើយនិងក្រុមអាល់កៃដា បានឆ្លៀតឱកាសដែលយេម៉ែន កំពុងជួបភាពវឹកវរផ្នែកនយោបាយ ហើយនិងអសន្តិសុខ ដើម្បីអុកឡុក ប្រឆាំងថែមទៀតនឹងរដ្ឋាភិបាលយេម៉ែន ដែលគាំទ្រ ដោយសហគមន៍អន្តរជាតិ និងដែលទទួលបានជំនួយយោធាពីប្រទេសអារ៉ាប៊ី សាអូឌីត។ គឺនៅអារ៉ាប៊ី សាអូឌីត ដែលប្រមុខការបរទេសអាមេរិក ចន ឃេរីកំពុងបំពេញទស្សនកិច្ច ដើម្បីពិភាក្សាពីជម្លោះក្នុងតំបន់ ជាពិសេស ជម្លោះប្រដាប់អាវុធ នៅយេម៉ែន រវាងកងទ័ពរដ្ឋាភិបាល ហើយនិងក្រុមហ៊ូទីស្ស ដែលកំពុងកាន់កាប់រដ្ឋធានី សាណា របស់យេម៉ែន។ តាមអង្គការសហប្រជាជាតិ ជម្លោះប្រដាប់អាវុធ ជិត ២ឆ្នាំ នៅយេម៉េន បានសម្លាប់មនុស្ស ៧ពាន់នាក់ និងអ្នករបួស៣ម៉ឺន ៧ពាន់ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ