អ៊ីស្រាអែល រងការវាយប្រហារដោយបើកឡានកិនស្លាប់ទាហានអស់បួននាក់
មានស្លាប់យ៉ាងហោចណាស់ទាហានអ៊ីស្រាអែល ៤នាក់ និងរបួសជាង១០នាក់ នៅក្នុងការវាយប្រហារ ដោយ បើកឡានកិនមនុស្សដើរ នៅក្រុងហ្សេរ៉ុយសាឡិម តាមបណ្តោយផ្លូវថ្នើរជើង ឆ្ពោះទៅកាន់ទីលានកំសាន្តសាធារណៈ។ ទីលានដែលគេអាចគយគន់ជញ្ជាំងក្រុងចាស់របស់ហ្សេរុយសាឡិម។ នេះបើតាមប្រភពប៉ូលិសអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យប៉ូលិសអ៊ីស្រាអែល បានប្រកាសភ្លាម ថា នេះជាការវាយប្រហារភេរវកម្ម ! ដែលជាស្នាដៃរបស់អ្នកបើកឡានកាមីញ៉ុង ជាតិប៉ាឡេស្ទីន ធ្វើដំណើរមកពីក្រុងហ្សេរុយសាឡិមខាងកើត។ ប៉ុន្តែប៉ូលិសអ៊ីស្រាអែល ពុំបង្ហាញអត្តសញ្ញាណលម្អិតរបស់អ្នកបើកឡាននោះទេ។
សាក្សីអ៊ីស្រាអែលម្នាក់ទៀត ជាបានរៀបរាប់ប្រាប់វិទ្យុជាតិថា ឡានកាមីញ៉ុង បានបើកសំរុកទៅបុកក្រុមទាហានអ៊ីស្រាអែល ដែលកំពុងចុះពីឡានក្រុង ឈប់នៅក្បែរទីលានសាធារណៈរបស់ក្រុងហ្សេរុយសាឡិម។ ទាហានក៏បានលើកកាំភ្លើងបាញ់តបវិញភ្លាម តែតៃកុងឡានបានបើកថយ ហើយជាន់លេខរុលមកកិនក្រុមទាហានអ៊ីស្រាអែលជាថ្មី។ ក្រុមទាហាននាំគ្នាបាញ់លើឡាន រហូតទាល់តែសម្លាប់អ្នកបើកបាន។
ដោយសារសកម្មភាពបែបនេះហើយ បានជាប៉ូលិសអ៊ីស្រាអែលយល់ថាមិនមែនជាគ្រោះថ្នាក់ទេ។
សូមបញ្ជាក់ថា ការវាយប្រហារជាលក្ខណៈទោស ដោយចាក់នឹងកាំបិត ឬដោយបើកឡានកិនសម្លាប់ ពីសំណាក់ជនប៉ាឡេស្ទីន ប្រឆាំងនឹងអ៊ីស្រាអែល បានកើតឡើងច្រើនចាប់ពីខែតុលាឆ្នាំ២០១៥មក មិនថានៅស៊ីហ្សកដានី ឬនៅតំបន់ហ្កាហ្សា ឬនៅហ្សេរុយសាឡិមទេ។
អំពើហិង្សាមួយខ្សែកន្លងមកនេះ បានសម្លាប់ជីវិតអ៊ីស្រាអែលអស់ជាង៣០នាក់ អាមេរិកពីរនាក់ ហ្សកដានីម្នាក់ ... និងប៉ាឡេស្ទីនជាង២៣០នាក់ ក្នុងចំណោមនោះជាង១៥០នាក់ ជាជនដៃដល់ ជាជនជាប់សង្ស័យធ្វើការប្រហារប្រឆាំងនឹងអ៊ីស្រាអែល តាមរយៈសកម្មភាពប្រើកាំបិតចាក់មនុស្សជាដើម។
ហេតុការណ៍បើកឡានកិនសម្លាប់មនុស្សថ្ងៃអាទិត្យនេះ ប្រព្រឹត្តទៅតែប្រាំថ្ងៃក្រោយ ការកាត់ទោសទាហានអ៊ីស្រាអែលម្នាក់ ពីបទធ្វើឃាតមនុស្សដោយចេតនា ដោយបានបង្ហើយជីវិតជនដៃដល់ប៉ាឡេស្ទីនម្នាក់កំពុងរងរបួសស្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ