ប៉ាឡេស្ទីនព្រមានលោកត្រាំ កុំឲ្យលើកស្ថានទូតអាមេរិកទៅនៅJerusalem
ប្រមុខដឹកនាំប៉ាឡេស្ទីន លោកម៉ះមូត អាបាស់បានចេញមុខជាថ្មី ប្រឆាំងនឹងគម្រោងរបស់អនាគតប្រធានាធិបតីអាមេរិក លោកដូណាល់ ត្រាំ ដែលចង់លើកស្ថានទូតអាមេរិក ទៅនៅទីក្រុង Jerusalem។ សម្រាប់មេដឹកនាំប៉ាឡេស្ទីន បើសិនគម្រោងរបស់អាមេរិកចេញជារូបរាង នោះវានឹងបំផ្លាញដំណើរការស្វែងរកសន្តិភាពអ៊ីស្រាអែល ប៉ាឡេស្ទីន។ ជម្លោះអ៊ីស្រាអែល ប៉ាឡេស្ទីន គឺជាប្រធានបទសំខាន់នៃសន្និសីទក្រុងប៉ារីស ដែលត្រូវចូលរួមដោយប្រទេសចំនួន ៧០ និងបើកធ្វើនៅថ្ងៃអាទិត្យទី១៥មករា។
ចុះផ្សាយនៅថ្ងៃ៖ កែប្រែថ្ងៃទី៖
ប្រមុខដឹកនាំប៉ាឡេស្ទីនមិនបានព្រងើយកន្តើយ និងមើលស្រាលការសន្យារបស់លោកដូណាល់ ត្រាំ នោះទេ។ លោកដូណាល់ ត្រាំដែលនឹងស្បថចូលកាន់តំណែងជាប្រធានាធិបតីអាមេរិកនៅថ្ងៃទី ២០មករាខាងមុខ ធ្លាប់បាននិយាយសន្យា នៅក្នុងពេលឃោសនារកសំឡេងឆ្នោតថា លោកនឹងទទួលស្គាល់ Jerusalem ជារដ្ឋធានីរបស់អ៊ីស្រាអែល។ លោកបន្ថែមថា នៅពេលក្លាយជាប្រធានាធិបតីអាមេរិក នោះលោកនឹងបញ្ជាឲ្យលើកទីតាំងស្ថានទូតអាមេរិក ប្រចាំអ៊ីស្រាអែលដែលបច្ចុប្បន្ន នៅទីក្រុងតែលអាវីវ ឲ្យទៅនៅ Jerusalemវិញ។
នៅដើមសប្តាហ៍នេះ លោកម៉ះមូត អាបាសប្រធានរដ្ឋប៉ាឡេស្ទីន សរសេរសំបុត្រព្រមានទុកមុនកុំឲ្យលោកដូណាល់ ត្រាំ ទទួលស្គាល់ Jerusalemជារដ្ឋធានីរបស់អ៊ីស្រាអែល។ ពីរថ្ងៃក្រោយ លោកបានដាក់សំបុត្រមួយទៀត ទៅលោកប្រធានាធិបតីរុស្ស៊ី ដោយសុំឲ្យលោកពូទីនជួយអន្តរាគម ដើម្បីទប់ស្កាត់កុំឲ្យលោកដូណាល់ ត្រាំផ្ទេរស្ថានទូតអាមេរិកទៅនៅ Jerusalem ទៅតាមការសន្យារបស់លោក។
គេមិនអាចនិយាយអ្វីបានច្រើន ព្រោះអ្វីៗនៅមិនទាន់កើតឡើង។ ប៉ុន្តែ បើសិនស្ថានទូតអាមេរិក ប្រចាំអ៊ីស្រាអែល ត្រូវលើកទៅនៅ Jerusalem មែន នោះ វានឹងមិនជួយដំណើរស្វែងរកសន្តិភាព បង្កើតរដ្ឋពីរ អ៊ីស្រាអែល និងប៉ាឡេស្ទីនទេ។ នេះជាការអះអាងរបស់លោកម៉ះមូត អាបាស ទៅកាន់អ្នកកាសែត នៅពេលលោកចូលរួមសម្ពោធស្ថានទូតប៉ាឡេស្ទីន នៅបុរីវ៉ាទីកង់ កាលពីថ្ងៃសៅរ៍ ម្សិលមិញ។
នៅក្នុងបទសម្ភាសន៍ជាមួយកាសែតបារាំង Le Figaro ចេញផ្សាយនៅថ្ងៃសុក្រ ប្រមុខរដ្ឋប៉ាឡេស្ទីន បាននិយាយថា ការផ្ទេរស្ថានទូតអាមេរិក ទៅនៅ Jerusalem មិនត្រឹមតែធ្វើឲ្យអាមេរិកលែងមានសិទ្ធិតាមច្បាប់ ដើម្បីចូលរួមដោះស្រាយវិបត្តិប៉ាឡេស្ទីន និងអ៊ីស្រាអែល ប៉ុន្តែ វានឹងបំផ្លាញផងដែរ ការខិតខំស្វែងរកសន្តិភាពនៅក្នុងតំបន់។ លោកនៅបានព្រមានដែរថា បើសិនលោកដូណាល់ ត្រាំទទួលស្គាល់ Jerusalem ជារដ្ឋធានីរបស់អ៊ីស្រាអែល នោះប៉ាឡេស្ទីន ក៏នឹងសើរើ នយោបាយរបស់ខ្លួន ដែលទទួលស្គាល់ រដ្ឋអ៊ីស្រាអែល។ ទៅតាមកិច្ចព្រមព្រៀងអូស្លូ ឆ្នាំ ១៩៩៣ អ៊ីស្រាអែល និងប៉ាឡេស្ទីនបានទទួលស្គាល់គ្នាទៅវិញ ទៅមក ជារដ្ឋ រស់នៅជិតគ្នា។
ការសន្យារបស់លោកដូណាល់ ត្រាំ ដែលចង់ផ្ទេរស្ថានទូតអាមេរិកប្រចាំអ៊ីស្រាអែលទៅនៅទីក្រុង Jerusalem មិនត្រឹមបង្កឲ្យមានការព្រួយភ័យរបស់ប៉ាឡេស្ទីនតែប៉ុណ្ណោះទេ ប៉ុន្តែ វាបានបង្កឲ្យមានមតិរិះគន់ផងដែរពីប្រមុខការបរទេសអាមេរិក លោកចន ឃេរីដែលចាត់ទុក ជំហានរបស់លោកត្រាំថា អាចបង្កឲ្យផ្ទុះភ្លើងសង្រ្គាម នៅក្នុងតំបន់។
អីស្រាអែលបានទាមទារក្តោបយកតំបន់Jerusalem ជារដ្ឋធានីរបស់ខ្លួន។ អ៊ីស្រាអែលដែលបានចូលកាន់កាប់ដោយខុសច្បាប់ Jerusalemខាងកើត ដែលមានប្រជាជនរស់នៅភាគច្រើនជាជនជាតិប៉ាឡេស្ទីន ចង់បានផងដែរ Jerusalemខាងកើតជាផ្នែកមួយនៃរដ្ឋធានីរបស់ខ្លួន។ អាមេរិកតាំងស្ថានទូតរបស់ខ្លួននៅ Jerusalem គឺប្រៀបបាននឹងអាមេរិកទទួលស្គាល់វាជារដ្ឋធានីរបស់អ៊ីស្រាអែល ដែលការណ៍នេះបំផ្លាញទាំងស្រុងគំនិតប៉ងរបស់ប៉ាឡេស្ទីនដែលចង់បាន Jerusalemជាអនាគតរដ្ឋធានីរបស់ខ្លួន នៅក្រោយពេលចរចាសន្តិភាពជាមួយអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ