អាមេរិកប្រឆាំងមិនឲ្យជនជាតិប៉ាឡេស្ទីន ធ្វើជាប្រេសិតរបស់អង្គការសហប្រជាជាតិ
នាយករដ្ឋមន្រ្តីអ៊ីស្រាអែល បិនចាមីន នេតានីញ៉ាហ៊ូ នៅថ្ងៃអាទិត្យម្សិលមិញបានស្វាគមន៍ការសម្រេចចិត្តរបស់អាមេរិក ដែលបានចេញមុខប្រឆាំងមិនឲ្យអង្គការសហប្រជាជាតិជ្រើសរើសជនជាតិប៉ាឡេស្ទីន ធ្វើជាអ្នកតំណាងរបស់ខ្លួន។ សម្រាប់អាមេរិក ការជ្រើសរើសជនជាតិប៉ាឡេស្ទីនសម្រាប់តំណែងនៅអង្គការសហប្រជាជាតិ ជារឿងអយុត្តិធម៌សម្រាប់អ៊ីស្រាអែល ដែលជាសម្ព័ន្ធមិត្តរបស់អាមេរិក។
ចុះផ្សាយនៅថ្ងៃ៖
ប្រមុខរដ្ឋាភិបាលអ៊ីស្រាអែលអបអរដែលឃើញឯកអគ្គរដ្ឋទូតអាមេរិក នៅអង្គការសហប្រជាជាតិចេញមុខ ជំទាស់មិនឲ្យគេតែងតាំងលោកSalam Fayyad អតីតនាយករដ្ឋមន្រ្តីប៉ាឡេស្ទីន ជាប្រេសិតរបស់អង្គការសហប្រជាជាតិសម្រាប់វិបត្តិនៅលីប៊ី។ នៅក្នុងសេចក្តីប្រកាសព័ត៌មាន នៅថ្ងៃអាទិត្យ នាយករដ្ឋមន្រ្តីអ៊ីស្រាអែលបានឆ្លៀត ឱកាសនេះ ទាមទារឲ្យមានការតែងតាំងជនជាតិអ៊ីស្រាអែល សម្រាប់តំណែង ក្នុងស្ថាប័នអង្គការសហប្រជាជាតិ។
“វាដល់ពេលហើយដែលគេត្រូវគិតគូរ ផ្តល់តួនាទី ឬតែងតាំងជនជាតិអ៊ីស្រាអែល នៅក្នុងស្ថាប័នអង្គការសហប្រជាជាតិ។ វាមិនអាចទទួលយកបានទេ ដែលគេគិតតែធ្វើអំណោយមិនឈប់ដល់ជនជាតិប៉ាឡេស្ទីននោះ។” នាយករដ្ឋមន្រ្តីអ៊ីស្រាអែល បាននិយាយយ៉ាងដូច្នេះ ដោយចង់សំដៅផងដែរ ព័ត៌មានរបស់កាសែតអ៊ីស្រាអែលដែលថា អ៊ីស្រាអែលនឹងអាចសុខចិត្ត ឲ្យអតីតនាយករដ្ឋមន្រ្តីប៉ាឡេស្ទីនធ្វើជាប្រេសិត បើសិនរដ្ឋមន្រ្តីការបរទេសអ៊ីស្រាអែលត្រូវជ្រើសតាំងជាអគ្គលេខាធិការរងរបស់អង្គការសហប្រជាជាតិ បន្ទាប់ពីលោក អង់តូនីញ៉ូ ហ្គុយទែរក៍។
ឯកអគ្គរដ្ឋទូតអាមេរិក ប្រចាំនៅអង្គការសហប្រជាជាតិ លោកស្រី Nikki Haley កាលពីថ្ងៃសុក្រ បានចេញសេចក្តីប្រកាសព័ត៌មានមួយ ដែលនៅក្នុងនោះ លោកស្រីបាននិយាយថា អាមេរិកខកចិត្ត បន្ទាប់ពីដឹងដំណឹងថា គេចង់តែងតាំង អតីតនាយករដ្ឋមន្រ្តីប៉ាឡេស្ទីន លោក Salam Fayyadឲ្យធ្វើជាប្រេសិត របស់អង្គការសហប្រជាជាតិសម្រាប់វិបត្តិលីប៊ី។ តាមអ្នកតំណាងអាមេរិក នៅអង្គការសហប្រជាជាតិ អាមេរិក បច្ចុប្បន្ននេះ មិនទទួលស្គាល់ ថា មានរដ្ឋប៉ាឡេស្ទីន ហើយក៏មិនទទួលយក សញ្ញាដែលចង់ឲ្យមានប៉ាឡេស្ទីន នៅក្នុងតំណែងជាន់ខ្ពស់របស់អង្គការសហប្រជាជាតិ។ លោកស្រី ឯកអគ្គរដ្ឋទូតអាមេរិកយល់ថា អង្គការសហប្រជាជាតិ តាំងពីយូរណាស់មកហើយ បានលំអៀង ផ្តល់ប្រយោជន៍ច្រើនដល់អាជ្ញាធរប៉ាឡេស្ទីន ដែលការណ៍នេះបានធ្វើឲ្យប៉ះពាល់ដល់អ៊ីស្រាអែល សម្ព័ន្ធមិត្តរបស់អាមេរិក។
ការចេញមុខជំទាស់របស់អាមេរិក មិនឲ្យគេតែងតាំងជនជាតិប៉ាឡេស្ទីន នៅក្នុងស្ថាប័នអន្តរជាតិកំពូល ដូចជាអង្គការសហប្រជាជាតិ បានបង្កឲ្យមានប្រតិកម្មរិះគន់ ជាពិសេសពីអាជ្ញាធរប៉ាឡេស្ទីន ដែលចោទប្រកាន់អាមេរិកថា បានរើសអើង ពូជសាសន៍។ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរក៍ បានចេញមុខប្រតិកម្ម ការពារបេក្ខភាពរបស់ប៉ាឡេស្ទីន សម្រាប់តំណែងប្រេសិត។ តាមលោក Stéphane Dujarric អ្នកនាំពាក្យរបស់អគ្គលេខាធិការ អង្គការសហប្រជាជាតិ លោកអតីតនាយករដ្ឋមន្រ្តីប៉ាឡេស្ទីន ត្រូវបានជ្រើសរើសដោយផ្អែកលើសមត្ថភាព និងគុណសម្បត្តិបុគ្គលផ្ទាល់ខ្លួន ដែលគេត្រូវការសម្រាប់តំណែងប្រេសិត។ លោកអ្នកនាំពាក្យបានបន្ថែមទៀតថា បុគ្គលិករបស់អង្គការសហប្រជាជាតិ ធ្វើការដើម្បីស្ថាប័នអង្គការសហប្រជាជាតិ គឺមិនមែនតំណាង រដ្ឋាភិបាល ឬប្រទេសណាមួយនោះទេ។
ក្នុងវ័យ ៦៤ឆ្នាំ លោកSalam Fayyad ដែលធ្លាប់ជានាយករដ្ឋមន្រ្តីប៉ាឡេស្ទីនពីឆ្នាំ ២០០៧ ដល់ឆ្នាំ ២០១៣ ត្រូវបានអគ្គលេខាធិការអង្គការសហប្រជាជាតិជ្រើសរើសសម្រាប់បេក្ខភាពប្រេសិតរបស់អង្គការសហប្រជាជាតិ ជំនួសជនជាតិអាល្លឺម៉ង់ លោក Martin Kobler សម្រាប់ដោះស្រាយវិបត្តិលីប៊ី។ ប៉ុន្តែ អាមេរិក ដែលជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ អាចនឹងប្រើសិទ្ធិវេតូ ប្រឆាំងមិនឲ្យមានជនជាតិប៉ាឡេស្ទីនសម្រាប់តំណែងប្រេសិតអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ