រុស្ស៊ី និងអ៊ីរ៉ង់ប្តេជ្ញាគាំទ្ររបបស៊ីរី របស់លោកបាស្ហា អាល់អាសាដ
ប្រមុខកងទ័ពរុស្ស៊ី និងអ៊ីរ៉ង់ នៅថ្ងៃសៅរ៍ទី ៨ មេសា បានប្រកាសរួមគ្នា បន្តប្រតិបត្តិការយោធា នៅក្នុងទឹកដី ស៊ីរីដើម្បីគាំទ្រ របបបាស្ហា អាល់អាសាដ ក្នុងការប្រយុទ្ធប្រឆាំងនឹងក្រុមភេរវជន។ រុស្ស៊ី និងអ៊ីរ៉ង់ ចេញមុខការពារសម្ព័ន្ធមិត្តស៊ីរី នៅពីថ្ងៃក្រោយអាមេរិកបាញ់ ជាលើកទី ១ គ្រាប់មីស៊ីលសំដៅមូលដ្ឋានទ័ពអាកាសរបស់រដ្ឋាភិបាលស៊ីរី។
ចុះផ្សាយនៅថ្ងៃ៖
រុស្ស៊ី និងអ៊ីរ៉ង់ នឹងបន្តសហប្រតិបត្តិការផ្នែកយោធា ដើម្បី គាំទ្រលោកប្រធានាធិបតីស៊ីរី រហូតដល់ក្រុមភេរវជន ហើយនិងបក្សពួក អ្នកគាំទ្រក្រុមភេរវនិយមទទួលបរាជ័យទាំងស្រុងនៅស៊ីរី។ នេះជាការប្តេជ្ញាចិត្តរបស់ប្រមុខកងទ័ពរុស្ស៊ី និងអ៊ីរ៉ង់ ដែលគេឃើញនៅក្នុងសេចក្តីប្រកាសរួម ដែលដកស្រង់ដោយទីភ្នាក់ងារព័ត៌មានផ្លូវការអ៊ីរ៉ង់ Irna។
កន្លងមក សម្ព័ន្ធមិត្តរបស់រដ្ឋាភិបាលស៊ីរី បានចាត់ទុក រាល់ក្រុមប្រដាប់អាវុធ មិនថា ក្រុមអ្នកប្រឆាំង ឬក្រុមជីហាតអង្គការរដ្ឋអ៊ីស្លាម ដែលកំពុងប្រយុទ្ធតទល់នឹងលោកបាស្ហា អាល់អាសាដនៅស៊ីរីថា ជាក្រុមភេរវជន។
រុស្ស៊ី និងអ៊ីរ៉ង់ ដែលបានបញ្ជូនទ័ពទៅជួយប្រយុទ្ធកងទ័ពរដ្ឋាភិបាលស៊ីរី ខឹងដាច់ក្បាល ដាច់កន្ទុយ ដោយសារតែអាមេរិកបានវាយប្រហារជាលើកទី ១ ទៅលើមូលដ្ឋានទ័ពអាកាសរបស់រដ្ឋាភិបាលស៊ីរី នៅថ្ងៃព្រហស្បតិ៍។ នៅក្នុងសេចក្តីប្រកាសរួម ប្រមុខកងទ័ពរុស្ស៊ី និងអ៊ីរ៉ង់នៅបានចោទប្រកាន់អាមេរិកថា មានចេតនាបន្ទុច បង្អាក់ជ័យជំនះរបស់កងទ័ព រដ្ឋាភិបាល ហើយនិងសម្ព័ន្ធមិត្តរបស់ស៊ីរី។ សម្រាប់រុស្ស៊ី និងអ៊ីរ៉ង់ ដោយវាយប្រហារទៅលើទីតាំងទ័ពរដ្ឋាភិបាលស៊ីរី អាមេរិកកំពុងតែពង្រឹងកម្លាំងរបស់ក្រុមភេរវជន។
នៅក្នុងកិច្ចសន្ទនាតាមទូរស័ព្ទ ដែលធ្វើជាលើកទី១ នៅក្រោយអាមេរិកបាញ់គ្រាប់មីស៊ីលសំដៅទឹកដីស៊ីរី រដ្ឋមន្រ្តីការបរទេសរុស្ស៊ីបាននិយាយប្រាប់សមភាគីអាមេរិកថា ការវាយប្រហាររបស់អាមេរិក គឺជាការចង់បានរបស់ក្រុមភេរវជន។
ការវាយបំផ្លាញក្រុមភេរវនិយម ក្រុមជីហាតអង្គការរដ្ឋអ៊ីស្លាមឲ្យបរាជ័យ គឺជាអាទិភាពចំបងរបស់អាមេរិក។ នេះបើតាមការអះអាងរបស់ប្រមុខការបរទេសអាមេរិក នៅក្នុងបទសម្ភាសន៍ មួយ ដែលត្រូវចាក់ផ្សាយនៅថ្ងៃអាទិត្យនេះ នៅទូរទស្សន៍អាមេរិកាំង CBS។ សម្រាប់លោករេច ធីល័រសុន ការវាយកម្ទេច បំផ្លាញចោល កាលីហ្វា ដែលជារដ្ឋរបស់ក្រុមជីហាតអង្គការរដ្ឋអ៊ីស្លាម មិនត្រឹមតែលុបបំបាត់ចោល ការគំរាមកំហែងសន្តិសុខរបស់អាមេរិកតែប៉ុណ្ណោះទេ ប៉ុន្តែ នឹងជួយស្តារ រក្សាស្ថិរភាពទូទៅនៅក្នុងតំបន់ដើមបូព៌ា។
ប្រមុខការបរទេសអាមេរិក គ្រោងនឹងទៅធ្វើទស្សនកិច្ច ជាលើកទី ១នៅទីក្រុងម៉ូស្គូ នៅថ្ងៃអង្គារសប្តាហ៍ក្រោយ។ ស៊ីរី ជាសំណុំរឿងសំខាន់ ដែលភាគីរុស្ស៊ី និងអាមេរិកលើកយកមកពិភាក្សាគ្នា។ សម្រាប់រដ្ឋមន្រ្តីការបរទេសអាមេរិក នៅក្រោយក្រុមជីហាតអង្គការរដ្ឋអ៊ីស្លាមត្រូវគេបង្រ្កាបឲ្យសាបរលាបនៅស៊ីរី គេនឹងអាចបើកការចរចា សន្តិភាពនៅស៊ីរី ដែលមាន គ្រប់ភាគី ចូលរួម រួម ទាំងតួអង្គសំខាន់ គឺលោកប្រធានាធិបតី បាស្ហា អាល់អាសាដផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ