ប្រទេសអារ៉ាប់ទាំង៤ ទាមទារឲ្យកាតាបិទមូលដ្ឋានទ័ពតួកគី និងបណ្តេញឆ្មាំបដិវត្តអ៊ីរ៉ង់
ប្រទេសអារ៉ាប់ចំនួន ៤ អេហ្ស៊ីប អារ៉ាប៊ី សាអូឌីត អេមីរ៉ា អារ៉ាប់រួម និងបារ៉ែន នៅថ្ងៃសុក្រទី ២៣មិថុនា បានធ្វើបញ្ជីរាយឈ្មោះលក្ខខណ្ឌ ដែលប្រទេសកាតា ត្រូវគោរពអនុវត្តតាម បើសិនជាកាតា លែងចង់ឲ្យគេដាក់នៅឯកោតទៅទៀត។ នៅថ្ងៃទី ៥មិថុនា អារ៉ាប៊ីសាអូឌីត អេមីរ៉ា អារ៉ាប់រួម អេហ្ស៊ីប និងបារ៉ែនជាដើមបានកាត់ផ្តាច់ទំនាក់ទំនងការទូត បិទផ្លូវអាកាស ទឹកនិងដីគោកជាមួយកាតា ដែលគេចោទថា បានគាំទ្រក្រុមភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងបញ្ជីដែលក្រុមប្រទេសអារ៉ាប់ទាំង៤ បានផ្ញើ នៅថ្ងៃសុក្រ ទៅកាន់ទីក្រុងដូហា និងដែលទីភ្នាក់ងារព័ត៌មានអាមេរិក AP បានទទួលមួយច្បាប់ដែរ ក្រុមប្រទេសអារ៉ាប់ នាំមុខដោយអារ៉ាប៊ី សាអូឌីត ដែលបានចេញមុខឈ្លោះជាមួយកាតា បានទាមទារឲ្យកាតាគោរពធ្វើតាម១៣ចំណុច បើសិនជាកាតាចង់រួចផុតពីការដាក់ទណ្ឌកម្មរបស់ក្រុមប្រទេសអារ៉ាប់។
ទី១ កាតាត្រូវបិទចោលទូរទស្សន៍អាល់ ហ្សារីរ៉ា ដែលឧបត្ថម្ភដោយកាតា។ បុស្តអាល់ហ្សារីរ៉ា ដែលផ្សាយជាភាសាអង់គ្លេស និងអារ៉ាប់ ជាបុស្តិ៍ដែលពេញនិយម និងគេមើលច្រើននៅតំបន់អារ៉ាប់ ប៉ុន្តែ អារ៉ាប៊ី សាអូឌីត និងសម្ព័ន្ធមិត្តទាំង៣ ចោទថា បាន ផ្សព្វផ្សាយព័ត៌មានឃោសនាលើកទឹកចិត្តឲ្យមានចលនាប្រឆាំងនៅអារ៉ាប៊ី សាអូឌីត អេហ្ស៊ីប ឬបារ៉ែនជាដើម។
ទី២ ទៀត កាតាត្រូវកាត់បន្ថយទំនាក់ទំនងជាមួយប្រទេសអ៊ីរ៉ង់ ហើយនិងបិទមូលដ្ឋានទ័ពរបស់តួកគី នៅដូហា ឲ្យបានក្នុងរយៈពេល ១០ថ្ងៃ។ នៅក្នុងឯកសារដែលទីភ្នាក់ងារព័ត៌មានAP បានទទួល គេឃើញថា ក្រុមប្រទេសអារ៉ាប់ នៅបានទាមទារឲ្យកាតាបិទស្ថានទូតរបស់អ៊ីរ៉ង់ នៅទីក្រុងដូហា និងត្រូវបណ្តេញឆ្មាំបដិវត្តអ៊ីរ៉ង់ ចេញពីទឹកដីកាតា។
នៅក្នុងចំណុចទាមទារផ្សេងទៀត គឺ គេបានកំណត់ ឲ្យកាតាត្រូវតែឈប់ទាក់ទង ជាមួយក្រុមភារតអ៊ីស្លាម ដែលជាក្រុមប្រឆាំងនឹងរដ្ឋាភិបាលអេហ្ស៊ីប។ កាតាត្រូវឈប់លូកដៃក្នុងកិច្ចការផ្ទៃក្នុងរបស់ប្រទេសអារ៉ាប់ដទៃទៀត។ មានន័យថា កាតាត្រូវឈប់ ផ្តល់សញ្ជាតិ ឈប់ផ្តល់កន្លែងជ្រកកោន និងធ្វើបត្យាប័នរាល់ជនជាតិ អេហ្ស៊ីប អារ៉ាប៊ី សាអូឌីត ឬបារ៉ែន ដែលរស់នៅក្នុងទឹកដីកាតា ប៉ុន្តែ ដែលត្រូវរដ្ឋាភិបាលរបស់ក្រុមប្រទេសអារ៉ាប់ ចាត់ទុកជាឧក្រិដ្ឋជន ឬភេរវជន។
អារ៉ាប៊ី សាអូឌីត និងសម្ព័ន្ធមិត្តបានទាមទារឲ្យទីក្រុងដូហាបង្ហាញផងដែរ ឈ្មោះក្រុមអ្នកប្រឆាំង នៅអារ៉ាប៊ី សាអូឌីត នៅអេហ្ស៊ីប ឬនៅបារ៉ែន ដែលប្រទេសកាតាកំពុងផ្តល់ជំនួយគាំទ្រផ្នែកហិរញ្ញវត្ថុ។ ក្រុមប្រទេសអារ៉ាប់ បានកម្រិតទាមទារផងដែរ ឲ្យកាតាឈប់ផ្តល់ជំនួយ គាំទ្រដល់ក្រុមអ៊ីស្លាមជ្រុលនិយម ដែលអាមេរិកបានចាត់ទុកជាក្រុមភេរវនិយម ដែលនៅក្នុងនោះ មានតាំងពីក្រុមហាម៉ាស ប៉ាឡេស្ទីន ក្រុមអេស្បូឡា នៅលីបង់ ក្រុមជីហាតអង្គការរដ្ឋអ៊ីស្លាម និងក្រុមអាល់កៃដាជាដើម។
លក្ខខណ្ឌដែលកាតាមិនអាចគោរពធ្វើទៅបាន
លក្ខខណ្ឌដែលអារ៉ាប៊ី សាអូឌីត និងប្រទេសអារ៉ាប់ បីផ្សេងទៀត ដាក់ទៅលើកាតា មិនមែនធ្វើឡើងដើម្បីទៅបន្ធូរបន្ថយភាពតានតឹង និងដោះស្រាយបញ្ហា ដូចដែលរដ្ឋមន្រ្តីការបរទេសអាមេរិកសង្ឃឹមចង់បាននោះទេ។ ត្រូវដឹងថា ដោយបញ្ជូនបញ្ជី លក្ខខណ្ឌទៅឲ្យកាតានៅថ្ងៃនេះ ក្រុមប្រទេសអារ៉ាប់ ទាំង៤ ចង់ឆ្លើយតបនឹងការទាមទាររបស់រដ្ឋមន្រ្តីការបរទេសអាមេរិក លោករេច ធីល័រសុន ដែលនៅដើមសប្តាហ៍នេះ មិនបានលាក់ទេ ពីមន្ទិលសង្ស័យរបស់លោក ទៅលើដើមហេតុ ដែលធ្វើឲ្យអារ៉ាប៊ី សាអូឌីត និងសម្ព័ន្ធមិត្ត សម្រេចកាត់ផ្តាច់ការទូតយ៉ាងទាន់ហន់ជាមួយកាតានោះ។
បើមើលទៅលើខ្លឹមសារនៃលក្ខខណ្ឌដែលដាក់កម្រិតដោយអារ៉ាប៊ី សាអូឌីត គេឃើញថា កាតាច្បាស់ជាមិនអាចធ្វើបានទៅតាមការទាមទាររបស់ក្រុមប្រទេសអារ៉ាប់។ ឧទាហរណ៍ ទាមទារឲ្យកាតាបិទមូលដ្ឋានទ័ពរបស់តួកគីនៅដូហា ឬក៏ត្រូវបិទស្ថានទូតអ៊ីរ៉ង់នៅដូហា គឺគឺជាការទាមទារដែលកាតាមិនអាចធ្វើទៅបានទាល់តែសោះ។ អ៊ីរ៉ង់ជាប្រទេសដៃគូសេដ្ឋកិច្ច ដែលកំពុងសហការធ្វើជំនួញអាជីវកម្មឧស្ម័នដ៏សំខាន់របស់កាតា។ តួកគីវិញដូចអ៊ីរ៉ង់ដែរ គឺ កំពុងដឹកជញ្ជូន អាហាររាប់ពាន់តោន ទៅផ្គត់ផ្គង់ដល់ប្រជាជនកាតា ដែលខ្វះខាត ដោយសារតែអារ៉ាប៊ី សាអូឌីតបិទព្រំដែន និងឈប់នាំចូលទំនិញទៅកាតា តាំងពីកើតមានជម្លោះនៅដើមខែនេះ។ ម្យ៉ាងទៀត តួកគីក៏ទើបតែបញ្ជូនរថពាសដែក និងកងទ័ពរបស់ខ្លួន នៅថ្ងៃម្សិលមិញ ទៅកាន់មូលដ្ឋានទ័ពរបស់ខ្លួននៅក្នុងទឹកដីកាតា។
មួយវិញទៀត ទាមទារឲ្យកាតាបិទចោលប៉ុស្តទូរទស្សន៍អាល់ហ្សារីរ៉ា និងឈប់ផ្តល់ជំរកដល់ក្រុមហាម៉ាស ឬក្រុមភាតរអ៊ីស្លាមនៅអេហ្ស៊ីប ដែលកាតាចាត់ទុកជាភាគីជួយដោះស្រាយជម្លោះ ប៉ុន្តែ មិនមែនជាក្រុមសត្រូវ ភេរវជននោះ គឺថា កាតាទំនងជាមិនអាចធ្វើបានទៅការទាមទាររបស់អារ៉ាប៊ី សាអូឌីតឡើយ។ កាតាយល់ថា បើធ្វើដូច្នេះ គឺមិនខុសអីនឹងការដែលថា កាតាបណ្តោយខ្លួនឲ្យអារ៉ាប៊ី សាអូឌីត ពង្រីកដែន ឥទ្ធិពលរបស់ខ្លួន ដើម្បីក្តោបក្រសោប គ្រប់គ្រងនយោបាយ យុទ្ធសាស្រ្តការបរទេសរបស់ប្រទេសកាតានោះទេ។ កាតាជាប្រទេសមហាសេដ្ឋីឧស្ម័នសំខាន់មួយដែរនៅក្នុងតំបន់។ ជាមួយនឹងទឹកប្រាក់មហាសាលបានមកពីការលក់នាំចេញឧស្ម័ន កាតានៅប៉ុន្មានឆ្នាំចុងក្រោយនេះ បានចាយលុយ រាប់ពាន់លានដុល្លារ ដើម្បីបញ្ជាក់ សក្តានុពល អំណាចមុខមាត់របស់ខ្លួន នៅក្នុងឆាកអន្តរជាតិ មិនឲ្យចាញ់អារ៉ាប៊ី សាអូឌីតនោះទេ។
កាតា និងក្រុមប្រទេសអារ៉ាប់ ជាភាគីជម្លោះគ្មានចេតនាចង់ត្រលប់មកជានាជាមួយគ្នាវិញ
កាតានៅមិនទាន់បានប្រតិកម្ម ឆ្លើយតបយ៉ាងណាទៅនឹងការដាក់លក្ខខណ្ឌរបស់ក្រុមប្រទេសអារ៉ាប់។ ប៉ុន្តែ រដ្ឋមន្រ្តីការបរទេសកាតា ដែលបានធ្វើនយោបាយការបរទេស បញ្ចុះបញ្ចូលប្រទេសលោកខាងលិច ដែលជាដៃគូសេដ្ឋកិច្ចរបស់កាតា នៅដើមសប្តាហ៍នេះ ធ្លាប់បានបញ្ជាក់ ហើយថា កាតានឹងមិនចរចាអ្វីទាំងអស់ បើសិន ក្រុមប្រទេសអារ៉ាប់ មិនព្រមដកទណ្ឌកម្ម ជាមុនពីកាតានោះទេ។ បើមើលទៅលើជំហររបស់កាតា ហើយនិងខ្លឹមសារនៃបញ្ជីដាក់លក្ខខណ្ឌរបស់ក្រុមប្រទេសអារ៉ាប់ គេឃើញថា ភាគីជម្លោះទាំងពីរកំពុងបែរខ្នងដាក់គ្នា និងគ្មានចេតនាចង់បញ្ចប់ជម្លោះ ក្នុងពេលឆាប់ៗនេះទេ។ ចង់ ឬមិនចង់ ជម្លោះ វិបត្តិរវាងក្រុមប្រទេសមហាសេដ្ឋីប្រេង និងឧស្ម័ននៅពេលនេះ អាចនឹងនាំឲ្យតំបន់ដើមបូព៌ា និងពិភពលោកទាំងមូលធ្លាក់ចូលទៅក្នុងពិភពមួយ ដែលគ្រោះថ្នាក់ ដែលគេមិនទាន់ដឹង រកច្រកចេញរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ