វិបត្តិតំបន់ឈូងសមុទ្រពែក្ស៖លក្ខខណ្ឌកំណត់ដោយក្រុមប្រទេសអារ៉ាប់ចំពោះកាតា ផុតឱសានវាទ
ឱសានវាទចំពោះលក្ខខណ្ឌ១៣ចំណុចដែលក្រុមប្រទេសអារ៉ាប់តំរូវអោយកាតាគោរពតាមដាច់ខាតនោះ ត្រូវផុតកំណត់ ថ្ងៃអាទិត្យ២កក្កដានេះ។ លក្ខខណ្ឌតំរូវអោយកាតាបិទមូលដ្ឋានទ័ពតួកគី រឺកាត់បន្ថយទំនាក់ទំនងជាមួយអ៊ីរ៉ង់ជាដើម។ កាតានៅតែបង្ហាញជំហរទាត់ចោលសំណើទាំង១៣ចំណុច។ ថ្ងៃសៅរ៍ម្សិលមិញ ប្រមុខការទូតកាតា លើកឡើងថា បញ្ជីសំណើទាំងនេះត្រូវគេធ្វើឡើងដើម្បីទាត់ចោលទៅវិញ។ រុស្ស៊ីបានស្នើអោយមេដឺកនាំកាតានិងស្តេចបារ៉ែន ចរចាគ្នារកដំណោះស្រាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
អារ៉ាប៊ី សាអូឌីត អេមីរ៉ាតអារ៉ាប់រួម អេហ្ស៊ីប និងបារ៉ែន បានផ្តាច់ទំនាក់ទំនងការទូត បិទផ្លូវអាកាសដែនទឹកនិងដីគោក ជាមួយកាតា កាលពីដើមខែមិថុនា។ ពួកគេចោទថា កាតាគាំទ្រក្រុមភេរវជន និងជិតដិតជាមួយអ៊ីរ៉ង់ដែលជាគូប្រជែងរបស់អារ៉ាប៊ីសាអូឌីត។ ថ្ងៃ២៣មិថុនា ប្រទេសទាំង៤បានដាក់លក្ខខណ្ឌ១៣ចំណុច អោយកាតាគោរពតាម បើកាតាមិនចង់នៅឯកោទៀត។
១៣ចំណុចនោះមានដូចជា កាតាត្រូវបិទទូរទស្សន៍អាល់ ហ្សាហ្ស៊ីរ៉ា ត្រូវកាត់បន្ថយទំនាក់ទំនងជាមួយអ៊ីរ៉ង់ បណ្តេញឆ្មាំបដិវត្តអ៊ីរ៉ង់ចេញពីកាតា បិទមូលដ្ឋានទ័ពតួកគី កាត់ផ្តាច់ទំនាក់ទំនងជាមួយក្រុមភាតរអ៊ីស្លាមអេហ្ស៊ីប រឺក៏ឈប់គាំទ្រក្រុមអ៊ីស្លាមជ្រុលនិយមដែលអាមេរិកចាត់ទុកជាក្រុមភេរវជនជាដើម។ ឱសានវាទ១៣ចំណុចនេះត្រូវផុតកំណត់នៅថ្ងៃអាទិត្យនេះឯង។
កាតាមិនអាចអនុវត្តបានតាមសំណូមពរ១៣ចំណុចនេះទេ។ វាជាគំនាប ជារឿងហួសហេតុដែលត្រូវអោយកាតាផ្តាច់ទំនាក់ទំនងជាមួយអ៊ីរ៉ង់និងតួកគី ដែលសុទ្ធតែជាប្រទេសដៃគូកាតា។ ម្សិលមិញ រដ្ឋមន្ត្រីការបរទេសកាតា លោកអាប់ឌែររ៉ាម៉ាន់ អាល់ ថានី ដែលបំពេញទស្សនកិច្ចនៅទីក្រុងរ៉ូម បានលើកឡើងថា ១៣ចំណុចនេះគឺធ្វើឡើងសម្រាប់ទាត់ចោលទៅវិញ។ ប្រមុខការទូតកាតាបន្ថែមថា គ្រប់គ្នាសុទ្ធតែដឹងថា ១៣ចំណុចនេះប៉ះពាល់ដល់អធិបតេយ្យភាពរបស់កាតា។
ថ្ងៃសៅរ៍ម្សិលមិញ ប្រធានាធិបតីរុស្ស៊ី ពូទីន បានជជែកទូរសព្ទជាមួយអេមៀប្រទេសកាតា និងព្រះមហាក្សត្រប្រទេសបារ៉ែន សុំអោយមានការចរចារកដំណោះស្រាយរវាងគ្រប់ភាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ