ក្តីសង្ឃឹមឃើញអារ៉ាប៊ីសាអូឌីតនិងកាតាចូលតុចរចាសាបរលាបមុនអំណរ
ជាងបីខែក្រោយវិបត្តិដ៏ធ្ងន់ធ្ងររវាងកាតាជាមួយបណ្តាប្រទេសអារ៉ាបក្នុងតំបន់ចំនួនបួននាំមុខដោយអារ៉ាប៊ីសាអូឌីត ម្សិលមិញប្រមុខដឹកនាំក្រុងដូហា និងរីយ៉ាដ បានជួបជជែកគ្នាតាមទូរទស្សន៍ជាលើកដំបូង ប៉ុន្តែអារ៉ាប៊ីសាអូឌីតមិនជឿថាកាតាមានចេតនាចង់ចរចាដោយពិតៗទេ។ អារ៉ាប៊ីសាអូឌីតបានគូសបញ្ជាក់ នៅថ្ងៃសៅរ៍នេះ ថាផ្អាករាល់ជំនួបគ្រប់ជាន់ថ្នាក់សិន ក្នុងពេលរង់ចាំការបំភ្លឺជំហរជាក់លាក់ពីកាតា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
វិបត្តិរវាងកាតានិងប្រទេសជិតខាងក្នុងតំបន់ ទំនងជាអូសបន្លាយពេលយូរទៀត។ នៅថ្ងៃសៅរ៍នេះ អារ៉ាប៊ីសាអូឌីត បានចេញសេចក្តីថ្លែងការណ៍ប្រកាសថា កាតា បានត្រៀមចូលចរចាដោះស្រាយជម្លោះដែលផ្ទុះឡើងតាំងពីថ្ងៃទី ៥មិថុនាជាមួយក្រុមប្រទេសអារ៉ាប៤ (អារ៉ាប៊ីសាអូឌីត អេម៊ីរ៉ាអារ៉ាបរួម បារ៉ែន និងអេហ្ស៊ីប)។ ប៉ុន្តែក្តីសង្ឃឹម ត្រូវបានសាបរលាបទៅវិញភ្លាមយ៉ាងទាន់ហន់ ព្រោះតែអារ៉ាប៊ីសាអូឌីតបានដាក់លក្ខខណ្ឌទាមទារឱ្យកាតាបង្ហាញឆន្ទៈចង់ចរចាឱ្យច្បាស់លាស់។
ជាលើកទីមួយនិងជាផ្លូវការ អេមៀរបស់កាតា Cheikh Tamim Ben Hamad Al-Thani បានទូរស័ព្ទជជែកជាមួយនឹងក្សត្រស្នងរាជអារ៉ាប៊ីសាអូឌីត Mohamed ben Salmaneដើម្បីសម្តែងចេតនា ចង់បើកកិច្ចចរចា និងដោះស្រាយវិបត្តិ។ ស្តេចអារ៉ាប៊ីសាអូឌីត ក៏ទទួលស្វាគមន៍សំណើរបស់កាតា ដោយបានអះអាងថានឹងប្រកាសវិធីការចរចា នៅពេលមានការព្រមព្រៀងរវាងអារ៉ាប៊ីសាអូឌីត អេម៊ីរ៉ាតអារ៉ាប់រួម បារ៉ែននិងអេហ្ស៊ីប។ នេះបើតាមភ្នាក់ងារសារព័ត៌មានអារ៉ាប៊ីសាអូឌីត។
ចំពោះអារ៉ាប៊ីសាអូឌីត គឺមេដឹកនាំកាតាជាអ្នកផ្តួចផ្តើមគំនិតចង់ចរចា ប៉ុន្តែ នៅក្នុងរបាយការណ៍របស់កាតា និងបើតាមភ្នាក់ងារសារព័ត៌មានកាតា អេមៀកាតាហៅទូរស័ព្ទទៅក្រុងរីយ៉ាតតាមពាក្យរបស់លោកដូណាល់ត្រាំ ដែលសុំធ្វើជាអន្តរការី។
ហេតុដូច្នេះហើយបានជាអារ៉ាប៊ីសាអូឌីត យល់ថាកាតា គ្មានចេតនាពិតក្នុងការចរចា និងបានប្រកាសផ្អាករាល់គ្រប់ជំនួបជាមួយកាតាសិន រហូតទាល់តែមានបំភ្លឺជំហរច្បាស់លាស់ថ្មី។
អារ៉ាប៊ីសាអូឌីត និងប្រទេសជិតខាងបីទៀត បានផ្តាច់ការទូតជាមួយកាតា និងដាក់ទណ្ឌកម្មសេដ្ឋកិច្ចយ៉ាងធ្ងន់ធ្ងរ តាំងពីថ្ងៃទី៥មិថុនាមក ដោយចោទកូនប្រទេសដ៏មានឥទ្ធិពលមួយនេះថាគាំទ្រភេរវជន និងស្និទ្ធជ្រុលនឹងអ៊ីរ៉ង់។ ប៉ុន្តែកាតាបដិសេធ និងចោទប្រកាន់ប្រទេសទាំងបួននោះវិញថាចង់ជ្រៀតជ្រែកបូរណភាពជាតិកាតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ