កងទ័ពអ៊ីរ៉ាក់រំដោះជនស៊ីវិលរាប់រយនាក់ នៅមូស៊ូល
នៅក្រុងមូស៊ូល ប្រទេសអ៊ីរ៉ាក់ ថ្ងៃសៅរ៍២៤មិថុនានេះ កងទ័ពអ៊ីរ៉ាក់បានរំដោះជនស៊ីវិលរាប់រយនាក់ ដោយបានបើកច្រករបៀង អោយពួកគេរត់ភៀសខ្លួន។ កងទ័ពកំពុងប្រតិបត្តិការវាយលុកទីតាំងចុងក្រោយរបស់ក្រុមជីហាតរដ្ឋអ៊ីស្លាម ដោយទទួលបានជំនួយពីសម្ព័ន្ធអន្តរជាតិដឺកនាំដោយអាមេរិក។
ចុះផ្សាយនៅថ្ងៃ៖
ស្តាប់ - ០១:២៦
ជនស៊ីវិលរាប់រយនាក់ នៅអ៊ីរ៉ាក់ អាចរត់ភៀសខ្លួនបាន ពីក្រុងចំណាស់មូស៊ូល ថ្ងៃសៅរ៍នេះ ដោយសារតែកងទ័ពអ៊ីរ៉ាក់ បានបើកច្រករបៀងអោយពួកគេរត់គេច។ តែ២០នាទីប៉ុណ្ណោះ មនុស្សជាង១០០នាក់ បានធ្វើដំណើរមកដល់តំបន់គ្រប់គ្រងដោយកងកម្លាំងរដ្ឋាភិបាល នៅភាគខាងលិចមូស៊ូល។
ជនស៊ីវិលបន្តគេចចេញពីមូស៊ូលឥតឈប់ឈរ។ មានទាំងមនុស្សរងរបួស និងកុមារតួចៗដែលកំពុងខ្វះអាហារូបត្ថម្ភ។ នៅមានជនស៊ីវិលជាង១សែននាក់ទៀត ក្នុងនោះមានកុមារច្រើននាក់ ដែលកំពុងស្ថិតក្នុងសំណាញ់ក្រុមជីហាតរដ្ឋអ៊ីស្លាម នៅមូស៊ូលនៅឡើយ។ ក្រុមជីហាតទុកជនស៊ីវិលទាំងនេះ ធ្វើជាខែលការពារ។ ហើយជនស៊ីវិលរាប់រយនាក់ ពិសេសកុមារតូចៗ ត្រូវបានសម្លាប់។
ទាហានអ៊ីរ៉ាក់ ក្រោមជំនួយរបស់សម្ព័ន្ធអន្តរជាតិដឹកនាំដោយអាមេរិកកំពុងវាយសម្រុកទៅមុខ ដើម្បីដណ្តើមយកទីតាំងចុងក្រោយរបស់ក្រុមជីហាតនៅមូស៊ូល។ រដ្ឋាភិបាលអ៊ីរ៉ាក់សង្ឃឹមថា អាចដណ្តើមយកបានក្រុងមូស៊ូល ភាគខាងជើងនេះ មកវិញ ក្នុងឱកាសថ្ងៃបិទបញ្ចប់បុណ្យសាសនាអ៊ីស្លាមរ៉ាម៉ាដង់ នៅដើមសប្តាហ៍ក្រោយនេះ។
ពេលនេះ ក្នុងដៃក្រុមជីហាតរដ្ឋអ៊ីស្លាម មានតែតំបន់ប្រមាណជា២គីឡូម៉ែត្រការ៉េ កាន់កាប់ប៉ុណ្ណោះ។ តំបន់នេះស្ថិតនៅច្រាំងឆ្នេរខាងលិចទន្លេខ្លា។ ទោះយ៉ាងនេះក្តី ក្រុមជីហាតនៅតែមានអានុភាពតាមទីតាំងផ្សេងៗទៀត នៅអ៊ីរ៉ាក់។ ជាក់ស្តែង កាលពីយប់ថ្ងៃសុក្រ ក្រុមភេរវជនបានបង្កភេរវកម្មអត្តឃាតចំនួន៣ ក្នុងសង្កាត់មួយកន្លែង នៅភាគខាងកើតមូស៊ូល។ ភេរវកម្មនេះបានសម្លាប់មនុស្ស៥នាក់ និងបង្ករបួស១៩នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ