អ៊ីរ៉ាក់កំពុងឈានទៅដណ្តើមបានទីស្នាក់ការអង្គការរដ្ឋអ៊ីស្លាមនៅមូស៊ូលខាងលិច
បន្ទាប់ពីបានបង្អង់សកម្មភាពបន្តិច ដោយមូលហេតុអាកាសធាតុ កងកម្លាំងយោធាអ៊ីរ៉ាក់ ដោយមានជំនួយពីសម្ព័ន្ធអន្តរជាតិដឹកនាំដោយអាមេរិក បានបន្តយុទ្ធនាការសំរុករំដោះក្រុងមូស៊ូលខាងលិច។ ទីស្នាក់ការអភិបាលរបស់ពួកអង្គការរដ្ឋអ៊ីស្លាម ត្រូវដណ្តើមយកបានទាំងស្រុងយ៉ាងយូរនៅថ្ងៃចន្ទ។ នេះបើតាមការអះអាងរបស់នាយទាហានជាន់ខ្ពស់អ៊ីរ៉ាក់។ តែសន្ធឹកនៃការប្រយុទ្ធនៅ បានបង្កឱ្យមានជនស៊ីវិលជាច្រើនពាន់នាក់នាំគ្នារត់ភៀសខ្លួន ដែលការនេះ បានធ្វើឱ្យស្ថានភាពមនុស្សធម៌កាន់ធ្លាក់ដុនដាបខ្លាំង។
ចុះផ្សាយនៅថ្ងៃ៖
ស្តាប់ - ០១:៤៩
កងកម្លាំងប្រតិកម្មរហ័សរបស់ក្រសួងមហាផ្ទៃ បានសម្រុកចូលក្រុងមូស៊ូលខាងលិច ចូលទៅកាន់តែកៀកសង្កាត់ដែលមាន ទីស្នាក់ការ ជាការិយាល័យរបស់ក្រុមប្រឹក្សា និងអភិបាលខេត្ត។ បើតាមអ្នកទទួលខុសត្រូវយោធា ទីស្នាក់ការនេះ នឹងត្រូវដណ្តើមបានទាំងស្រុងពីកណ្តាប់ដៃពួកអង្គការរដ្ឋអ៊ីស្លាមនៅថ្ងៃចន្ទ និងកំពុងបន្តវាយយ៉ាងសន្ធាប់សង្កាត់បួនទៀតរបស់ក្រុងមូស៊ូលខាងលិច។
ប៉ុន្តែសន្ធឹកនៃការប្រយុទ្ធ បាននិងកំពុងរុញច្រាន ជនស៊ីវិលនៅមូស៊ូលខាងលិច ឱ្យនាំគ្នាសម្រុករត់ទៅចេញ កាន់តែច្រើនឡើងៗ។ បើគិតត្រឹមថ្ងៃអាទិត្យ ពោលគឺក្នុងរយៈពេល១៥ថ្ងៃ ចំនួនជនភៀសខ្លួន បានឡើងដល់ ជាង២០០០០០នាក់ ក្នុងនោះមានតែប៉ុន្មានពាន់នាក់ប៉ុណ្ណោះដែលអាចរកជម្រកនៅក្រុងមូស៊ូលខាងកើត។ នេះបើតាមអង្គការជនភៀសខ្លួនអន្តរជាតិ។
មួយភាគធំនៃជនស៊ីវិលទាំងនោះ បាននាំគ្នាទៅ ជ្រកកោននៅក្នុងជំរំមនុស្សធម៌បណ្តោះអាសន្ន នៅតំបន់វាលរហោឋានរបស់ក្រុង ដែលបានបង្កើតឡើងកាលពីថ្ងៃទី ១៩កុម្ភៈ ថ្ងៃបើកប្រតិបត្តិការអាជ្ញាធរអ៊ីរ៉ាក់ ដែលបានជំនួយពីសម្ព័ន្ធអន្តរជាតិ ដឹកនាំដោយសហរដ្ឋអាមេរិក។ ជំរំអង្គការសហប្រជាជាតិដែលក្រុងបាតដាតយល់ថាមិនគ្រប់គ្រាន់ សម្រាប់ទទួលជនស៊ីវិលអ៊ីរ៉ាក់ឱ្យបានសក្តិសមនឹងកញ្ចប់ថវិកាមនុស្សធម៌ដ៏ធំសោះ។
សូមបញ្ជាក់ថា អ៊ីរ៉ាក់បានបើកយុទ្ធនាការវាយយកក្រុងមូស៊ូលខាងកើតបាន កាលពីខែមករា បន្ទាប់ពីចំណាយពេលអស់១០០ថ្ងៃ។ បានជោគជ័យនៅខាងកើត អាជ្ញាធរអ៊ីរ៉ាក់បានបន្តយុទ្ធនាការសម្រុកដណ្តើមយកក្រុងមូស៊ូលខាងលិចទៀត ដែលមានសុទ្ធជាទីតាំងសំខាន់ៗរបស់មេកើយជីហាត។ ទេប្រជាពលរដ្ឋត្រូវរត់ចេញពីផ្ទះសម្បែង ដោយប្រថុយប្រថានខ្លាំង ព្រោះត្រូវប្រឈមនឹងការបាញ់ឆ្មក់ប្រហារផងនិងជាន់គ្រាប់មីនបង្កប់ពីសំណាក់ពួកជីហាតរដ្ឋអ៊ីស្លាមផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ