អ៊ីស្រាអែលបើកភ្លើងខៀវជាឲ្យសង់លំនៅឋានថ្មី នៅJérusalemខាងកើត
ពីរថ្ងៃក្រោយលោកដូណាល់ ត្រាំ ចូលស្បថ ក្លាយជាប្រធានាធិបតីអាមេរិកពេញច្បាប់ អ៊ីស្រាអែល ដែលធ្លាប់ទទួលការគាំទ្រពីលោកដូណាល់ ត្រាំ បានសម្រេច នៅថ្ងៃអាទិត្យ ផ្តល់ការអនុញ្ញាតឲ្យគេសង់ផ្ទះជាង ៥០០ នៅJérusalemខាងកើត ដែលសហគមន៍អន្តរជាតិបានចោទប្រកាន់អ៊ីស្រាអែលថា បានចូលកាន់កាប់ដោយខុសច្បាប់។ ធ្វើដូច្នេះ អ៊ីស្រាអែលកំពុងតែផ្គើននឹងសេចក្តីសម្រេចរបស់ក្រុមប្រឹក្សាសន្តិសុខរបស់អង្គការសហប្រជាជាតិដែល កាលពីខែធ្នូ បានបោះឆ្នោត ជាឯកច្ឆន្ទ ហាមឃាត់អ៊ីស្រាអែលឲ្យបញ្ឈប់រាល់ការសាងសង់សំនង់អាណានិគមកិច្ច ក្នុងតំបន់ដែលកំពុងជាប់មានជម្លោះជាមួយប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
សាលាក្រុងអ៊ីស្រាអែលនៅ Jérusalemខាងកើត នៅថ្ងៃអាទិត្យបានចេញប័ណ្ណអនុញ្ញាតសាជាថ្មី ឲ្យគេ សាងសង់លំនៅឋានចំនួន ៥៦០នៅក្នុងសង្កាត់បីរបស់ Jérusalemខាងកើត ដែលអ៊ីស្រាអែលចូលកាន់កាប់ ដោយខុសច្បាប់ ចាប់តាំងពីឈ្នះ សង្រ្គាមជាមួយអារ៉ាប់ នៅឆ្នាំ ១៩៦៧។ សាលាក្រុងអ៊ីស្រាអែលបានទទួលគម្រោងសុំសិទ្ធិសាងសង់លំនៅឋាន នៅ Jérusalemខាងកើតតាំងពីខែធ្នូ ប៉ុន្តែ ទៅតាមការទាមទាររបស់លោកនាយករដ្ឋមន្រ្តីអ៊ីស្រាអែល ដែលមិនចង់រងការរិះគន់ពីរដ្ឋបាលរបស់លោកអូបាម៉ា សាលាក្រុងបានសុខចិត្តផ្អាកគម្រោងមួយអន្លើសិន។
ដំណឹងបើកភ្លើងខៀវឲ្យមានការសាងសង់ជាថ្មី នៅJérusalem ខាងកើត កើតឡើង បន្ទាប់ពីប្រមុខរដ្ឋាភិបាលអ៊ីស្រាអែល បិនចាមីន នេតានីញ៉ាហ៊ូ បាននិយាយថា លោកនឹងពិភាក្សា តាមទូរស័ព្ទជាមួយលោកដូណាល់ ត្រាំ នៅថ្ងៃអាទិត្យ ដើម្បីនិយាយពីបញ្ហាអ៊ីស្រាអែល ប៉ាឡេស្ទីន ជម្លោះនៅស៊ីរី ហើយនិងនុយក្លេអ៊ែររបស់អ៊ីរ៉ង់។
នៅក្នុងវិទ្យុរដ្ឋអ៊ីស្រាអែល ប្រធានគណៈកម្មការទទួលបន្ទុកផែនការ និងសំណង់របស់សាលាក្រុងអ៊ីស្រាអែល បាននិយាយថា រដ្ឋាភិបាលបានសុំឲ្យលោករង់ចាំទាល់តែលោកដូណាល់ ត្រាំចូលកាន់តំណែងជាប្រធានាធិបតីអាមេរិក ព្រោះថា លោកដូណាល់ ត្រាំមិនប្រឆាំងនឹងការសាងសង់របស់អ៊ីស្រាអែលនៅ Jérusalemនោះទេ។
រហូតមក លោកដូណាល់ ត្រាំ ធ្លាប់បង្ហាញសមានចិត្ត គាំទ្រអ៊ីស្រាអែល។ នៅក្នុងយុទ្ធនាការឃោសនាបោះឆ្នោត លោកធ្លាប់ប្រកាសថា លោកនឹងទទួលស្គាល់ Jérusalemជារដ្ឋធានីអ៊ីស្រាអែល និងផ្ទេរស្ថានទូតអាមេរិកទៅនៅ Jérusalem នៅពេលលោកក្លាយជាប្រធានាធិបតីអាមេរិក។ កាលពីខែធ្នូកន្លងទៅ លោកបានបរិហាររិះគន់ខ្លាំងៗ ទាំងក្រុមប្រឹក្សាសន្តិសុខ និងរដ្ឋបាលលោកអូបាម៉ា ដែលជាលើកទី ១ បានបោះឆ្នោត ចេញសម្រេច ទាមទារឲ្យអ៊ីស្រាអែលបញ្ឈប់ជាបន្ទាន់ រាល់ការសាងសង់ សំណង់អាណានិគមកិច្ចនៅ Jérusalemខាងកើត ដែលប៉ាឡេស្ទីន សង្ឃឹមយកធ្វើជាអនាគតរដ្ឋធានី របស់ខ្លួន។ លោកនាយករដ្ឋមន្រ្តីអ៊ីស្រាអែល កាលណោះ បានទូរស័ព្ទថ្លែងអំណរគុណ ដល់លោកដូណាល់ ត្រាំ ដែលបានឈឺឆ្អាល ជួយអ៊ីស្រាអែល។
អ្នកនាំពាក្យរបស់រដ្ឋអំណាចប៉ាឡេស្ទីនឯណោះវិញ នៅថ្ងៃអាទិត្យបានប្រតិកម្ម ថ្កោលទោសការសម្រេចរបស់សាលាក្រុងអ៊ីស្រាអែល ដែលគេចាត់ទុកថា កំពុងទៅបំផ្លាញការខិតខំប្រឹងប្រែង ដើម្បីចរចាបង្កើតរដ្ឋពីរ ប៉ាឡេស្ទីន និងអ៊ីស្រាអែល។ ប៉ាឡេស្ទីនបានអំពាវនាវឲ្យសហគមន៍អន្តរជាតិ និងក្រុមប្រឹក្សាសន្តិសុខចាត់វិធានការជាបន្ទាន់ទៅលើអ៊ីស្រាអែល ដែលតាមប៉ាឡេស្ទីន កំពុងផ្គើន រំលោភសេចក្តីសម្រេចរបស់ក្រុមប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ