វិបត្តិកាតា ៖ អារ៉ាប៊ីសាអូឌីត និងសម្ព័ន្ធមិត្តជួបប្រជុំនៅអេហ្ស៊ីប
អារ៉ាប៊ីសាអូឌីត អេមីរ៉ាតអារ៉ាបរួម ប៉ារែន និងអេហ្ស៊ីប ដែលបាននាំគ្នាផ្តាច់ទូតជាមួយកាតា តាំងពីដើមខែមិថុនាមក ត្រូវជួបប្រជុំគ្នានៅថ្ងៃ ពុធនេះ នៅក្រុងគែរ ប្រទេសអេហ្ស៊ីប ដើម្បីសម្រេចចិត្តថាតើពួកគេត្រូវធ្វើយ៉ាងណាបន្តទៀត ជាមួយកាតា។ កាតាទំនងជាមិនព្រមបន្ទន់ឥរិយាបថ ធ្វើសំណើរបស់ក្រុមប្រទេសទាំងបួននោះឡើយ។
ចុះផ្សាយនៅថ្ងៃ៖
ស្តាប់ - ០២:០២
ជំនួបប្រជុំថ្នាក់រដ្ឋមន្ត្រីការបរទេសត្រូវចាប់ផ្តើមនៅ ម៉ោង ១១ ម៉ោងសកល និងក៏ត្រូវចំចប់ថ្ងៃផុតឱសានវាទដែលដាក់លើប្រទេសកាតាដែរ។ ប៉ុន្តែបើតាមរដ្ឋមន្ត្រីអេមីរ៉ាតអារ៉ាប់រួម វាដូចជាឆាប់បន្តិចដែលគេត្រូវនិយាយអំពីការចាត់វិធានការបន្ថែមប្រឆាំងនឹងកាតានោះ។ លោករដ្ឋមន្ត្រីបានត្រឹមតែធ្វើការចោទប្រកាន់ជាថ្មីថាកាតា បានអនុញ្ញាត និងបានផ្តល់ជម្រក ព្រមទាំងញុះញង់ឱ្យមានអំពើភេរវនិយម ហើយសង្ឃឹមថាកាតាងាកមករកហេតុផល ដោយជ្រើសរើសរក្សាចំណងមិត្តភាពជាមួយប្រទេសជិតខាង ជាជាងការកាត់ផ្តាច់។
ជាប់ចោទជាប្រទេសគាំទ្រភេរវនិយម ជិតស្និទ្ធជ្រុលនឹងប្រទេសអ៊ីរ៉ង់ជាសត្រូវសួរពូជរបស់អារ៉ាប៊ីសាអូឌីត កាតាត្រូវបានក្រុមប្រទេសអារ៉ាបបួន គឺ អារ៉ាប៊ីសាអូឌីត អេមីរ៉ាតអារ៉ាបរួម ប៉ារែន អេហ្ស៊ីប បានផ្តាច់ទូត និងបិទព្រំដែនតែមួយគត់របស់កាតា តាំងពីថ្ងៃទី ៥មិថុនា ២០១៧ មក និងថែមដាក់កំរិតគោរពតាមសំណើ១៣ចំណុចទៀត។ មិនតែប៉ុណ្ណោះ ក្រុមប្រទេសអារ៉ាបទាំងបួននេះ បានទាមទារឱ្យកាតា បិទមូលដ្ឋានទ័ពតួកគីលើទឹកដីខ្លួន និងបិទប៉ុស្តិ៍ទូរទស្សន៍ Al Jazeera ព្រមទាំងកាត់បន្ថយទំនាក់ទំនងជាមួយអ៊ីរ៉ង់។
កាតាបានផ្តល់ចម្លើយតបជាផ្លូវការទៅក្រុមប្រទេសទាំងបួនវិញហើយ តាមរយៈអន្តរការីកូវ៉ែត។ ថ្វីបើគ្មាននរណាបង្ហើបអំពីខ្លឹមសារលម្អិតនៃលិខិតផ្តល់ចម្លើយនោះមែន ប៉ុន្តែគេអាចអស់សង្ស័យនៅពេលបានឮសេចក្តីប្រកាសរបស់រដ្ឋមន្ត្រីការបរទេសកាតា នៅថ្ងៃល្ងាចម្សិលមិញថា មិនអាចទទួលយកបាន និងមិនអាចសម្រេចកើតទេ នូវសំណើរបស់ក្រុមប្រទេសអារ៉ាប !
សម្រាប់កាតា អារ៉ាប៊ីសាអូឌីត និងសម្ព័ន្ធមិត្ត កំពុងតែរំលោភបូរណភាពកាតាក្នុងនយោបាយការបរទេសហើយ។ មិនតែប៉ុណ្ណោះ កាតាដែលជាប្រទេសសម្បូរធនធាន និងនាំចេញឧស្ម័នរាវធម្មជាតិច្រើនជាងគេបំផុតនៅលើពិភពលោក បានប្រកាសចង់បង្កើនបូមឧស្ម័ន៧៧លានតោនឱ្យដល់១០០លានតោនតែម្តង។ បើក្រុមប្រទេសអារ៉ាបរារាំង ក៏កាតានឹងសម្រេចធ្វើតែម្នាក់ឯងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ