សភាអ៊ីរ៉ង់អនុម័តច្បាប់ផ្តល់ថវិកាដល់កម្មវិធីអភិវឌ្ឍមីស៊ីលបាលីស្ទីក
សភាអ៊ីរ៉ង់ នៅថ្ងៃអាទិត្យទី ១៣សីហា បានបោះឆ្នោតអនុម័ត លើច្បាប់បង្កើនថវិកា ប្រមាណ ៥២០លានដុល្លារ ដើម្បីឲ្យរដ្ឋាភិបាលយកទៅអភិវឌ្ឍ កម្មវិធីមីស៊ីល បាលីស្ទីក និងពង្រឹងសកម្មភាពរបស់កងទ័ពឆ្មាំបដិវត្តអ៊ីរ៉ង់ នៅក្នុងតំបន់។ អ៊ីរ៉ង់សម្រេចបន្ថែមថវិកា ដើម្បីអភិវឌ្ឍមីស៊ីលបាលីស្ទីក ដើម្បីឆ្លើយតបទៅនឹងចំណាត់ការរបស់សភាអាមេរិក ដែលបានបោះឆ្នោត ដាក់ទណ្ឌកម្មសេដ្ឋកិច្ច លើអ៊ីរ៉ង់ កាលពីខែកក្កដា កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
ជាមួយនឹងសំឡេងច្រើនលើសលុប (២៤០ សំឡេងក្នុងចំណោម ២៤៤) សភាអ៊ីរ៉ង់បានបោះឆ្នោត បើកផ្លូវឲ្យរដ្ឋាភិបាលបន្ថែមថវិកាចំនួន ២៦០លានដុល្លារ សម្រាប់អភិវឌ្ឍកម្មវិធីមីស៊ីលបាលីស្ទីក។ ចំណែក២៦០លានដុល្លារ ផ្សេងទៀត នឹងត្រូវប្រើដើម្បី ពង្រឹង កម្លាំង ទ័ព Qods ផ្នែកមួយ នៃឆ្មាំបដិវត្តន៍អ៊ីរ៉ង់ ដែលមាននាទីធ្វើប្រតិបត្តិការទ័ព នៅក្រៅប្រទេស។
សភាអ៊ីរ៉ង់ បោះឆ្នោតគាំទ្រទាំងស្រុង រាល់វិធានការ ដែលធ្វើឡើង ដើម្បី ប្រឆាំងទប់ទល់នឹងសកម្មភាព ភេរវនិយម ហើយនិងការលូកដៃ កកូរកកាយរបស់អាមេរិក នៅក្នុងតំបន់។ “អាមេរិកត្រូវដឹងថា វិធានការរបស់យើងនៅថ្ងៃនេះ គ្រាន់តែជាការចាប់ផ្តើមដំបូងតែប៉ុណ្ណោះ” នេះជាការនិយាយព្រមានរបស់ប្រធានសភាអ៊ីរ៉ង់ លោកAli Larijani។
ច្បាប់បន្ថែមថវិកា សម្រាប់អភិវឌ្ឍ ផលិតមីស៊ីលបាលីស្ទីក ត្រូវបានស្នើឡើង ដោយគណៈកម្មាធិការអ៊ីរ៉ង់ នៅ បន្ទាប់ពីសភាអាមេរិកបានបោះឆ្នោត ដាក់ទណ្ឌកម្មសេដ្ឋកិច្ចថ្មី ទៅលើអ៊ីរ៉ង់ នៅក្នុងសំណុំរឿងមីស៊ីល។ តាមអ្នកនាំពាក្យរបស់ក្រសួងការបរទេសអាមេរិក លោកស្រី Heather Nauet អាមេរិកនៅបារម្ភជាប់ជានិច្ច ពីសកម្មភាពបំពុលរបស់អ៊ីរ៉ង់ នៅក្នុងតំបន់។
អាមេរិកបរិហារ ចោទប្រកាន់រដ្ឋាភិបាល អ៊ីរ៉ង់ ថា បានជួយគាំទ្រ ក្រុមអេស្បូឡា ហាម៉ាស និងជីហាតអ៊ីស្លាមប៉ាឡេស្ទីន ដែលអាមេរិកចាត់ទុកជាក្រុមភេរវនិយម គំរាមកំហែងដល់សន្តិសុខ និងស្ថិរភាពរបស់អ៊ីស្រាអែល និងនៅក្នុងតំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ