សម្ព័ន្ធយុទ្ធជនស៊ីរីគាំទ្រដោយអាមេរិកចោទរុស្ស៊ីថាទម្លាក់គ្រាប់បែកលើទីតាំងខ្លួន
សម្ព័ន្ធយុទ្ធជនប្រយុទ្ធប្រឆាំងនឹងពួកជីហាត នៅស៊ីរី គាំទ្រដោយសហរដ្ឋអាមេរិកបានធ្វើការចោទប្រកាន់នៅថ្ងៃសៅរ៍នេះ ថារបបក្រុងដាម៉ាស និងរុស្ស៊ីជាសម្ព័ន្ធមិត្ត បានដឹកនាំប្រតិបត្តិការផ្លូវអាកាសវាយប្រហារលើទីតាំងរបស់ពួកនៅក្នុងភាគកើតនៅប្រទេស។ ការបរិហារនេះធ្វើក្នុងខណៈដែលកងកម្លាំងសម្ព័ន្ធយុទ្ធជនស៊ីរី កំពុងយកឈ្នះពួកជីហាតរដ្ឋអ៊ីស្លាម កាន់តែច្រើនឡើងៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
សម្ព័ន្ធយុទ្ធជននៃកងកម្លាំងស៊ីរីប្រជាធិបតេយ្យធ្លាប់ធ្វើការចោទប្រកាន់រដ្ឋាភិបាលថាទម្លាក់គ្រាប់បែកលើទីតាំងខ្លួននៅខេត្តរ៉ាកា តែនៅថ្ងៃនេះ ជាលើកទីមួយសម្ព័ន្ធអារ៉ាបគួដប្រឆាំងពួកជីហាត បានប្រកាសខ្លួនជាជនរងគ្រោះ- ជាផ្ទាំងស៊ីប នៃការវាយប្រតិបត្តិការផ្លូវអាកាសរបស់កងទ័ពរុស្ស៊ី។
នៅពេលកងកម្លាំងយុទ្ធជនយើងកំពុងដណ្តើមបានជោគជ័យធំៗ យកឈ្នះលើពួកអង្គការរដ្ឋអ៊ីស្លាមនៅរ៉ាកា និងនៅ Deir Ezzor ភាគីខ្លះបែរជាប៉ុនប៉ងរារាំងដំណើររបស់ពួកយើងទៅវិញ ! នេះជាពាក្យចោទប្រកាន់ដោយចំៗរបស់កងកម្លាំងស៊ីរីប្រជាធិបតេយ្យ ដោយបានអះអាងបន្ថែមទៀតថា នៅពេលពួកគេប្រកាសបើកប្រតិបត្តិការវាយប្រហារពួកអង្គការរដ្ឋអ៊ីស្លាម ខាងរដ្ឋាភិបាលស៊ីរីគ្មានផ្តល់សញ្ញាសហការអ្វីបន្តិចទេ មានតែការបាញ់រារាំងសំណាក់កងទ័ពអាកាសរុស្ស៊ីនិងស៊ីរី រហូតបង្កឱ្យមានយុទ្ធជនរងរបួស៦នាក់ទៅវិញ។
សម្ព័ន្ធយុទ្ធជនអារ៉ាប-គួដប្រឆាំងនឹងជីហាត បានការគាំទ្រផ្លូវអាកាសពីសហរដ្ឋអាមេរិក កំពុងប្រយុទ្ធបណ្តេញបំបែកជំរំចុងក្រោយរបស់ពួកអង្គការរដ្ឋអ៊ីស្លាមនៅខេត្ត Deir Ezzor ភាគខាងកើត ឯចំណែកកងទ័ពរដ្ឋាភិបាលស៊ីរី ការពារដោយរុស្ស៊ី វាយនៅទិសខាងលិច នៃខេត្តនេះដែរ។ តាមធម្មតា បើតាមសម្ព័ន្ធអន្តរជាតិ ក្នុងតំបន់សង្គ្រាមមានគំនូសខណ្ឌចែកតំបន់គ្នា ដើម្បីបញ្ចៀសកុំឱ្យមានប៉ះទង្គិចគ្នានៅពេលប្រយុទ្ធប្រឆាំងនឹងសត្រូវរួម។ ជាទូទៅ ឧប្បត្តិហេតុប៉ះទង្គិចរវាងកងកម្លាំងយុទ្ធជនសម្ព័ន្ធអារ៉ាប-គួដ និងកងកម្លាំងរដ្ឋាភិបាលស៊ីរីជាគូប្រជែង កម្រកើតមានឡើងណាស់។
កាលពីខែមិថុនា យន្តហោះរបស់កងកម្លាំងរដ្ឋាភិបាលស៊ីរីមួយគ្រឿង ត្រូវបានបាញ់កម្ទេចដោយកងកម្លាំងសម្ព័ន្ធអន្តរជាតិ នៅខេត្តរ៉ាកា ប៉ុន្តែវ៉ាស៊ីនតោនបានអះអាងការបាញ់នោះ គ្រាន់តែការតបតការពារខ្លួន ព្រោះយន្តហោះនោះបានបាញ់លើកងកម្លាំងយុទ្ធជនអារ៉ាប-គួដមុន។
ផ្ទុះឡើងនៅខែមីនា ២០១១ ដោយការបង្ក្រាបបាតុករអ្នកប្រជាធិបតេយ្យ និងបក្សប្រឆាំង វិបត្តិស៊ីរីបានរាលដាលពីជម្លោះពីរភាគីរវាងទាហាននិងពួកឧទ្ទាមប្រឆាំង ទៅជាសង្គ្រាមស៊ីវិលរ៉ាំរ៉ៃ និងស្មុគស្មាញ ចូលរួមដោយតួអង្គនយោបាយច្រើន នៅក្នុងតំបន់ផង អន្តរជាតិផង និងក្រុមជីហាតទៀត ពុះច្រៀកប្រទេសជាចំរៀកៗ និងបានសម្លាប់ជីវិតមនុស្សអស់ជាង៣៣០០០០នាក់ និងជនភៀសខ្លួនរាប់លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ