ក្រុមជីហាតបង្កើនភេរវកម្មអត្តឃាតដើម្បីទប់ស្កាត់ប្រតិបត្តិការរបស់កងទ័ពអ៊ីរ៉ាក់
កងទ័ពអ៊ីរ៉ាក់កំពុងប្រឈមមុខនឹងភាពពិបាកខ្លាំងឡើងៗនៅខណៈដែលពួកគេកំពុងបន្តវាយរុលទៅមុខឆ្ពោះទៅកាន់ទីក្រុងMossoul ដែលនៅទីនោះ ពួកជីហាតបានបង្កើនអំពើភេរវកម្មអត្តឃាតកាន់តែច្រើនឡើងៗ-នេះបើយោងតាមការបញ្ជាក់អះអាងរបស់មេបញ្ជាការកងទ័ពអ៊ីរ៉ាក់មួយរូបកាលពីថ្ងៃចន្ទម្សិលមិញ។
ចុះផ្សាយនៅថ្ងៃ៖
ស្តាប់ - ០២:១៧
អស់រយៈពេលជាង៨ខែ បន្ទាប់ពីផ្តើមការវាយលុកដើម្បីដណ្តើមយកក្រុងទីពីររបស់អ៊ីរ៉ាក់មកវិញ ក្រុមអ៊ីស្លាមជីហាតរបស់អង្គការរដ្ឋអ៊ីស្លាម នៅត្រួតត្រាតែដីមួយភាគតូចប៉ុណ្ណោះនៅក្នុងតំបន់ភាគខាងលិចទីក្រុង Mossoul។
នៅក្នុងសង្កាត់ខ្លះៗ ចាប់តាំងពី ៣ថ្ងៃកន្លងមកហើយ ពួកអ៊ីស្លាមជីហាត បានបើកការវាយប្រហារដោយបំផ្ទុះគ្រាប់បែកសម្លាប់ខ្លួនឯងជាអាទិ៍ អ្នកបំផ្ទុះគ្រាប់បែកសុទ្ធស៊ឹងជាស្រ្តីភេទ ដែលផ្ទុយកាលពីពេលមុន ពួកអ៊ីស្លាមជីហាត បានប្រើកលល្បិចដោយពួនលបស្ទាក់បាញ់និងបោកគ្រាប់បែក-នេះបើយោងតាមការអះអាងរបស់មេបញ្ជាការម្នាក់នៃកងកម្លាំងពិសេសអីរ៉ាក់។ មន្ត្រីយោធារបស់អ៊ីរ៉ាក់នេះ បានបញ្ជាក់ឲ្យដឹងទៀតថា សព្វថ្ងៃនេះ ពួកជីហាតនៅសល់គ្នា ចំនួនតិចជាង២០០នាក់ប៉ុណ្ណោះនៅក្រុង Mossoul ហើយភាគច្រើនជាជនបរទេស។
ម្យ៉ាងទៀត ដើម្បីប្រឆាំងទល់នឹងការគំរាមពីពួកភេរវនារីអត្តឃាត កងទ័ពអ៊ីរ៉ាក់ បានបង្គាប់ឲ្យប្រជាជនស៊ីវីលទាំងអស់ ដោះសំលៀកបំពាក់ចេញខ្លះ មុននឹងចូលទៅកាន់មណ្ឌលត្រួតពិនិត្យនានា។ ពួកជីហាតឥឡូវនេះ កាន់តែបាត់បង់ដែនអំណាចរបស់ដ៏ធំធេងរបស់ខ្លួនហើយ ដោយសារតែការឡោមព័ទ្ធរបស់កងទ័ពនិងកងប៉ូលីសអ៊ីរ៉ាក់។
ក៏ប៉ុន្តែនៅកន្លែងច្រកផ្លូវតូចៗដែលមានមនុស្សដ៏កុះករ នៅក្នុងទីក្រុងចំណាស់របស់អ៊ីរ៉ាក់នេះ ជម្រុញឲ្យប្រតិបត្តិការរុលទៅមុខរបស់កងទ័ពអ៊ីរ៉ាក់ មានភាពពិបាកខ្លាំង។ក៏ប៉ុន្តែ មេបញ្ជាការកងកម្លាំងពិសេសអ៊ីរ៉ាក់ បានបញ្ចាក់អះអាងដែរថា ការវាយសម្រុកចុងក្រោយនឹងត្រូវប្រព្រឹត្តទៅនៅចន្លោះរវាងពី៥ថ្ងៃទៅមួយសប្តាហ៍ខាងមុខ។
ទោះបីជាទីក្រុងម៉ូស៊ូលនឹងត្រូវវាយដណ្តើមបានមកវិញក៏ដោយក្តី ក៏សង្គ្រាមទល់នឹងអង្គការរដ្ឋអ៊ីស្លាមក៏នៅមិនទាន់ចប់ដែរ ដោយសារតែពួកនេះនៅបន្តការកាន់កាប់ក្នុងតំបន់ជាច្រើនលើទឹកដីអ៊ីរ៉ាក់និងនៅស៊ីរី។
ពួកអ៊ីស្លាមជីហាត ក្នុងរយៈពេល៣ឆ្នាំ ទោះបីជាបានបាត់បង់ទឹកដីត្រួតត្រាចំនួន៦០%និងប្រាក់ចំណូលរបស់ខ្លួនជាង៨០% ក៏ដោយក្តី ក៏នៅតែបន្តជានិច្ចអំពើភេរវកម្មកាប់សម្លាប់ប្រជាជននៅក្នុងប្រទេសស៊ីរីនិងអ៊ីរ៉ាក់។ ហើយកាលពីថ្ងៃអាទិត្យម្សិលមិញ ភេរវជនអត្តឃាតម្នាក់ បានបំផ្ទុះគ្រាប់បែកនៅពីមុខជំរំជនភៀសខ្លួនមួយនៅខេត្តAl-Anbar ភាគខាងលិចប្រទេសអ៊ីរ៉ាក់ ជាហេតុបណ្តាលឲ្យមនុស្ស ស្លាប់១៤នាក់ -នេះបើយោងតាមប្រភពមន្ទីរពេទ្យអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ