យុទ្ធសាស្ត្រក្រុមហាម៉ាសដើម្បីទាក់ចំណាប់អារម្មណ៍អន្តរជាតិ
ចុះផ្សាយនៅថ្ងៃ៖
ស្តាប់ - ០៣:៤៥
តាំងដើមខែឧសភានេះមក ក្រុមហាម៉ាសប៉ាឡេស្ទីនដែលអឺរ៉ុបនិងអាមេរិកចាត់ទុកជាក្រុម ភេរវជន បានប្រឹងទាក់ចំណាប់អារម្មណ៍អន្តរជាតិ ដោយបានប្រកាសកែប្រែកម្មវិធីនយោបាយថ្មី ហើយថែមទាំងបានជ្រើសយកអតីតនាយករដ្ឋមន្ត្រីប៉ាឡេស្ទីន Ismaïl Haniyeh អ៊ីស្មាអែល ហានីយេ អោយធ្វើជាមេដឺកនាំថ្មីទៀតផង។ ក្រុមហាម៉ាសកំពុងចង់ដើរតួនាទីជាអ្នកចរចាតំណាងប៉ាឡេស្ទីន ក្នុងឆាកអន្តរជាតិ ឆ្លាស់គ្នាជាមួយប្រធានរដ្ឋអំណាចម៉ាមូដ អាបាស។
ដើមខែឧសភានេះ ក្រុមហាម៉ាសប៉ាឡេស្ទីនដែលអាមេរិក និងអឺរ៉ុបចាត់ទុកជាក្រុមភេរវជន បានធ្វើអោយអន្តរជាតិ ពិសេសបណ្តាប្រទេសនៅតំបន់បូព៌ាចាប់អារម្មណ៍។ ក្រុមហាម៉ាសបានប្រកាសកែប្រែកម្មវិធីនយោបាយថ្មី ដោយព្រមទទួលស្គាល់រដ្ឋប៉ាឡេស្ទីនក្នុងដែនកំណត់ព្រំដែនឆ្នាំ១៩៦៧។ ជាព្រំដេនដែលគូសឡើងមុនអ៊ីស្រាអែលចូលកាន់កាប់ហ្ស៊កដានី ហ្កាហ្សា និងហ្សេរុយហ្សាឡិមខាងកើត។
ទោះក្រុមហាម៉ាសប្រកាន់ជំហរមិនទទួលស្គាល់អ៊ីស្រាអែល គេមើលឃើញថា ការកែប្រែកម្មវិធីថ្មីនេះ ជាការបន្ទន់ជំហររកអ៊ីស្រាអែល ព្រោះខ្លឹមសារទទួលស្គាល់រដ្ឋប៉ាឡេស្ទីន ក្នុងព្រំដែនឆ្នាំ១៩៦៧ ស្របតាមខ្លឹមសារនយោបាយដែលរដ្ឋអំណាចប៉ាឡេស្ទីនដាក់លើតុចរចាជាមួយអ៊ីស្រាអែល។ ក្រុមហាម៉ាសថែមទាំងថា ហាម៉ាសប្រយុទ្ធជាមួយអ៊ីស្រាអែល មិនមែនដោយសារស្អប់ជនជាតិជ្វីហ្វអ៊ីស្រាអែលទេ តែស្អប់នយោបាយឈ្លានពានរបស់អ៊ីស្រាអែលទៅលើប៉ាឡេស្ទីន។ ហាម៉ាសមិនរើសអើងជាមួយសាសនាជ្វីហ្វនៅអ៊ីស្រាអែលទេ។
ចំពេលប៉ាឡេស្ទីនកំពុងស្វែងរកការគាំទ្រពីប្រធានាធិបតីអាមេរិក ដូណាល់ ត្រាំ សម្រាប់កិច្ចចរចាសន្តិភាពជាមួយអ៊ីស្រាអែល ក្រុមហាម៉ាសប្រហែលចង់ផ្សះផ្សាជាមួយក្រុមហ្វាតា របស់ប្រធានរដ្ឋអំណាចប៉ាឡេស្ទីនតែម្តង ដើម្បីអាចឈានទៅរកតួនាទីជាអ្នកចរចាតំណាងប៉ាឡេស្ទីន ក្នុងឆាកអន្តរជាតិ ឆ្លាស់គ្នាជាមួយប្រធានរដ្ឋអំណាចប៉ាឡេស្ទីន ម៉ាមូដ អាបាស។ ដើម្បីពង្រឹងមុខមាត់អោយសក្តិសមជាអ្នកចរចាអន្តរជាតិតំណាងប៉ាឡេស្ទីន ក្រុមប្រឹក្សាស្ហួរ៉ាក៏បានបោះឆ្នោតអោយលោកអ៊ីស្មាអែល ហានីយេ អាយុ៥៤ឆ្នាំ ដែលជាអតីតនាយករដ្ឋមន្ត្រីប៉ាឡេស្ទីន អោយលោកហានីយេ ធ្វើជាប្រធានការិយាល័យនយោបាយថ្មី បន្តតំណែងដឺកនាំពីលោកខាលេដ មេស្ហាអាល់ ជាមេដឺកនាំដែលកំពុងភៀសខ្លួននៅកាតា។
បុគ្គលិកលក្ខណៈរបស់លោកហានីយេ ជាមេដឺកនាំថ្មី របស់ក្រុមហាម៉ាស សបង្ហាញថា ហាម៉ាសបើកចំហរទៅរកឆាកអន្តរជាតិទូលំទូលាយជាងមុន។ លោកហានីយេ ធ្លាប់កាន់តំណែងជានាយករដ្ឋមន្ត្រីក្នុងរដ្ឋាភិបាលចម្រុះប៉ាឡេស្ទីន ក្រោយក្រុមហាម៉ាសជាប់ឆ្នោតសភា ឆ្នាំ២០០៦។ លោកហានីយេ មានជំហរនយោយបាយមិនជ្រុលនិយម។ លោកជាតួអង្គចរចាដ៏ល្អ លោកធ្លាប់អំពាវនាវអង់គ្លេសនិងអាមេរិកអោយប្រាប់អោយបញ្ឈប់ហិង្សារបស់អ៊ីស្រាអែលទៅលើប៉ាឡេស្ទីនទៀតផង។
បើហាម៉ាសកាន់តែបើកចំហរ ហើយសហគមន៍អន្តរជាតិអាចប្តូរការយល់ឃើញចំពោះហាម៉ាសវិញបាន នោះលោកហានីយេ អាចជាគូប្រជែងសំខាន់ជាមួយប្រធានរដ្ឋអំណាចប៉ាឡេស្ទីនម៉ាមូដ អាបាស ក្នុងការជួយហាម៉ាសអោយក្លាយជាតួអង្គចរចាតំណាងប៉ាឡេស្ទីន ក្នុងឆាកអន្តរជាតិបាន។ ប្រជាប្រិយភាពរបស់លោកម៉ាមូដ អាបាស ជាមេដឺកនាំប៉ាឡេស្ទីនវិញ កំពុងធ្លាក់ចុះ។ ប្រជាជនប៉ាឡេស្ទីនតវ៉ាប្រឆាំងអំពើពុករលួយរបស់ស្ថាប័នគ្រប់គ្រងប៉ាឡេស្ទីន នេះជាឧកាសជួយអោយក្រុមហាម៉ាសអាចមានមុខមាត់ល្អឡើងវិញ ប្រៀបនឹងក្រុមហា្វតារបស់ប្រធានរដ្ឋអំណាចប៉ាឡេស្ទីន។
នៅចំពោះមុខពេលនេះ ក្រុមហាម៉ាសកំពុងព្យាយាមខិតទំនាក់ទំនងទៅរកសហគមន៍អន្តរជាតិ ពិសេសប្រទេសក្នុងតំបន់តែម្តង។ ហាម៉ាសប្រកាសកែប្រែកម្មវិធីនយោបាយថ្មី ដាក់លោកហានីយេ ជាអតីតនាយករដ្ឋមន្ត្រីប៉ាឡេស្ទីន អោយដឺកនាំក្រុម ក៏ដើម្បីអោយអាមេរិក និងអឺរ៉ុបប្តូរជំហរឡើងវិញ ឈប់ចាត់ទុកថា ហាម៉ាសជាក្រុមភេរវជនទៀតដែរ។ ក្រុមហាម៉ាសមិនបានលាក់បាំងបំណងខ្លួនទេ ក្រុមហាម៉ាសធ្លាប់ប្រាប់ចំៗថា សង្ឃឹមថា អឺរ៉ុបអាចប្តូរជំហរចំពោះហាម៉ាសបាន។
ក្នុងកិច្ចការខិតទៅរកសហគមន៍អន្តរជាតិនេះ ក្រុមហាម៉ាសត្រូវខិតទៅរកប្រទេសក្នុងតំបន់ ពិសេសអេហ្ស៊ីប ព្រោះអេហ្ស៊ីបធ្លាប់ជួយប៉ាឡេស្ទីនច្រើនណាស់។ ទន្ទឹមនេះដែរ លោកហានីយេ ជាអ្នកដឺកនាំថ្មីរបស់ហាម៉ាសក៏ត្រូវបង្រួបបង្រួមសកម្មជនក្នុងក្រុមដែរ។ សកម្មជនក្រុមហាម៉ាសខ្លះដែលជាអ្នកអភិរក្សនិយមមិនបានពេញចិត្តនឹងការកែប្រែកម្មវិធីនយោបាយថ្មីរបស់ក្រុមទេ ព្រោះតែពួកគេយល់ថា ជាការបន្ទន់ជំហរទៅរកអ៊ីស្រាអែលនោះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ